1 Amrafel ni Pilung nu Shinar, nge Ariok ni Pilung nu Ellasar, nge Kedorlaomer ni Pilung nu Elam, nge Tidal ni Pilung nu Goyim 2 e ra maelgad ngak lal e pilung, ni aram Bera nu Sodom, nge Birsha nu Gomorrah, nge Shinab nu Admah, nge Shemeber nu Zeboyim, nge pilung nu Bela (ara Zoar). 3 Lal i pilung ney e ra chaggad miyad ulunguy e salthaw rorad ngalan e Loway u Siddim, ni aram yu Dead Sea e chiney. 4 Ya yad be par u tan pa’ Kedorlaomer nike gaman ragag nge l’agruw e duw nap’an, machane fa’an ni yan ngalan e bin ragag nge dalip e duw miyad togopluw ngak. 5 Me yan ngalan e bin ragag nge aningeg e duw me yib Kedorlaomer nge pi pilung ni kar chaggad ngak nge salthaw rorad ngar gelgad ngak piyu Refaim ni bay u lan yu Ashterothkarnaim, nge piyu Zuzim ni bay u lan yu Ham, nge piyu Emim ni bay u daken bangi binaw nib tagapas ni kanog yu Kiriathaim ngay, 6 nge girdi’ ni kanog e Horite ngorad ni yad ma par u daken e burey i yan u Seir nge yan i mada’ nga El-paran, ni bay ko gin ni tabab fa gi ted ni desert riy. 7 Miyad cheal ngar sulod nga Kadesh (ara Alublub ko Pufthin), miyad kol e nam rok e girdi’ ni kanog e Amalekite ngorad ni ga’ngin, nge girdi’ ni kanog e Amorite ngorad ni yad ma par u lan yu Hazazon-tamar.

8 Ma fapi pilung nu Sodom, ngu Gomorrah, ngu Admah, ngu Zeboyim, ngu Bela e ra kunuyed e yu raba’ i salthaw rorad ngalan e Loway nu Siddim ngar maelgad 9 ngak Kedorlaomer nu Elam, nge Tidal nu Goyim, nge Amrafel nu Shinar, nge Ariok nu Ellasar, ni aram e lal e pilung nike togopluw ngak aningeg. 10 Ma loway nu Siddim e ba sug ko low nike suguy e pich, ma pilung nu Sodom ngu Gomorrah e fa’anra guyew rogon ni ngar milgow ko mael, miyow mul ngalan e pi low nem. Ma dalip ni magey e pilung e ra milgad nga daken e pi burey. 11 Ma fa aningeg i pilung e ra feked urngin ban’en ni bay u lan e binaw nu Sodom ngu Gomorrah, nib mu’un e ggan ngay, miyad yan. 12 Ma ku ra feked Lot ni fak walagen Abram nge urngin ban’en rok, ya ma par u Sodom.

13 Machane bay be’ nib mo’on ni thay me yib i yog ngak Abram ni ba Hebrew nma par nib chugur nga yu ke gek’iy ni oak ni fi’in Mamre, ma cha’nem e ba Amorite, nib mo’on ni walagen Eshkol nge Aner, ni yad Abram nga baraba’. 14 Fa’ani rung’ag Abram ni ka ni kol Lot ni fak be’ ni walagen, me kunuy e pumo’on ni be par rok ni pi’in nib yul’yul’, mranod ra gaman gad 318 u gubin, miyad lol’oeg fapi pilung ngar mada’gad nga Dan. 15 Me ruw raba’nag e girdi’ rok u rom ngar pired ni kar ruw ulunggad, miyad cham ngak fapi pilung nge salthaw rorad ni nep’ ngar gelgad ngorad. Miyad lol’oegrad ngar mada’gad nga Hobah, ni bay nga lel’och u Damaskus, 16 miyad fulweg urngin e chugum ni kan fek. Miki fulweg Abram i Lot, ni be’ rok, nge chugum rok, nge pi’in ni ppin nge tin kabay e girdi’.

17 Fa’ani sul Abram nike gel ngak Kedorlaomer nge tin ba’aram e pilung ni yad, me yan e pilung nu Sodom i sonnag ngalan e Loway u Shaveh (ni ku yima yog fithingan ni Loway rok e Pilung). 18 Me Melkizedek, ni ir e pilung nu Salem ma ku ir e Prist ni Th’abi Ga, e fek e flowa nge wayin i yib ngak Abram, 19 me yibilay ni ba’aray e thin ni yog, “I Got ni Th’abi Tolang, me ir e ngongliy e tharmiy nge but’, e nge fal’eg wa’athan Abram.

20 I Got ni Th’abi Tolang e nga ni pining e sorok ngak, ya ir e ke ayuwegnem kam gel ngak e pi to’ogor rom ko mael.” Me fek Abram ragag e pasent u urngin e tin ni fek u fithik’ e mael nge pi’ ngak Melkizedek.

21 Me ga’ar fare pilung nu Sodom ngak Abram, “Mu tay rom urngin ban’en ni kam fulweg, machane ngam pi’ ngog urngin e tirog e girdi’.” 22 Machane me ga’ar Abram, “Ri gu be yog ngom u p’eowchen SOMOL, ni ir fare Got ni Th’abi Tolang, ni ir e sunumeg e tharmiy nge but’, 23 ndariy bochi ban’en rom ni nggu fek, ni mus nga ba yil’ i tret ara togofan ba sus, ni bochan e nge dabiyag ni lungum, ‘I gag e gu yo’ornag ban’en rok Abram.’ 24 Dariy ban’en ni nggu fek rom nggu fanay. Kemus ni tin ke kay e tirog e girdi’ e kemang birog e f’oth, machane pi’in gamad nga baraba’, ni Aner nge Eshkol nge Mamre e ngar feked e f’oth rorad.”

<- GENESIS 13GENESIS 15 ->