1 Rofen ni rliw’ nge ta’reb ko pul ni medlip ko fare duw, e ki non SOMOL bayay u l’ugun Haggai ni profet. 2 I yog ngak Haggai ni nge yog ngak Zerubbabel, ni fare governor nu Judah, nge ngak Joshua ni fare Prist ni Th’abi Ga’, nge fapi girdi’, ni nge ga’ar ngorad, 3 “Bay be’ u fithik’med ni kamnang rogon feni fel’ fare Tempel ni immoy? Urrogon ya’an ni gimed be guy e chiney? Ya’an e chiney ni be m’ug e gowa dariy. 4 Machane chiney e dariy bigmed ni nge mulan’. Mmarwelgad ya gu bay romed. 5 Nap’an nimbad nga wuru’ yu Egypt, mug micheg ngomed ni gubin ngiyal’ ni gu bay romed. Ere kug bay romed, dab mu rusgad.

6 “Dabki n’uw nap’an ma bay gu rurug e tharmiy nge fayleng, nge binaw nge day. 7 Bay gu rurug gubin e pi nam, ma gubin e pi machaf rorad ni bay ni fek ngaray, nge sug fare Tempel ko pi manigil. 8 Gubin e silber nge gol u fayleng e fanag. 9 Bin be’ech e Tempel e bayi gel feni manigil ko bin ni kafram, mu rom e bay gu fla’abnag e girdi’ rog riy miyad par u fithik’ e gapas.” I SOMOL ni Gubin ma Rayag Rok e ke non.

10 Rofen ni rliw’ nge aningeg ko pul ni mereb ko bin l’agruw e duw ni Darius e ir e pilung, me non fare SOMOL ni Gubin ma Rayag Rok bayay ngak Haggai ni profet. 11 Ni ga’ar, “Mog ngak fapi prist ni ngar turguyed e fulweg ko re duwer ni ba’aray: 12 Susun e fa’anra fek be’ bang e ufin nib tabgul u reb e maligach nike bachiy ngabang ko wuru’ e mad rok. Ma fa’anra math fare wuru’ e mad rok nga bayal’ e flowa, ara ggan ni kanlith, ara wayin, ara gapgep ni olive, ara yug reb e ggan, ma ku ra tabgul fare ggan?”

Nap’an nni fith fare duwer, me fulweg fapi prist nra ga’argad, “Dangay.”

13 Miki fith Haggai ni ga’ar, “Susun e be’ nike ta’ay ni bochan e ke math nga downgin be’ nike yim’. Ma aram me math nga reb fapi ggan, ma ra ta’ay fapi ggan?”

Me fulweg fapi prist nra ga’argad, “Errogon.”

14 Ma aram me ga’ar Haggai, “Be ga’ar SOMOL e aram e ku ta’reb rogon ko girdi’ ko re nam ney nge gubin e tin yad be thognag, ere ku arrogon gubin ban’en ni yad be pi’ u daken e altar nike ta’ay.”

15 Me ga’ar SOMOL, “Damur guyed e n’en ni be buch romed? U m’on nim tabab gad i toy bayay fare Tempel, 16 mmarod ngab ulung i grain ni gimed be leamnag ni rliw’ thum, machane kemus ni ragag. Gimed ra yan ni ngam l’inged wugem e galon e wayin u tafen, migmed pir’eg ni kemus ni rliw’ e galon ni bay. 17 Gu pi’ e nifeng ni gel nge ayis ni nge kirebnag e tin gimed be guy rogon ni nge tugul. Machane ku dam pi’ed keru’med ko kireb romed. 18 Daba’ e rofen ni rliw’ nge aningeg ko pul ni mereb, ni aray e rofen ni kan mu’nag e def ko fare Tempel. Mu ted fanmedyan ko n’en ni nge buch e chiney i yan ngaram. 19 Yug aram rogon ni dakriy e grain ni magach, nge yuke grape, nge gek’iy ni fig, nge gek’iy ni pomegranate, nge gek’iy ni olive nike yib wom’ngin, ma chiney i yan ngaram e bay gu fal’eg wa’athmed.”

20 Ka rofen nem ni rliw’ nge aningeg ko re pul nem, miki non SOMOL ngak Haggai ko yay ni l’agruw 21 ni fan ngak Zerubbabel, ni fare governor nu Judah: “Arame nggu rurug e tharmiy nge fayleng 22 mug gathay gil’ilungun e pilung mug taleg gelingrad. Bay gu pulpuliy e pi chariot nge pi girdi’en e yan riy; ma bayi yim’ e pi os, ma pi girdi’en e yan u os e bay ra chelgad ngorad ngu’ur thanged e fan rorad. 23 Rofen nem e gur Zerubbabel ni tapigpig rog e bay gu fekem, nggu duwgiliyem ni ngam gagiyeg u fithingag. I gur e cha’ ni gu mel’eg nem.” I SOMOL ni Gubin ma Rayag Rok e keyog e pi thin ney.

<- HAGGAI 1