1 Urngin e girdi’ nu Israel ni tabab u Dan ko lel’och me yan i mada’ nga Beersheba u lan e yimuch, ma ku er rogon u lan e nam nu Gilead u lan e ngek, nra fulweged e pong nike yib ngorad. Miyad mu’ulung nike ta’reban’rad u p’eowchen SOMOL u Mizpah. 2 Urngin e tayugang’ ko pi ganong nu Israel e yigo’ rabad ko re mu’ulung ney ko girdi’ rok Got, ma pi salthaw ni ka ra fal’eged rogorad e 400,000 u gubin. 3 Kangiyal’ nem me rung’ag e girdi’ ko Benjamin nike mu’ulung urngin piyu Israel nga Mizpah.

Me fith piyu Israel ni lungurad, “Mu weliy ngomad, rogon ni buch e ren’ey?” 4 Me fulweg fa en nu Levi ni kan li’ e bpin rok ni ga’ar, “Bpin rog nge gag e gu warow nga Gibeah u lan fa gin nib milsuwon ko Benjamin ni nggu pirew u rom e re nep’ nem. 5 Me yib e pumo’on nu Gibeah ngar longobiyed fare naun nnep’ ni ngar fekedgag. Ra leam niged ni ngar thanged e pogofan rog; miyad cheal ngar koled e bpin rog u gelngirad, nge yim’. 6 Mu gu fek e ldow rok, nggu th’eth’ab nge ra reb fa ragag nge l’agruw i ganong rok yu Israel mu gu pi’ bang ngay. Pi girdi’ ney e ka ra ngongliyed ban’en nib kireb mab golong u fithik’dad. 7 Gimed urngin u roy ma gimed piyu Israel. Mang e ngad rin’ed u murung’agen e ren’ey?”

8 Ma gubin e girdi’ ni sak’iy ngalang ta’ab yay me lungurad, “Dariy ta’ab gamad nra sul nga tafen ni demturug ko ma par u lan ba tent ara ba naun. 9 Ba’aray e n’en ni ngad rin’ed: ngad girngiyed e pow nge dugil boch e pumo’on ni nge cham nga Gibeah. 10 Ta’reb e pasent u ragag guruy ko pumo’on nu Isarel e ngar pi’ed gan e salthaw, ma tin kabay e ngranod ngar gechig niged yu Gibeah ni bochan fare ngongol ni puwlag nike rin’ fapi cha’ u lan yu Isarel.” 11 Are urngin fapi pumo’on nu Israel nra mu’ulunggad ni bochan ta’ab n’en — ngar chamgad ko fachi binaw.

12 Me l’oeg e pi ganong nu Israel e pi tamal’og ngranod u lan fa gin tafen fare ganong ko Benjamin ni be lungurad, “Mang e biney e kireb ni ka mu ngongliyed? 13 Ere mu pi’ed ngomad fapi pumo’on ni yad ma kol e pumo’on, ya nge yag ni nggu thangedrad nge mathmit e biney e kireb u Israel.” Machane de motoyil e girdi’ ko Benjamin ngak fa pi’in nu Israel. 14 Gubin e binaw u Benjamin ni yib e girdi’ riy nga Gibeah ni ngar chamgad ngak yu Israel. 15-16 Rofen nem e 26,000 e salthaw nra pininged u lane pi binaw rorad. Ma ku er rogon girdi’en yu Gibeah ni ku ra kunuyed 700 e pumo’on nri yad ba mal’eg, pi cha’ney e go’ yad ba gilay’. Yad gubin ma rayag ni ngar yip’ed bagaf i piy nga gan e gawul nge kaen. 17 Piyu Israel e ra kunuyed 400,000 e salthaw ni yad basalap ko mael, machane dar mathe’eggad ko birok Benjamin e ganong.

18 Me yan piyu Israel nga tagil’ e meybil u Bethel, miyad fith Got u rom, “Bin ngan e ganong e nge yan ni mael ngak e Benjamin nsom’on?”

