1 Zedekiah ni Pilung nu Judah e l’oeg Pashur nib mo’on ni fak Malkiah nge Zefaniah nib prist nib mo’on ni fak Maaseyah ni ngarab rognew lungun ngog: 2 “Wenig ngom mu non ngak SOMOL ni pa’mad, ni bochan Nebukadnezzar ni Pilung nu Babylon nge salthaw rok ni ka ra m’aged e mael ko binaw romad. Sana bayi fal’eg SOMOL reb fapi maang’ang ni fan ngomad, nge yag ni pagmad Nebukadnezzar.”

3 Aram me yog SOMOL ngog, ni nggog ko fagal pumo’on ni kan l’oegrow ngog 4 ma nganog ngak Zedekiah ni SOMOL, ni Got nu Israel, e ke ga’ar, “Zedekiah, I gag e nggu cham nggu li’ fapi salthaw rom ni yad be cham nib togopluw ko pilung nu Babylon nge salthaw rok. Ma bay gu ulunguy talin e cham ko salthaw rom nga lukngun e binaw. 5 Bay gucham u polo’ i gelngig nge ga’ngin e damumuw rog nib togopluw ngom. 6 Bay gu li’ gubin e girdi’ nma par u lan e re binaw ney; girdi’ nge gamanman e ta’reb rogon ni yad ra yim’ ko liliy ni ubchiya’. 7 Machane gur, nge tayugang’ rom, nge girdi’ ni fos u tan fare mael, nge uyngol ni yib, nge liliy — e bay gu pagmed ni gimed gubin nge kolmed Nebukadnezzar ni Pilung nge pi’in gimed ba to’ogor ni yad ba’adag ni ngar li’ed gimed ngam m’ad. Ma Nebukadnezzar e ra li’med ngam m’ad. Ni dabi pag ta’ab gimed ara kirban’ fa runguy ya’an bigmed. I Gag SOMOL e gu be non.”

8 Ma aram me yog SOMOL ngog ni nge lungug ko girdi’, “Mmotoyilgad! I Gag SOMOL e ku gu pi’ mat’awmed ni ngam mel’egged e bin bu uw e kanawo’, bin ni yan ko yafos fa bin ni yan ko yam’. 9 Cha’ nra par u lan e binaw e yira li’ ko mael ara uyngol ara liliy. Machane cha’ nra yan nga wuru’ e binaw nge pag ir nga pa’ yu Babylon ni yad e chiney e yad be cham ko fare binaw, e ra par ni dab ni li; mra thay ko yam’ nge par nib fos. 10 Ku gu mu’ i turguy u lanin’ug ndab kug digey e re binaw ney, ya nggu kirebnag. Bay ni pi’ nga pa’ e pilung nu Babylon, nge urfiy nga but’. I Gag SOMOL e gu be non.”

11-12 I SOMOL e yog ngog ni nggu pi’ e re thin ni ba’aray ko naun ko pilung nu Judah, ni pi’in owchen David: “Mmotoyil ko mang e gu be yog, I Gag SOMOL. Mu guy ni mat’aw e ngan rin’ ni urngin e rran. Mu ayweg e en ka ni bannag u pa’ e en ke bannag. Ma fa’anra dab mu rin’, ma kireb ni ga be rin’ e ra k’aring e damumuw rog nge yik’ ni bod e nifiy ni dabyag i thang. 13 Jerusalem i gur e kam par ngalang ko pi loway, ni bod ba war nib tolang ngalang u lan bangi tafel’fel’. Machane bay gu cham nib togopluw ngom. Ga be yog ndariy be’ nrayag ni cham ngom fa yag ni thumur rok e pi tamatnag rom nga barba’. 14 Me gag e bay gu gechig nagem ko n’en ni ka mu ngongliy. Bay gu urfiy e naun ntafen e pilung rom, ma re nifiy nem e ra urfiy urngin ban’en u to’oben i yan. I Gag SOMOL e gu be non.”

<- JEREMIAH 20JEREMIAH 22 ->