JEREMIAH 18

Jeremiah ni yan nga tafen be’ nma ma’ th’ib

1 Me ga’ar SOMOL ngog, 2 “Mman nga p’ening nga tabinaw rok fa’nem nma ma’ th’ib, mu rom e bay gu non ngom riy.” 3 Ma aram mu gu wan ngaram, mu gguy e en nma ma’ th’ib ni be maruwel nga ban’en ni be chelchel ni aram talin e maruwel rok. 4 Nap’an nra kireb bang ko fare th’ib ni be ngongliy, me buthug ngki ngongliy reb e ban’en riy.

5 Ma aram me ga’ar SOMOL ngog, 6 “Gur dabiyag ni nggu rin’ ngomed piyu Israel e n’en ni be rin’ e re tama’ th’ib ney? Gimed bay u lan pa’ag ni bod rogon bangi but’ ni bay u lan pa’ be’ nma ma’ th’ib. 7 Ngiyal’ i n’en nra lungug e nggu pug ngalang ara nggu t’ar nga but’, ara gu kirebnag demturug ba nam fa lungun e pilung, 8 ma fa’anra pi’ girdi’en e re nam nem keru’rad ko kireb rorad, ma aram dab ku gu rin’ e tin kugog ni nggu rin’ ngorad. 9 Ma reb e fa’anra gog ni nggu sunmiy ara gu ubung reb e nam ara reb e gagiyeg ko pilung, 10 ma de fol fare nam rog miyad ngongliy e kireb, ma aram e dab gu rin’ e n’en kugog ni gu ra rin’. 11 Ere mog ngak piyu Judah nge pi’in yad be par u Jerusalem ni gu be leamnag e togopluw ngorad, ma gu be fal’eg rogog ni nggu gechig nagrad. Mog ngorad ni ngar tal gad ndab ku ra pired u fithik’ e denen, miyad thiliyeg pangirad nge pin’en ni yad be rin’. 12 Ma bay ra fulweged ni lungurad, ‘Danga’! Mangfan ni nggu rin’ed ni er rogon? Gamad gubin ni bay gu pi’ed nga daken ngu’ug pired nib gel lanin’mad ma gamad be rin’ e kireb nrogon ni gamad ba’adag.’ ”

Girdi’ nra n’aged SOMOL

13 Me ga’ar SOMOL,

“Mu fithed urngin e nam

ko bay reb e nam ni ka’a yigi yodoro’ fa dariy.

Piyu Israel e rib kireb e n’en ni kar ngongliyed!

14 Gur kay gi par fapi burey nu Lebanon nib tolang ma go’ war bingyal’ ndakuriy e ayis u p’ebugul?

Gur ka’a yigi mlik’ e yu pa’ i lul’ ni yib u p’ebugul nga but’ nrib garbeb e ran riy?

15 Girdi’ rog e chiney e ka ra paged talig;

yad be urfiy e incense ngu’ur pi’ed ko pi got ni go’ bogi ban’en.

Yad be dol’dol’ ko re pa’ i kanawo’ ni yad be yan riy,

kar paged e yu pa’ i kanawo’ rorad ni kakrom;

yad be yan u yu yang ni gathi kanawo’.

16 Ka ra ted e re nam ney nike tamdag ya’an,

ni nge chuwan’iy riy ndariy n’umngin nap’an.

Urngin e girdi’ ni bay ranod u to’oben e bay ra gin gad ko n’en ni yad nra guy,

bay ur chichingeged lolugenrad nike balyangan’rad.

17 Bay gu wereg e girdi’ rog u p’eowchen e to’ogor rorad,

ni bod rogon e fiyath ni aw nifngin e ngek ngay nge wereg ngalang.

Bay gu pi’ keru’ug ngorad;

dab gu aywegrad ko ngiyal’ nra yib e riya’ ngorad.”

Ba makath nib togopluw ngak Jeremiah

18 Ma aram me ga’ar e girdi’, “Marod ngad rin’ed ban’en ngak Jeremiah! Ya gubin ngiyal’ ni bay e pi prist ni yad ra fonow niged gadad, nge girdi’ nib gonop ni yad ra pow’iydad, nge pi profet ni yad ra weliy e thin rok Got ngodad. Ngad olobochgad ngak ma dab ku da motoyilgad ko tin be yog.”

19 Me meybil Jeremiah ni ga’ar, “SOMOL, mu telim ko n’en ni gu be yog, ma ga telim ko pin’en ni be yog e pi to’ogor rog ni murung’ageg. 20 Gur tin nib kireb e puluwon e tin ni bfel’? Ya ka ra kered ba low ni nggu mul nga langgin. Mu tafinaynag rogon ni gub ngom nggu welthin ngom ni gu be wenig nagrad, ni nge dab mu gechig nagrad u fithik’ e damumuw rom. 21 Machane chiney SOMOL, e gu be wenig ngom ni ngam pag pifakrad nge math e fan rorad ni uyongol; ma ga pagrad ngan li’rad u fithik’ e mael. Mu pag e pi’in ni ppin nge thay figirngirad nge pifakrad u pa’rad; mu pag e pi pumo’on ngarm’ad ko liliy, ma ga pag e pi’in ni pagel ngan li’rad u fithik’ e mael. 22 Mu pi’ ba ulung i girdi’ ni kireb ngorad nga yugur gin gad ma kan giliw nagrad; mu gagiyeg nagrad ngar yorgad ni ka ra paged lamrad ngalang ni bochan e marus. Kar kered ba low ni nggu mul nga langgin, ma ka ra ngongliyed e wup ni nggu aw ngay. 23 Machane, SOMOL, gur e ga manang ni yad be makath nigeg ni ngar li’edgag nggum’. Dab mu n’ag fan u wun’um e kireb rorad; dab mu n’ag fan u wun’um e denen rorad. Mun’rad nga but’ mag gechig nagrad e ngiyal’ ni ga ba damumuw.”

<- JEREMIAH 17 JEREMIAH 19 ->