1 U lan e bin aningeg e duw ni Jehoyakim nib mo’on ni fak Josiah e pilung u Judah, me thap e thin rok SOMOL ngog nib l’ag rogon ko girdi’ nu Judah. (Irera’ e re duw ni som’on nike pilung Nebukadnezzar u Babylon.) 2 Gog ngak urngin e girdi’ nu Judah ngu Jerusalem ni lungug, 3 “Ke non SOMOL ni kanpan e bin ragag nge dalip e duw nike pilung Josiah ni fak Amon u Judah nge mada’ ko daba’ ni aray e ke gaman rliw’ nge dalip e duw, ma dawor gu pag ni da gog ngomed e tin ni i yog. Machane damur motoyilgad. 4 Damur motoyilgad ma ku damur tiyan’med, ni yug amrogon ni ku be par Got ni be l’oeg e profet ngomed e tapigpig rok. 5 Yad be yog ngomed ni ngam paged kanowo’med ni kireb nge pin’en ni kireb ni gimed be rin’, ya nge yag ni ku’um pired ko binaw ni pi’ SOMOL ngomed nge pi chitamangimed ni ngam tafned ni dariy n’umngin nap’an. 6 Rogned ngomed ndab kumted fan yug boch e got nge dab kum k’arnged e damumuw ngak SOMOL ya gimed be tay fan bogi liyos ni gimed e mu ngongliyed. Ma fa’ara um tedfan SOMOL, ma aram e dabi gechig nagmed. 7 Machane SOMOL e ir e be yog ni fa’anra gimed ra siyeg ni ngam motoyilgad ngak, mi gimed cheal ngu’um kar’nged e damumuw ngak ko pi liyos romed ma gimed e ka mu girngiyed e gechig nga dakenmed.
8 “Ere, bochan e damur telmed ngak, ma aram e be ga’ar SOMOL ni Gubin ma Rayag Rok, 9 ‘Chiney e bay gu l’oeg urngin e girdi’ ko lel’och nge tapigpig rog i Nebukadnezzar ni Pilung nu Babylon. Bay gu pagrad ngarbad ko cham nga Judah ngak gubin e girdi’ riy nge ngak gubin e binaw u to’oben i yan. Bay gu thirif e re nam ney u but’ nge pi binaw ni bay u to’oben i yan nggu pag ndariy tulwen ni manemus, ni ka ri kireb ni nge gin owchey ngay. I Gag SOMOL e gu be non. 10 Bay gu thang gulngan e uf uf nge felfelan’ nge lingan e garus ko madnom ko mabgol. Ma bayi m’ay e gapgep ko magal rorad, ma ku bay i m’ay e grain. 11 Re binaw ney ni polo’ e bay ni pag ni dakriy tulwen u but’ ma bay i gin owchey ngay, pi binaw ni yad bay u to’oben i yan e bay ur pigpiggad ko pilung nu Babylon u lan medlip i ragag e duw. 12 Tomuren e bay gu gechignag yu Babylon nge pilung riy ni bochan e denen rorad. Bay gu buthug e re nam nem nggu pag ni dakriy e wulgo’ riy bi’id. 13 Bay gu gechignag piyu Babylon u urngin fapi riya’ ni u gog u l’ugun Jeremiah ni nggu fek nga daken e pi nam — gubin e riya’ ni kan yoloy ngalan e re ke babyor ney. 14 Bay gu fulweg ngak yu Babylon puluwon e tin ka ra ngongliyed, bo’or e nam nge pilung nib gel lungun ni bay ra fekedrad ngu’ur manged sib.’ ”
Pufthin rok Got nga daken e pi nam
15 I SOMOL ni Got rok yu Israel e ga’ar ngog, “Irera’ fare kap nib sug e wayin riy ni damumuw rog. Mu fek i yan ngak urngin e nam ni ku gu l’oegem ngorad, mag guy rogon ngar unumed e n’en ni bay riy. 16 Ma nap’an ni yad ra unun e n’en ni bay riy, ma bay ur thigthiggad me man lanin’rad ni bochan e mael ni bay gu pi’ nib togopluw ngorad.”
17 Ma aram mug fek fare kap u pa’ SOMOL, nggu pi’ ko pi nam nike l’oegeg SOMOL ni nggu pi’ ngorad ngar unumed. 18 Jerusalem nge urngin e yochi binaw nu Judah, nib mu’un e pi pilung nge pi tayugang’ ngay, e ni pagrad ngar unumed e n’en bay riy, ke gafgow ya’arad, ni kari kireb nra gin owchey ngay, ni aram e bayi yog e girdi’ fithingrad ni kemang ba yaba’ — ni k’aram rogon ke mada’ ko chiney.