Me fulweg SOMOL ni ga’ar, “Fare ganong rok Judah.” 19 Ere yigi kadbul me yan yu Israel ra pired nib chugur ko fare binaw nu Gibeah. 20 Mranod ni ngar maelgad ngak e salthaw ko Benjamin, miyad tay e salthaw nga tagil’rad ni yad ba sap ko fare binaw. 21 Me yib fa raba i salthaw ko Benjamin nga wuru’ fare binaw, de polo’ e binem e rran ma kar thanged e fan rok 22,000 e salthaw nu Israel. 22-23 Ma aram me yan yu Israel nga tagil’ e meybil ngar yorgad u p’eowchan SOMOL nge mada’ ko blayal’. Miyad fith ngak ni lungrad, “Mog, ngar kug warod bayay ko cham ngak pi walagmad nu Benjamin?”

Me fulweg SOMOL ni ga’ar, “Arrogon.”

Ma aram miki athmagil lanyan’ fare raba i salthaw nu Israel, miyad tay e salthaw rorad nga tagil’rad bayay, ko gin ni urmed riy e bin som’on e rran. 24 Miyad yan i yan nga m’on ncham ngak e fa raba’ i salthaw ko Benjamin ni aram e yay ni l’agruw ngay. 25 Ma ku aram e yay nl’agruw ngay ni yib e Benjamin nga wuru’ yu Gibeah, ma yaney e ra thanged e fan rok 18,000 e salthaw nu Israel ni yad ba falu’. 26 Ma aram me yan gubin e girdi’ nu Israel nga talang nga Bethel ngu’ur yorgad. Miyad par nga but’ u rom u p’eowchen SOMOL ni dar ked ban’en nge blayal’. Miyad pi’ e pi maligach nma gapaseg thilin Got nge girdi’ miyad urfiy boch e gamanman ni maligach ni kab polo’ u p’eowchen SOMOL. 27-28 Fare Kahol ko M’ag rok Got e immoy u rom u Bethel ko yu rran nem, me Finehas nib mo’on ni Eleazar e chitamngin ma Aron e tutuw rok, e ir e bmilfan fare Kehol ko M’ag ngak. Me fith fapi girdi’ SOMOL ni lungurad, “Nggu warod nggu chamgad ngak e pi walagmad ni yu Benjamin, fa nggu paged?”

Me fulweg SOMOL ni ga’ar, “Mu chamgad. Gabul e gu ra pi’rad nga pa’med.”

29 Ere tay piyu Israel boch e salthaw ngar pachgad ni kar liyeged yu Gibeah. 30 Ma aram e bin dalip e rran nranod i yan nga m’on ni ngar chamgad ko fa raba’ i salthaw ko Benjamin miyad tay e pi salthaw rorad nga tagil’rad ni yad ba sap nga Gibeah, ni bod rogon nrined nsom’on. 31 Me yib piyu Benjamin nga wuru’ e binaw ni ngar chamgad min waliyrad i yan nga wuru fare binaw. Ma ku aram rogon nrin’ed som’on, miyad tabab i thang e fan rok boch yu Israel u daken e tafelfel’, ngu lan e wo’ ni yan nga Bethel ngu daken e wo’ ni yan nga Gibeah. Miyad thang e fan rok gonap’an guyey piyu Israel. 32 Me ga’ar fapi girdi’ nu Benjamin, “Kad gelgad ngorad ni ku bod ko som’on.”

