EZEKIEL 31

Yu Egypt nni ta’rebnag rogon ko gek’iy ni cedar

1 U lan e bin m’on e rran ko pul ni dalip ko re duw ni ragag nge ta’reb ni gamad ba kalbus, me non SOMOL ngog. 2 Ni ga’ar, “Fak e girdi’, mog ko pilung nu Egypt nge girdi’ rok:

Uw fani gel gelngim!

Mang e gu ra ta’reb nagem ngay?

3 Ga bod e gek’iy ni cedar u Lebanon,

Nrib fel’usun nib taglul’ papa’ngin,

Nib ke gek’iy nib n’uw nike tun ko manileng.

4 Bay e ran ni be ilalnag,

Ma pi lul’ ni be yan u tan e but’ e be durwi’iy.

Yad be tarannag e gin bay fare ke gek’iy riy

Ma yad be pi’ e ran be yan nga urngin kaen e gek’iy u lan e loway.

5 Bochan e rib fel’ rogon ni be fek e ran,

Me ilal nge n’uw nib tolang ngak urngin kaen e gek’iy.

Ma rib dib’ag papa’ngin mab nun’uw.

6 Gubin mit e arche’ nrabad ra toyed tafen pifakrad nga papa’ngin,

Gamanman ni malboch e rabad ra gargeleged pifakrad nga tanggin.

Pi nam nu fayleng e urgifgad ko taglul’ riy.

7 Rib fel’ ya’an fare ke gek’iy —

Ya rib n’uw kaen, ma rib nun’uw papa’ngin.

Likngin e ke yan nga’ar kedad ko ran u tan e but’.

8 Dariy e gek’iy ni cedar u milay rok Got nra ta’reb rogon ngay.

Dariy e gek’iy ni fir aramrogon papa’ngin,

Ma dariy e gek’iy ni sycamore ni aramrogon pa’ngin.

Dariy e gek’iy u milay’ rok Got ni aram fani fel’ ya’an.

9 Kug ngongliy ni bfel’usun nib yo’or papa’ngin nike gerer.

Gubin e gek’iy nu Eden u milay’ rok Got nike awan’ ngay.

10 “Aram e ba’aray e n’en ni be yog SOMOL ni Th’abi Tolang, nganog ngom e n’en ni bayi buch ko fare ke gek’iy nike ga’ ke tun ko manileng. I tugul nge n’uw me ilal e ufanthin rok; 11 ma aram mug dabuy mug pag nga pa’ ba tagagiyeg nu bang. Ni nge pi’ ko re ke gek’iy nem puluwon e kireb rok ngak. 12 Pi milekag nib kireb e leam rorad e ra th’eth’abed nga but’ miyad digey. Papa’ngin nge yochpa’ i tmal’gin e bayi mul nga daken urngin e burey nge loway u lan e nam. Urngin e nam ni ku’ur pired ko taglul’ riy e bay rchuwgad. 13 Arche’ e bay i yib i toffan ko fare ke gek’iy nike thig ma gamanman ni malboch e bay u ranod u daken papa’ngin. 14 Are chiney i yan ngaram e dakriy ba kaen e gek’iy, ni demturug fani yo’or e ran riy, nrayag ni n’uw nge ta’reb n’umngin ngay bayay ara yan tamal’ingin nge tun ko manileng ni aram fani tolang. Urngin kaen e gek’iy nike riya’ ni nge yim’ ni bod e girdi’, kar riya’gad ni ngar uned ko pi’in ni nge yan nga’ar ko fayleng ko yam’.”

15 Irera’ e n’en ni be yog SOMOL ni Th’abi Tolang ni be ga’ar: “Rofen nem nap’an nra yan fare ke gek’iy ko fayleng ko yam’, e bay gu gagiyegnag e ran u tan e but’ nge tharay ni pow ko meyor ni m’ingan’. Bay gu taleg e lul’ ni dab kug pag e ran ko yoch pa’ i lul’ nge yan. Ni bochan e fare ke gek’iy e ke yim’, ma bay gu lumornag daken e burey nu Lebanon mug gagiyegnag gubin kaen e gek’iy u loway nge mororay. 16 Nap’an ni gu ra yin’ fare ke gek’iy nga’ar ko fayleng ko yam’, ma lingan nra aw nga but’ e ra rur e pi nam riy. Urngin e gek’iy nu Eden nge urngin e gek’iy ni bfel’ rogon e ran riy u Lebanon nike yan ko bin nu ar e fayleng, e ra felan’rad ngak ko mul nike tay. 17 Yad ra un ngak nga’ar ko fare fayleng ko yam’ ni ngar cheaggad ko pi’in kar mulgad. Ma urngin e pi’in ur pired u tan e taglul’ riy e bay ra weargad u gubin e nam.

18 Fare ke gek’iy e aram fare pilung nu Egypt nge urngin e girdi’ rok. Dariy baken e gek’iy u Eden ni aram fani n’uw ni bfel’ ya’an. Ma chiney e ke bod ya’an e gek’iy nu Eden, bayi yan nga’ar ko fare fayleng ko yam’ nge cheag ko pi’in tadenen nge pi’in li’rad ko mael. I Gag e gu be non i Gag SOMOL ni Th’abi Tolang.”

<- EZEKIEL 30 EZEKIEL 32 ->