2 Me ga’ar SOMOL ngak Gideon. “Kayigi pire’ e pumo’on nike un ngom ndabiyag ni gu pagrad ngar gelgad ngak piyu Midian. Ya richey miyad leamnag ni kar gelgad u gelngirad, ma dab ra leam niged ni gag e kug ayuwegrad. 3 Nge lungum ngak e girdi’, ‘En be rus e nge chuw ko burey ni Gilead nge sul nga tafen, ma gadad e bay dapired u roy ko Burey nu Gilead.’ Ma aram e rliw’ nge l’agruw bbiyu’ i yad e sul, me par ragag bbiyu’.
4 Me ga’ar SOMOL ngak Gideon, “Ka bo’or e girdi’. Mu fekrad nga pe’ning ko ran, ma bay gu ayuwegnem nggu ruw ulung nagrad u rom. Fa’anra gog ni nge un be’ ngom mra un. Ma fa’anra gog ni dabi un be’ ngom ma dabi un.” 5 Me fek Gideon fapi pumo’on i yib nga pe’ning ko ran, me ga’ar SOMOL ngak, “Mu ki’eg e gubin e pi’in yad be unum e ran nga bolowtharad ni bod e pilis, rok gubin e pi’in kar garbuggad nga but’ ni ngar unumed e ran.” 6 Ma 300 e pumo’on nra l’inged e ran nga pa’rad ngu’ur lil’ed. Ma tin ni magey e rragbug nga but’ ngar unumed e ran. 7 Me ga’ar SOMOL ngak Gideon, “Ngam fek fa 300 i pumo’on ni kar lil’ed e ran, ya bay gu ayuwegmed ngam gelgad ngak piyu Midian. Mog ngak e tin kabay e girdi’ ngar sulod nga taferad.” 8 Me l’oeg urngin piyu Israel ngar sulod nga tabinaw rorad, ma kemus ni fa 300 nem e par, me par fapi chugum rorad ni urngin, nge fapi yabul. Ma ke par piyu Midian ngalan e loway nga p’ening rorad.
9 Me ga’ar SOMOL ngak Gideon e re nep’ i n’em, “Mu od ngam og ngak piyu Midian ko gin yad bay riy; ya bay gu ayuwegnem ngam gel. 10 Ma fa’anra ga be rus ni ngam og ngorad, me ere mman nga pe’ning ni gimew Purah ni tapigpig rom. 11 Ngam rung’ag e n’en yad be yog, ma aram e dab kumrus ni ngam og ngorad.” Mranow e tapigpig rok i Purah nga pe’ning nga marichlen e gin ke par piyu Midian riy. 12 Piyu Midian, nge piyu Amalek, nge bogi pumo’on ni yad ma par u daken e ted e karweargad u lan e re loway nem ni bod e asmen’ing ni pire’ ni pire’, ma bay e kamel rorad ni pire’ ni bod feni yo’or e yan’ u dap’el’ay. 13 Fa’ani taw Gideon ko gin yad bay riy, me rung’ag laman be’ nib mo’on ni be weliy ngak ba fager rok murung’agen e lik’ay nike tay, ni be ga’ar, “Kug lik’aynag ba flowa ni ba ga’ nni ngongliy ko barley e ke lobeb i yib ngalan e gin’ey ni gadad be par riy, me yib i aw nga ba tent. Me paraw fare tent nga but’ me yan i par nike filath u daken e but’.” 14 Me fulweg fare fager rok ni ga’ar, “Ireyer e saydon rok Gideon, ni be’ nu Israel, ni fak Joash! Kemus fan! I Got e ke gagiyegnag ni nge gel ngodad piyu Midian nge salthaw rodad ni urngin!”
15 Fa’ani rung’ag Gideon e re lik’ay nem nge fan, me ragbug nga but’ nge liyor ngak SOMOL. Me sul ko gin be par e salthaw nu Israel riy me ga’ar ngorad, “Mu odgad! I SOMOL e ke gagiyegnag ni ngam gelgad ngak e salthaw nu Midian!” 16 Me f’oth fa 300 i salthaw nge dalip ulung, me bagayad me pi’ reb e yabul ngak, nge ba rume’ ni bay e nifiy ni be daramram u langgin. 17 Me ga’ar ngorad, “Ngu’um yaliyedgag ngam rin’ed e n’en ni bay gu rin’ ko ngiyal’ ni bay gu taw nga marichlen e gin yad be par riy. 18 Ma nap’an ni gamad ra thoy e ba’ rog e girdi’ e yabul romad, mi gimed thoy e tiromed e yabul ni kamon’ed nga longob e gin ni kar pired riy, mi gimed tolul ni nge lungumed, ‘Fan ngak SOMOL nge Gideon!’
19 Me yib Gideon nge fa 100 nem e pumo’on nike un ngak nga marichlen e gin ni yad bay riy, nike chugur ni nge lukngun e nep’ ko ngiyal’ nike thil e matanag. Miyad thoy fapi yabul ni bay rorad miyad bilig fapi rume’ ni yad be fek. 20 Me thoy fa gal nem e ulung e yabul rorad miyad bilig fapi rume’. Miyad fek e mol’ nga ba’ ni gilay’ i pa’rad, ma bay e yabul u ba’ ni mat’aw, miyad tolul ni lungurad, “Ba saydon ni fen SOMOL nge Gideon!” 21 Ma yugu ra be’ me sak’iy u tagil’ ni kar longobiyed e re gin’em; me mil e salthaw rok piyu Midian ni gubin ni yad be tolul. 22 Ngiyal’nem ni be thoy fapi pumo’on rok Gideon e yabul rorad, me gagiyegnag SOMOL fapi to’ogor ngu’ur chamgad ngorad ko saydon. Miyad mil i yan nga Zerethan ngar mada’gad nga Beth Shittah, nge mada’ ko fachi binaw nu Abel Meholah u charen yu Tabbath.
23 Min ulunguy e pumo’on ko ganong rok Naftali, nge Asher, nge urngin e girdi’ ko ganong rok Manasseh ngar lol’uged piyu Midian. 24 Me l’oeg girdi’en e pi mol’og ngranod u ga’ngin yang yu Efraim ni go’ burey ni nge lungurad ngak e girdi’ riy, “Mired nga pe’ning ngam chamgad ngak piyu Midian. Ngam matanagiyed e lul’ ni Jordan nge yu pa’ i lul’ nge yan i mada’ nga Bethbarah, ngam guyed rogon ndabi th’ab piyu Midian nga baraba’.” Min ulunguy e pumo’on nu Efraim ngar matanagiyed e lul’ ni Jordan nge yu pa’ i lul’ nge yan i mada’ nga Bethbarah. 25 Miyad kol fa gal ga’ rok piyu Midian, ni aram Oreb nge Zeeb, miyad li’ Oreb ko fare war nu Oreb, mi Zeeb e ra li’ed ko fare n’en ni yima uduy e grapes riy u Zeeb. Miyad ul ul ngay ngar tulufed piyu Midian, miyad fek lolugen Oreb nge Zeeb i yib ngak Gideon, ni bay u ba’ ni ngek e Jordan e ngiyal’nem.
<- JUDGES 6JUDGES 8 ->