1-7 Mathil ko lel’och ko fare gi binaw e yan ko day ni Mediterranean nib sor ko ngek nge taw ko binaw nu Hethlon, me yan u rom ko Hamath Pass, me yan u rom ko fare binaw nu Enon, nge yan i mada’ ko mathil u thilin e binaw nu Damascus nge binaw nu Hamath. Ra reb fapi ganong ma nge yag ngak bang ko fare gi binaw ni yib ko mathil u ngek ni be sor ko ngal nge mada’ ko day ni Mediterranean, ni ba’aray yarmen tafen fapi ganong ni tabab ko lel’och nge yan ko yimuch:

8 Ma ba’ ni migid e binaw e ngan tay nib muduwgil e n’en ni ngan fanay ngay. Ni ragag e mayel ga’ngin radan ko lel’och nge yan ko yimuch, ma n’umngin ko ngek nge yan ko ngal e ku ta’reb rogon ko tin kan pi’ e binaw ko tin ba’aram e genong. Fare Tempel e yira tay u lan e giney e binaw.

9 Ba guruy u lulkungun e gi binaw ney ni ragag e mayel radan ma meruk e mile n’umngin e ngan pi’ ngak SOMOL. 10 Fapi prist e bay bang ni f’oth rorad ko re gi binaw ney nib thothup. F’oth rorad ko binaw e ngan fil ni ragag e mayel radan ko ngek i yan ko ngal, ma aningeg e mile ko lel’och nge yan ko yimuch. Lukungun e gin’ey e ir e yira tay fare Tempel rok SOMOL ngay. 11 Re gin’ey e tafen fapi prist ni owchen Zadok. Pigpig ni urted ngog e yad ba yul’yul’ ngay ma dar uned ko tin kabay e girdi’ nu Israel ngu’ur rin’ed e kireb, ni bod e tin i rin’ chongin fare ganong ni Levi. 12 Ere fapi prist e ngar tafened e gin nib mel’eag nib migid ko gin nib milfan ko pi Levite, ni aram e gin ra par nib th’abi thothup ko gubin yang. 13 Pi Levite e kuyad ra tafnay bang ni kub mal’eag, ni bay ko yimuch ko fa gin tafen e prist. Re gi binaw nem ko Levite e ragag e mayel ni yib ko ngek nge yan ko ngal, ma aningeg e mayel ni yib ko lel’och nge yan ko yimuch. 14 Re gi binaw nni ognag ngak SOMOL e aram e gin th’abi fel u fithik’ gubin yang, ni dariy bang riy ni yira pi’ ni chuway’, fa ni thilyeg ngabang ara ni pi’ ni nge tafnay be’. Ya ba thothup nib milfan ngak SOMOL.

15 Ma gin ke magey ko fagi binaw e ragag e mayal radan ma l’agruw e mayal n’umngin ko lel’och i yan ko yimuch, ma de thothup. Ma fan ngak urngin e girdi’ ni ngu’ur muruwliyed. Ma rayag ni ngu’ur pired riy ma yad be muruweliy. Fare binaw e yira tay nga lulkungun e re gi binaw nem, 16 ni re binaw nem e ta’reb n’umngin nge radan ni 2,520 e yard ga’ngin u barba’ ngu barba’. 17 Re binaw nem e ba liyeg bangi ban’en ndariy ban’en riy ni 140 e yard u barba’ ngu barba’. 18 Fa gi but’ ni aw nga tomuren nike m’ay i toy fare binaw ni ngan par riy ni bay ko yimuch ko fa gin nib thothup — e bang e bay ko ngek riy ni aningeg e mayel n’umngin ma l’agruw e mayel radan ma bang e bay ko ngal ni ku ta’reb ga’ngin ko gin bay ko ngek, ma galyang i but’ ney e nge par ni tagil’ e woldug ko girdi’ nma par ko fare binaw. 19 En nma par u lan fare binaw, e demturug e re ganong ni yib riy, mrayag ni milay’nag e gin’em.

20 Ere ga’ngin yang ko fa guruy nem e binaw ni lukngun ni kan mel’eg e nge ta’reb n’umngin nge radan ni ragag e mayal u barba’ ngu barba’, ni kub mu’un ngay fa gin ba’aram ni bay fare binaw riy.

21-22 Ma ngek nge ngal ko re gin’ey ni bay fare Tempel riy, nge tafen e prist, nge pi Levite, nge fare binaw, ma gin ke aw riy e nge milfan ngak fare pilung ni be gagiyeg. Re gin’em e ra yan i tun ko mathil ko ngek me yan ko ngal nge mada’ ko fare gi day ni Mediterranean, me yani mathil ko lel’och ko gin tafen yu Judah ma yimuch riy e yan i mathil ko gin tafen yu Benjamin.

23-27 Fare gi but’ ni bay ko yimuch ko fare raba’ i binaw (ni bay fa gin’en nib thothup riy nge tafen e en fak e pilung) e nge tafnay e tin kabay e genong nra bagyad ma nge tafnay bang riy, gubin yang e pi binaw nem ni tabab ko mathil u ngek me yan u rom ko ngal nge yan i mus ko Mediterranean. Ba’aray yarmen u but’ ni tabab ko lel’och nge yan ko yimuch:

30-34 Ragag nge l’agruw e garog ngalan fare binaw nu Jerusalem. Ma ba longbiy e rungrung ni aningeg raba’, nra barba’ ma fol riy e 2,520 e yard, ma ra barba’ ma dalip e garog ni bay riy nra reb ma bagyad fapi genong e ir e kan tunguy fithingan ngay. Dalip ni bay e garog ko ba’ ni lel’och e rungrung e ni tunguy Ruben nga reb, Judah nga reb, me Levi nga reb; dalip ni ba’aram e garog ni bay ko ba’ ni ngek e rungrung e ni tunguy, Josef, Benjamin, nge Dan ngay; ma dalip ni bay ko gin ni yimuch e rungrung e kan tunguy, Simeon, Issakar, nge Zebulun ngay; ma dalip ni bay ko gin ngal e rungrung e ni tunguy Gad, Asher, nge Naftali ngay. 35 N’umngin fa aningeg raba’ i rungrung u gubin e 10,080 e yard. Fithingan fare binaw e chiney i yan ngaram e ba’aray “I SOMOL E Bay U Roy!”

<- EZEKIEL 47