Machane ke puruy’nag piyu Israel ni ngar milgad rorad ya ngar waliyed yad i yan nga orel ko fare binaw, nga daken e kanawo’. 33 Ere nap’an e sul fa raba’ i salthaw ni gelngin yu Israel nga ta’bang ngar yu ulunggad bayay u Baaltamar, ma fapi salthaw nra longbiyed yu Gibeah e rabad ra bogorgad nib tomgin nga tamilang ko gin ur pachgad riy u fithik’ e war nib liyeg fare binaw. 34 Ragag bbiyu’ e salthaw nri yad bmel’eag u fithik’ yu Israel ni ga’ngin, nranod ra maelgad ngak yu Gibeah, ere ni cham nib almirin. Piyu Benjamin e dar nanged nike chugur ni ngan thirifrad u but’. 35 Me pi’ SOMOL e salthaw rok Benjamin nga pa’ piyu Israel. Piyu Israel e ra thanged e fan rok 25,100 e pi to’ogor rorad, 36 me nang piyu Benjamin ni kar waergad.

Fa raba’ i salthaw ni gelngin yu Israel e ra milgad rok piyu Benjamin ni bochan e be pagan’rad ngak e tin e salthaw ni kan tayrad ni yad be pach ni kar longbiyed yu Gibeah.

37 Pi salthaw ney e ra milgad nrib pay i yan nga Gibeah; miyad wear u lan fare binaw ngar thanged e fan rok gubin e girdi’ u rom. 38 Fa raba’ i salthaw ni gelngin yu Israel nge fapi salthaw ni ur pachgad e kar duwgiliyed reb e pow. Nap’an ni yad ra guy bangi ath nib dub’ag nike yan ngalang ko fare binaw, 39 ma pi salthaw nu Israel ni yad bay u gil’ e mael e ngar chelgad ngar sulod. I taw ko ngiyal’ney ma ke mu’ yu Benjamin i thang e fan rok fare guyey i girdi’ nu Israel. Me lungurad rorad, “Errogon, kad gelgad ngorad ni ku bod fa yanem.” 40 Ma aram me yib i m’ug fare pow; ni fare gi ath e ke puw ke yan ngalang ko fare binaw. Me sap piyu Benjamin nga wuryal rorad mri balyangan’rad ni kar guyed fare binaw ni ga’ngin nike bugor e daramram riy ngalang. 41 Ma aram me cheal fapi salthaw nu israel u but’, ma piyu Benjamin e ke li’rad e marus ni bochan e kar nanged ni aram e ngan thirifrad u but’. 42 Miyad cheal u but’ ngar milgad rok e salthaw nu Israel ni yad be mil i yan u daken e tafelfel’, machane de yag ni ngar thaygad. Kar me’chathalgad u thilin fa gal raba’ i salthaw: ni fare raba’ i salthaw ni gelngin yu Israel nge fapi salthaw ni aram e yad be sul i yib nga wuru’ fare binaw, min thang owcharad. 43 Fapi Israel e ra thabey niged e pi to’ogor rorad, ni yad be lol’ograd i yan ni dariy e tal nge mada’ ngabang ni bay ko ngek u Gibeah, ni yad be thang e fan rorad i yan. 44 18,000 ko tin th’abi cheag ko pi salthaw ko Benjamin e nli’rad ngarm’ad. 45 Ma tin kabay e ra chealgad ngar milgad i yan nga daken e ted nge nga daken e war nu Rimmon. 5,000 i yad e nni li’rad ngarm’ad u daken e wo’. Ma ka be tuluf yu Israel e tin kabay ngar tawgad nga Gidom, ma 2,000 e kan li’ ke yim’. 46 Rofen nem e 25,000 e pi Benjamin u gubin nthang e pogofan rorad — yad gubin ma bogi salthaw nib muthan’rad.

47 Machane 600 e salthaw e rmilgad nga daken e ted ngar thapgad ko war nu Rimmon, miyad par u rom ni aningeg e pul. 48 Me cheal piyu Israel ngar sulod ngak e Benjamin ngar thanged e fan rorad ni yad gubin ni — pumo’on, ppin, nge bitir, ma errogon e gamanman. Ma ku ra urfiyed urngin e yuchi binaw ko gin’em.

<- JUDGES 19JUDGES 21 ->