ISAIAH 2

Gapas ni bay i par ndariy n’umngin nap’an

(Mikah 4:1–3)

1 Ba’aray e thin ni pi’ Got ngak Isaiah ni be’ nib mo’on ni fak Amoz ni murung’agen yu Judah nge yu Jerusalem ni ga’ar:

2 Tin bayib e rran nga m’on

e re burey ni bay e Tempel riy

e bayi par ni ir e th’abi tolang u fithik’ gubin e burey,

nge m’ug ngalang u fithik’ gubin e burey.

Pire’ e nam ni bay rabad ngay,

3 ma girdi’ ko pi nam nem e bayi lungurad,

“Ngdarod ko fare burey rok SOMOL,

ko Tempel rok fare Got nu Israel.

Ya ngad filed e n’en ni ba’adag ni ngad rin’ed;

mu u darod ko yu pa’ i kanawo’ nike turguy.

Ya thin rok SOMOL e yib u Jerusalem;

u Zion e non riy ko girdi’ rok.”

4 Bayi gapaseg thilin e pi nam ni gang’.

Bay ra ama niged e pi saydon rorad ngar ngongliyed talin e maruwel riy nma gi’ e but’

nge pi sarey rorad nge mang yar ni yima th’ab papa’ngin e woldug ngay.

Pi nam e dab ku ra maelgad bayay,

ma dab ku ra fal’eged rogorad bayay ni fan ko mael.

5 Ere, gimed e pi’in owchen Jakob, marod ngdarod u tamilangen SOMOL!

Tolngan’ e ra math mit

6 Got, ka mu n’ag e girdi’ rom, ni pi’in owchen Jakob! Fare binaw e ke suguy ngonglen e pi bey ko pi nam nu lan e ngek nge pong thagith ni bod yu Filistia. Girdi’ e yad be folwok u yalan boch e nam. 7 Binaw rorad e ba sug ko silber nge gol, pi machaf rorad e dariy folen. Ma binaw rorad e ba sug ko os, ma dabiyag i the’eg e pi chariot rorad. 8 Lan binaw rorad e ke sugnag e liyos, ni yad ma tayfan ma yad be siro’ nga bogi ban’en ni yad e kar ngongliyed nga pa’rad.

9 Gubin e girdi’ ni bay ni tamra’ nagrad me ma’ farad. SOMOL, dab mu n’ag machan rorad!

10 Bay ur mithgad ngalan bogi yiy ko yochi burey ni go’ war ara ra kired bogi low nga fithik’ e but’ ni yad be guy rogon ni ngar milgad ko damumuw rok SOMOL miyad mith u gelngin nge feni maluplup’! 11 Bay i taw nga reb e rran ni bayi tal e tolngan’ ko girdi’ me math mit e ufanthin. Ma aram e SOMOL e go’ ir e bayi gilbugwan. 12 Rofen nem e SOMOL ni Gubin ma Rayag Rok e bayi sobut’nag e pi’in ba gel gelngirad, nge gubin e pi’in tolngan’ nge ufanthin. 13 Bayi thikiy e pi gak’iy ni cedar nib n’uw kaen u Lebanon nge gubin e gak’iy ni oak u lan e binaw nu Bashan. 14 Bayi pacheg e pi burey ni gagang’ nge tin ba achichig, 15 nge gubin e pi wulyang ni tafen e damit nib tolang, nge rungrung ko yungin kan yororiy ni fan ko mael. 16 Bayi ligilnag gubin e barkow ni mus ko tin th’abi ga’ nge tin th’abi fel’ ya’an. 17-18 Tolngan’ ko girdi’ e bayi tal, me thang mit e ufanthin ko girdi’. Ma pi liyos e gubin ni bayi m’ay nga bang, ma SOMOL ni go’ ir, e bayi gilbugwan e rofen nem.

19 Girdi’ e bay ra mithgad ngalan e yiy ko yochi burey ni go’ war fa ra kired e low nga fithik’ e but’ ni yad be guy rogon ni ngar milgad ko damumuw rok SOMOL, miyad mith u gelngin nge feni maluplup’, ko ngiyal’ ni bay yib ni nge rurug e fayleng. 20 Nap’an nra taw ko rofen nem, ma bay ra n’iged e gol nge liyos ni silber nra ngongliyed, ngar n’iged ngak e boro’ nge magl’aw. 21 Ngiyal’ nra yib SOMOL ni nge rurug e fayleng, ma girdi’ e bay ra mithgad ngalan e pi yiy ko yochi burey ni go’ war ni yad be guy rogon ni ngar milgad ko damumuw rok miyad mith u gelngin nge feni maluplup’.

22 Dab mu tay e pagan’ rom nga daken e girdi’ nra yim’. Mang e yad bfel’ ngay?

<- ISAIAH 1 ISAIAH 3 ->