1 Me ga’ar SOMOL ngak Moses, “Arme nggu gagiyegnag ngam par ni kambod Got u puluwon Farao, ma walagem i Aron e bayi welthin ngak ni bod ba profet rom. 2 Mog ngak Aron urngin e tin kugog ngom, me ir e bayi weliy ngak fare pilung ni nge pag piyu Israel ngar chuwgad ko nam rok. 3-4 Ma bay gu gelnag laniyan’ fare pilung, ni dabi motoyil ngom, ni demturrug feni elmarin bogi ban’en ni gu be bucheg u lan yu Egypt. Ma aram e bay gu pi’ e gechig nib gel nga daken yu Egypt mu gu gafaliy e pi ganong ko girdi’ rog nga wuru’ e re nam nem.[a] 5 Ngiyal’ i n’en ni gu ra pug pa’ag ngalang ni nge togopluw ngorad mu gu fek piyu Israel nga wuru’ fare nam, ma aram e bayi nang yu Egypt ni Gag fare SOMOL.” 6 Moses nge Aron e rrin’ew e n’en ke tay SOMOL chiylen ngorow. 7 Moses e 80 e duw yangren, mi Aron e 83 ko ngiyal’ nra welthingow riy ngak Farao ni pilung.
19 Me ga’ar SOMOL ngak Moses, “Mog ngak Aron nge fek fa ley i sog rok nge k’iyag nga daken urngin e yupa’ i lul’, nge wol’ e ran ni ka ni ker, nge pi lupath u lan yu Egypt. Ya bayi ngal’ e ran riy ni racha’, ma gubin yang u daken e nam ni bayi par e racha’ riy, ni mus nga fithik’ e gek’iy nge pi alublub ni be yib e ran riy u fithik’ e war ngalang.”
20 Me rin’ Moses nge Aron ni bod rogon nike yog SOMOL ngorow. Me pug Aron e sog rok ngalang nge toy nga daken e ran u lan e lul’ u p’eowchen fare pilung nge pi tolang ni bay u tan pa’, ma urngin e ran ni bay u lan fare lul’ e pig nge ngal’ ni racha’. 21 Me yim’ e nig ni bay u lan e lul’, me kireb bon ndakiyag ni nge unum piyu Egypt e ran ni ba’ riy. Me par ni gubin yang e ran nu Egypt nike ngal’ ni racha’. 22 Ma pi tapig u Egypt e ra piggad miyad rin’ ni aram rogon me yog rorad, fin aram e ri gelnag fare pilung laniyan’. Ma de fol ko thin rok Moses nge Aron, nri bod rogon ni fa’ani yog SOMOL. 23 Me cheal Farao nge sul nga tafen, ndariy fan u wan’ e n’en nike rin’ e ran. 24 Ma urngin piyu Egypt nra kired e low u to’oben e lul’ ni fan ko ran ni nga ni unum, ya dabkiyag ni ngar unumed e ran u lan e lul’.
25 Me yan medlip e rran nga tomuren e ngiyal’ ni ba’aram ni gad SOMOL pa’ ko ran.
<- EXODUS 6EXODUS 8 ->