1 U lan e binaw nu Sela u lan e ted ni desert e pi’ e girdi’ nu Moab ba saf ni tow’ath rok e en nma gagiyeg u lan yu Jerusalem. 2 Yad be son u mirichren e lul’ nu Arnon ni yad be chelchel ni bod e arche’ ni kan langrad u taferad.

3 Miyad ga’ar ngak e girdi’ nu Judah, “Moged ngomad ko mang e nggu rin’ed. Mu yororgad romad ni bod ba ke gek’iy ni aw fon nib tagarbeb u gowalngin e misiw, mpaged gamad nggu toffangad nga fomed. Ya gamad bogni’ ndariy tafenmad, mmithaged gamad ko gin ndariy be’ nra pat ngomad riy. 4 Mu paged gamad nggu pired u daken e but’ romed. Mu yororiyed gamad rok pi’in karm’ad ni bochan ni ngar thanged e pogofan romad.”

(Ngochngochan’ nge riya’ e bayi mus, ma pi’in ur giliw niged e binaw e bay ra chuwgad. 5 Ma aram e reb e pi’in owchen David, e bayi mang pilung, ni bayi gagiyegnag e girdi’ ko yul’yul’ nge t’ufeg. Bayi gur ni nge rin’ e tin nib yal’uw’, me guy ni ngu’un rin’ e tin nib mat’aw.)

6 Me ga’ar e girdi’ nu Judah, “Ku gu rung’aged rogon feni uf uf e girdi’ nu Moab. Gamad manang ni yad ba tolngan’ ma yad ba ufanthin machane dariy ban’en ni ngar ufgad ngay.”

7 Girdi’ nu Moab e bay ur yorgad ni bochan e pi oloboch ni bay ur gafgowgad riy. Yad gubin ni bay ur yorgad u nap’an nra yib wuran ngan’rad e ggan ni falel’ ni ur ked u lan fare binaw nu Kir Heres. Bay ra pired nike math e liyab rorad. 8 Pi milay’ nib chugur nga Heshbon nge pi milay’ ni grape Sibmah e go’ ke kireb, ireram e pi milay’ ko grape ni i chingaw’ e pi’in ur gagiyeg niged e pi nam ko pi wayin ni i yib riy. Bay bangiyal’ ni garer e pi milay’ nem nge mada’ ko binaw nu Jazer, me yan ko ngek ngalan e ted ni desert, me yang u rom ko ngal nga ba’nem e Dead Sea. 9 Ma chiney e gu be yornag e grape nu Sibmah ni bod ni gu yornag yu Jazer. Be map’ lu’ag ni fan nga Heshbon ngu Elealeh, ni bochan e dakriy wom’ngin e woldug nra felan’ e girdi’ ngay. 10 Chiney e dakriy be’ ni be felfelan’ u lan fa yungi flang nib yung’ol. Dakriy be’ ni be tolul ara be tang u lan fapi milay’. Dariy be’ ni be pirdi’iy e grape ni nge ngongliy e wayin riy; laman e felfelan’ e dakriy. 11 Ku gu gel’gel’nag e kirban ni fan ngak yu Moab, ma ke gafgowan’ug nga Kir Heres. 12 Girdi’ nu Moab e thay porowrad ko yan nga daken e burey nga tagil’ e meybil nge lan e pi tempel rorad ko meybil, machane dariy ban’en riy ni bfel’ ngorad.

13 Irera’ e thin ni pi’ SOMOL ni somm’on u murung’agen yu Moab. 14 Ma chiney e be ga’ar SOMOL, “Ri dalip e duw me chuw e fla’ab rok yu Moab, aram feni yo’or e girdi’ riy, machane kemus nri in i yad e ra fos, miyad par ni yad ba me’waer.”

<- ISAIAH 15ISAIAH 17 ->