19-26 Irera’ babyoren urngin e pi’in ni unum e n’en ni bay ko fare kap:
pilung nu Egypt, nge pi tolang ko salthaw nge pi tayugang’;
urngin e girdi’ nu Egypt nge girdi’ nu bang nma par u Egypt;
urngin e pilung ko but’ nu Uz;
urngin e pilung ko pi binaw nu Filistia u Ashkelon, Gaza, Ekron, nge tin kabay e girdi’ u Ashdod;
urngin e girdi’ nu Edom, Moab, ngu Ammon;
urngin e pilung nu Tyre ngu Sidon;
urngin e pilung ko pi binaw nu Mediterranean;
nge binaw nu Dedan, Tema, nge Buz;
urngin e girdi’ ni karthabed piyan lolugenrad ke ngochngoch;
urngin e pilung nu Arabia;
urngin e pilung ko yu ulung i girdi’ nma par u daken e ted ni desert;
urngin e pilung nu Zimri, Elam, ngu Media;
urngin e pilung ko lel’och, ni tin nib palog nge tin nib chugur, ni reb nge reb.
Urngin e nam u daken e fayleng e nge unum e n’en ni bay riy. Ma tin tomuren e bayi unum fare pilung nu Babylon.
27 Aram me ga’ar SOMOL ngog, “Mmog ko girdi’, ni Gag SOMOL ni Gubin ma Rayag Rok, ni Got nu Israel, e gu be yog ni ngar unumed nge taw ko ngiyal’ ni ka ra chinggad yad be sul’ugun, miyad aw nga but’ ndabkiyag nra suwongad, ni bochan e mael ni nggu pag nge yib nib togopluw ngorad. 28 Ma fa’an yad ra siyeg ni ngar feked fare kap u pa’am, ngar unumed e n’en ni bay riy, ma aram e ngamog ngorad ni SOMOL ni Gubin ma Rayag Rok e keyog nri yad ra unum e n’en ni bay riy. 29 Bay gu tababnag e maruwel rog u lan e birog e binaw ni nge gafgow. Yad be leamnag ma yad ra thay ko gechig? Danga’, yira gechig nagrad, ya aram e nggu pi’ e mael ngak gubin e girdi’ nu fayleng. I Gag SOMOL ni Gubin ma Rayag Rok e gu be non.
30 “Jeremiah, gur e thingar mu weliy gubin ban’en ni kugog. Ni ngar mog ko pi girdi’ ney ni nge lungum,
‘I SOMOL e bayi non nib ga’ laman u tharmiy
ni bod e dirra’ ko yungin th’abi tolang u tharmiy.
Bayi non nib almarin nib togopluw ko girdi’ rok;
me tolul nib ga’ laman ni bod be’ ni be pirdi’iy e grape.
Urngin e girdi’ nu fayleng ni yad ra rung’ag laman,
31 ma fare lam e ra kumong lingan u daken e fayleng nge taw nga tungun.
Ma SOMOL e bay e n’en ni nge pufthinnag ko pi nam.
Ra fek gubin e girdi’ ko pufthin
ma thang mit e pi’in kireb.
I SOMOL e be non.’ ”
32 I SOMOL ni Gubin ma Rayag Rok e be yog ni riya’ ni nge yib nge aw nga reb e nam nge reb, nge bang i yiko’ nib gel e kekunuy ir u gubin yang u taban e fayleng. 33 Ra yan i rofen nem ma downgin e pi’in nike li’rad SOMOL e ba wear u daken e fayleng ni tabab u baley nge mus nga baley. Dariy be’ nra tayam’ nagrad, ma dab ni k’eyagrad. Bay ra pired u daken e but’ ni bod bo’lung i t’ay e gamanman.
34 Mu yor gad, gimed e pi’in gimed ma gagiyeg, nge gimed e pi’in gimed ma gafaliy e girdi’ rog, mu yor gad ngalang! Mu yorgad mi gimed be leap u fithik’ e fiyath. Ya ngiyal’ ni ngan li’med e ke anog, bay ni li’med ni bod e saf ni pumo’on. 35 Dariy kanawo’en mi gimed thay. 36-37 Mu gel’gel’gad mi gimed yor ngalang ko gafgow ni bochan e damumuw rok SOMOL nike gathay e nam romed ke pag fare nam ni immoy nib gapas ni dakriy e wulgo’ riy. 38 I SOMOL e ke pag e girdi’ rok ni bod ba layon ni chuw ko low rok. Angin e mael nge gelngin e damumuw rok SOMOL nib gel e ke pingeg fare nam ke par ni gowa bang i daken e ted ndear tugul ban’en riy.
