1 Me yan i rofen ni gaman e dalip fen ngay nike pag Ester e abich me yon’ ba mad nib n’uw ni madan e
Queen me yan i sak’iy ngalan e yoror ko naun rok fare pilung nib sap ko fare senggil ni bay e chiya ntagil’ e en pilung riy. Ma bay fare pilung u lan fare senggil nike par u daken fare chiya ntagil’ e pilung, nib changar nga langan e mab nga wean.
2 Nap’an ni guy fare pilung i Ester ni
Queen nib sak’iy u wean, mri felan’ nike guy, me foleg fare sog rok ngak nib gol. Me yib Ester i yib ngeb i math nga tabanggin fare sog.
3 Me fith fare pilung Ester ni ga’ar, “Ester ni
Queen, mang e kamubnag? Mog ngog e n’en ni ga ba’adag mu gu pi’ ngom, ni mus nga balay gil’ilungug ma gu ra pi’ ngom.”
4 Me fulweg Ester ni ga’ar, “Fa’anra ba m’ag u wun’um i gur e en Pilung, ma gu ba’adag ni ngambow Haman e nep’ ney nga ba madnom ni gu be ngongliy rogon ni fenmew.”
5 Ma aram me yog fare pilung ni nge yib Haman ni papey, ya ke pining row Ester nga ba madnom. Aram me yan fare pilung nge Haman ko fare madnom nike ngongliy Ester rogon. 6 Ma nap’an ni yad be unum e wayin me fith fare pilung Ester ni ga’ar, “Mog ngog ko mang e ga ba’adag, mu gu pi’ ngom. Maray rom e gu ra tay nga tagil’, ni mus ni fa’an ga ra ning baley u gil’ilungug.”
7 Me fulweg Ester ni ga’ar, 8 “Fa’anra ri gab gol i gur Pilung ni ngam pi’ ngog e n’en ni nggu maraynag, me’ere gu ba’adag ni ngkug piningem nge Haman gabul nga reb e mur ni bay gu fal’eg rogon ni fenmew. Ma aram e ngiyal’ ni bay gog ngom e n’en ni gu ba’adag.”
9 Nap’an ni m’ay fare madnom me yan Haman ni ka ri felan’ ma ke uf. Machane yug nap’an ni guy Mordekai u langan e garog u tafen e pilung nde sak’iy nge tayfan u nap’an ni yib u charen nge yan mri damumuw Haman ngak nib gel.
10 Machane me guman’nag ir nge yan nga tafen. Ma aram me pining e pi fager rok nga tabnaw rok me yog ngak i Zeresh ni le’engin nge un ngorad ko mu’ulung.
11 Me par ngi i ufan sorok nga feni fel’ rogon, nge feni yo’or e pagel ni fak, nge rogon nike tolangnag e en pilung ko liw rok, nge feni rib ga’ fan u fithik’ urngin e pi tolang u tan pa’ e en pilung.
12 Miki ul ul ngay ni be ga’ar, “Ma gathi kemus ya Ester ni
Queen e ki piningmow e en pilung nga ku reb e madnom gabul.
13 Machane ri dariy ta’reb e pin’ey ni be fel’ u wun’ug, u n’umngin nap’an ni gu be guy e re
Jew nem i Mordekai ni be yumum’ u langan e garog u tafen e pilung.”
14 Ma aram e ba’aray e n’en ni yog le’engin nge pi tafager rok ngak, “Mangfan ndab mog ngan chamey ba fen e mo’ochol, ni medlip i ragag nge lal e fit tolngin? Me gabul ni kadbul ma gog ngak fare pilung ngan uchuluy Mordekai riy, ngemu’ ma ga yan ko mur ni ga ba felfelan’.”
