1 Nga tomuren e yam’ ni tay Abimelek, me Tola ni be’ ni fak Puah ma tutuw rok e Dodo, e yib ni nge ayweg piyu Israel. Ir be’ ni yib ko fare ganong rok Issakar ni i par u Shamir ko gin go’ burey u Efraim. 2 I gagiyegnag yu Israel u lan rliw’ nge dalip e duw. Ma aram me yim’, min ke’yag u Shamir.

3 Nga tomuren Tola me yib Jair nu Gilead. Mi i gafaliy yu Israel ni rliw’ nge l’agruw e duw. 4 Immoy guyey i pumo’on ni fak ni uranod u daken guyey i dongki. Ma guyey e binaw rorad u lan fare nam nu Gilead, ni mus ko da’ir ma ki ma yog fithingan ni pi binaw rok Jair. 5 Me yim’ Jair min k’eyag u Kamon.

6 Miki denen piyu Israel bayay nib togopluw ngak SOMOL ngu’ur ted fan fapi kan ni Baal nge pi ya’an Astartes, nge pi got rok yu Syria, Sidon, Moab, Ammon, nge Filistia. Ra n’aged SOMOL miyad pag ni da kur liyorgad ngak. 7 Ma aram mri damumuw SOMOL ngak piyu Israel, me pag yu Filistia nge piyu Ammon ngar gelgad ngorad. 8 Ragag nge meruk e duw ni ur gafgow niged ma yad be li’ piyu Israel ni yad ma par u lan yu Amor nib binaw ni bay ko ngek ko fare Lul’ ni Jordan u Gilead. 9 Piyu Ammon ma kur th’abed e Jordan nga ba’nem ni ngar chamgad ko fapi ganong rok Judah, Benjamin, nge Efraim. I par yu Israel nga fithik’ e gafgow.

10 Ma aram me yor piyu Israel ngalang ngak SOMOL ni be lungurad, “Kug denengad nib togopluw ngom, ya kug paged gur ni gur e Got romad, kug tedfan fapi kan ni Baal.”

11 Ma ba’aray e fulweg ni pi’ SOMOL ngorad: “Kafram miki i gafgow nagmed piyu Egypt, Amor, Ammon, Filistia, 12 Sidonia, Amalek, nge piyu Maon, mi gimed yor ngog. Are di’in, da gu ayuwegmed u pa’rad? 13 Machane miki gimed pageg ngu’um ted fan yug boch e got, ere dab kug ayuwegmed bayay. 14 Mmarod ngu’um yorgad ngak e pi got ni kam mel’egged. Bayi mang yad e ur ayuweged gimed u nap’an ni keyib e gafow ngomed.”

15 Machane me ga’ar e girdi’ nu Israel ngak SOMOL, “Kug denengad. Mu rin’ e tin ga ba’adag, machane wenig ngom, mu ayuwegmad e daba’.” 16 Ma aram miyad n’ag fapi got nu boch e nam ni ur ted fan miyad liyor ngak SOMOL; me kirban’ ngak yu Israel ni kar awgad nga fithik’ e gafgow.

17 Ma aram me fal’eg e salthaw nu Ammon rogorad ni fan ko mael marbad ra pired ngalan yu Gilead. Me mukun piyu Israel nga ta’bang ngar pired u Mizpah u lan e nam nu Gilead. 18 Girdi’ nge pi tayugang’ ko fapi ganong nu Israel e ur fithedyad ni yad be ga’ar, “Mini’ e ra girengiy e re mael ney ni ngdarodnag ngak piyu Ammon? Demturug e en nra rin’ mra par ni ir e tagagiyeg rok gubin e girdi’ nu Gilead.”

<- JUDGES 9JUDGES 11 ->