1 I SOMOL e non ngog. 2 I ga’ar, “Fak e girdi’, mup nga owchen e pi tagagiyeg nu Israel e kireb rorad. Mu yi’iy ngamog ngorad e n’en ni Gag SOMOL ni Th’abi Tolang e gu be yog ngorad: Kam riya’gad gimed e pi tagafal saf nu Israel! Gimed be ayuwegmed, machane damur ayuweged e saf. 3 Gimed be unum e milik ni be yib ko saf, ma gimed be yin’ e mad nni ngongliy u bunu’en e saf, ma gimed be li’ ngam longuyed e tin th’abi fel’ e saf. Machane damur ayuweged e saf. 4 Damur ayuweged e tin nib me’waer, ma damur gol niged e tin ke m’ar, ma damur m’aged e mad ko yungin u downgin e tin ke maad’ad, ara mfulweged e tin ke sor ngabang, ara mu changar niged e tin ke malboch. Machane ri gafgow e gimed be tay ngorad. 5 Bochan e da i moy rorad e en nma gafaliyrad miyad wear, me yib e gamanman ni malboch ngi i li’rad ma be longuyrad. 6 Ere pi saf rog e yad be yan u daken e ted ngu daken e burey i yan. Kar weargad u fayleng i yan, ma dariy be’ ni be gayrad ara be guy rogon ni nge pir’egrad.

7 “Ere gimed e pi tagafaliy e saf, mu telmed ko tin gag SOMOL e nggu weliy ngomed. 8 Rogon feni riyul’ ni Gag fare Got ni gu be par ni gub fos e aram rogon feni rriyul’ ni bfel’ ni ngam motoyilgad ngog, ya saf rog e ke og e gamanman ni malboch ngorad yad be li’rad ma yad be longuyrad, ya dariy be’ ni be gafaliyrad. Ya pi tagafaliy e saf rog e dar guyed rogon ni ngar gayed e saf. Kar pired ni yad e yad be ayuweged yad, ma darir ayuweged e saf. 9 Ere mu telmed ngog e pi tagafaliy e saf. 10 I Gag SOMOL ni Th’abi Tolang e kugog ni gag e to’ogor romed. Bay gu fek e saf rog romed ma dakriy bayay ni nggu pagmed ngu’um gafaliyedrad; ma ku dakriy bi’id ni nggu pagmed nge mang gimed e um ayuweged gimed. Bay gu leag e saf rog u pa’med nggu ayuwegrad nge dabkiyag ni mu longuyed yad.”

11 “I Gag SOMOL ni Th’abi Tolang e gu be yog ngomed ni gag e bay ggay e saf rog nggu ayuwegrad 12 ni rogon ni ayuweg ba tagafaliy e saf e saf rok nra weargad miyad sul nga ta’bang bayay. Yungi n’en nra weargad ngay ko fa rofen ni yib e gafgow nrib gel e bay gu wan gu fulwegrad riy. 13 Bay gu wan ko pi nam i yan nggu kunuyrad nggu fulwegrad ko nam rorad. Mu ug duruw’iyrad u daken e pi burey nu Israel, ngu to’oben e pi lul’, ngu urngin yang ni be par e girdi’ riy. 14 Bay gu gagiyeg nagrad ngu’ur ked e pan ko yungi n’en ni bay e pan riy u daken e pi burey ngu lan e pi loway ndabi buch ban’en rorad, ngu urngin yang ni bay e pan riy nib galunglung u lan e nam nu Israel. 15 I gag e bay ug gafaliy e saf rog, bay gu pir’eg bang ni ngar toffangad riy. I Gag SOMOL ni Th’abi Tolang e kugog e pi thin ney.

16 “Bay gu changarnag e pi arorad nike malboch, mu gu fulweg e tin be sor ngabang, mu gu taflaynag e tin ke maad’ad, mug golnag e tin ke m’ar; machane tin sugsug ma yad ba gel e bay gu thangrad, ni bochan e gag ba tagafal saf ni n’en ni ba yal’uw e gu ma rin’.

17 “Ere gimed e ran’ i gamanman rog nir, I Gag SOMOL ni Th’abi Tolang e gu be weliy ngomed nra bigmed ma bay gu pufthinnag mu gu ki’eg e tin ni bfel’ u fithik’ e tin kireb, ni nggu ki’eg e saf u fithik’ e kaming. 18 Boch i gimed e dar fel’ u wan’rad e pan nth’abi fel’ ni yad be kay; gimed be yot’yot’ nga but’ e tin ndamur ked! Gimed be unum e ran nib machalbog mi gimed pug e aer ko tin damur unumed. 19 Ma tin kabay e saf rog e yad e thingar ra ked e pi pan ni mot’ed nga but’ miyad unum e ran ni kam puged e aer riy.

20 “Ere chiney e Gag SOMOL ni Th’abi Tolang e gu be yog ngomed ni bay gu turguy e n’en ni nggu rin’ ngomed e tin ba gel e saf nge tin ba me’waer. 21 Tin nib m’ar e kam thuruyed yad nga orel kar chuwgad u fithik’med. 22 Machane bay gu leag e saf rog ma dab kug pagrad ngu’un gafgow nagrad. Bayi reb e saf rog mu gu turguy e n’en ni nggu rin’ ngak, ma aram mu gu ki’eg e tin ni bfel’ u fithik’ e tin nib kireb. 23 Bay gu pi’ ngorad ba pilung ni bod e tapigpig rog i David nge par ni go’ ir e ngi i gafaliyrad, ma bay i ayuwegrad. 24 I Gag SOMOL e bay gu mang Got rorad, ma ba pilung ni bod e tapigpig rog i David e bay i par ni ir e be gagiyeg nagrad. I gag e gog e pi thin ney. 25 Bay gu ngongliy reb e m’ag u thilmad ni ir e bayi micheg ngorad ni dabki buch ban’en rorad. Bay gu chuweg ko nam rorad urngin e gamanman nra i maad’ad ngorad, ni fan e nge yag ni par e saf rog u daken e ted ma yad be mol u fithik’ e gerger ni dabki buch ban’en rorad.

26 “Bay gu tow’ath nagrad mu gu tayrad ngu’ur pired ni kar liyeged fare burey rog nib thothup. Nu rom e bay gu tow’ath nagrad riy ko n’uw u nap’an nike t’uf rorad. 27 Ma bay i k’uf e gek’iy, ma be yib e ggan ko woldug, mra be’ ma be par ko girok’ e binaw ndabki buch ban’en rok. Ngiyal’ ni gu ra luf e chen ko girdi’ rog ngar chuwgad u tan pa’ e pi’in ni ka ra tedyad ni sib, ma aram e bay ra nanged ni Gag SOMOL. 28 Pi nam ndar nanged Got e dabkur giliw niged yad bi’id, ma dabki li’rad e gamanman ni malboch ngar longuyedrad. Bay ur pired ndabki buch ban’en rorad, ma dakuriy be’ ni ku ra k’aring e marus ngorad. 29 Bay gu pi’ e flang nib yong’ol butan ngorad ma dabkug pag e uyngol ngeb ko fare nam. Ma pi nam e dabkur moning nigedrad bi’id. 30 Urngin e girdi’ ni bay ra nanged ni gag e gu be yoror rok piyu Israel ma yad e girdi’ rog. I Gag SOMOL ni Th’abi Tolang e kugog e pi thin ney.

31 “Gimed e saf rog, ni fare ran’ i saf ni gu ma duruw’iy, e gimed e girdi’ rog, me Gag e Got romed,” I SOMOL ni Th’abi Tolang e be non.

<- EZEKIEL 33EZEKIEL 35 ->