1 I gag e cha’ ni kug kalbus ni bochan e gu be pigpig ngak Somol, e ri gu be wenig ngomed ni ngi i par ngongolmed ko fare fol ni kem’ay i tay rok Got ko fa ngiyal’ ni piningmed riy. 2 Mu pired nib sobut’an’med, ma gimed ba sumunguy, ma ba gum’an’med ni gubin ngiyal’. Nge bigimed mi i ayuweg bigimed ko me’waer rok u fithik’ e runguy. 3 Mu athamgiliyed ngu’um pired ni gimed ta’ab girdi’ ni fare Kan Nthothup e ke pi’ ngomed u daken fare gapas ni ir e ke m’agmed nga ta’bang. 4 Ya ta’reb e dowef ni bay ma ta’reb e Kan Nthothup, ni bod rogon nri ta’reb e pagan’ ni bay ni ir e ke piningmed Got ngay. 5 Ya ta’reb e Somol ni bay, ma go ir e ke mich u wun’dad, ma ta’reb e tawfe; 6 ma ri ta’reb e Got ni bay ni ir e Chitamangidad ni gadad gubin, ni ir e Somol rodad ni gadad gubin, ma be maruwel u pa’dad ni gadad gubin, ma bay u fithik’dad ni gadad gubin.
7 Ra bagadad ma kan pi’ e tow’ath rok ni aram e n’en nib salap fa’anem riy, ni bod rogon nike pi’ Kristus ngak. 8 Ni bod rogon ni be yog e babyor nib thothup ni be ga’ar:
“Fa’ani yan ngalang ko gin nth’abi tolang,
ma bo’or e girdi’ ni fekdad ni ngar uned ngak ni bod rogon e girdi’ nni kol ko mael;
ke tow’athnag e girdi’.”
9 Re bugithin ney “nike yan ngalang” e mangfan? Fan e re bugithin ney e som’on e yan nga’ar — ni aram e yan ko gin nth’abi to’ar u fithik’ e fayleng.*ko gin nth’abi to’ar u fithik’ e fayleng; ara gin th’abi to’ar, ko fayleng.10 Ere en ni yan nga’ar e ku eram e cha’ ni yan ngalang nge pag urngin e tharmiy, ni nge suguy lanelang nge urngin ban’en ni bay u lanelang nib mu’un e fayleng ngay. 11 I ir e en ni “tow’athnag e girdi’ ”, nra be’ ma n’en nib salap riy, me turguy boch ni ngar manged apostel, ma boch e turguy ni ngar manged profet, ma boch e turguy ni ngar machib niged ngak e girdi’ fare Thin Ni Bfel’, ma boch e turguy ni ngar manged pastor ma ngar filed fan e thin rok Got ngak e girdi’. 12 I rin’ e ren’ey ni nge ngongliy rogon urngin e girdi’ rok Got ngar pigpiggad ngak Got ni aram e maruwel rok girdi’en Kristus, miyad ayuweg girdi’en e dowef rok Kristus ngar ilalgad i yan. 13 Ere gadad gubin ni bay dabad nga ta’bang ngad ta’ab girdi’gad u daken e michan’ rodad ngak Fak Got nge murung’agen ni kadnanged; ma aram ma gadad ilal i yan nge mus rogodad ngad boded mam’ungun Kristus. 14 Ma aram e dab kud pired ni gadad bod e bitir, ni be fekdad e n’ew i yan, ma be fekdad e nifeng i yan ni gubin yay nra n’ag e nifeng gil’, ni aram e machib rok e girdi’ ni yad be bannag e girdi’, ni pi’in yad be pow’iy boch e girdi’ ko tin gathi ir ko ban ni kar ngongliyed rogon. 15 Machane ra ud weliyed e tin nib riyul’ u fithik’ e t’ufeg, ma gadad ra ilal u gubin e kanawo’ ngad boded mam’ungun Kristus, ni ir e llug. 16 Urngin yang ko re dowef nem ma ke peth nga ta’bang nrogon nike gagiyegnag, ma re dowef nem e be par nib chayem ni urngin e ul ul ni kan tay ngay e ir e be kol. Ere fa’anra bang me maruwel nrogon ni nge maruwel, ma aram mi i ilal fare dowef ma be ga’nag ir i yan u daken e t’ufeg.
Wok nib be’ech u fithik’ Kristus
17 U fithingan Somol e nggog e re bugithin ni ba’aray riy ma ri gu be ning chiylen ngomed ni be lungug: dab ku um ngongolgad ni bod rogon e pi’in ndar nanged Got, ni tin yad be leamnag e dabi yib fan, 18 ma be par lanin’rad u fithik’ e lumor. Dawori yag ngorad e bin nma pi’ Got e wok, ni fan e dar nanged ma yad ba gelan’. 19 Ma dakurir tamra’gad; ma kar paged yad nga pa’ e kireb, ma yad be ngongliy urngin mit e puwlag ndakir yag ni ngar taleged yad riy.
20 Ma gathi ireyer e n’en ni kam filed u murung’agen Kristus! 21 Ya kari mu rung’aged murung’agen, ma gimed e gimed girdi’en, ere kan fil ngomed e tin nib riyul’ e thin ni ir e ba’ rok Jesus. 22 Ere mu n’iged pangimed ni kakrom ni ir e um pired riy — ni fare pangin ni kakrom ni ar ar nib kireb e bannag nge kirebnag. 23 Gum’ircha’med nge lanin’med e thangri pig ni polo’ nge be’ech. 24 Thingar mon’ed nga dakenmed e bin nib be’ech i gimed ni bod rogon e munmad, ni bin nib be’ech i gimed ni Got e sunumeg ni bod ir, ma ke gagiyel u daken e bin riyul’ e wok nib yal’uw ma bmat’aw nike yag ngomed.
25 Ere dab ku un lifith l’uguney! Ra be’ ma thangri yog e tin nib riyul’ ngak walagen, ya gadad gubin ni go’ gadad yu yang u downgin Kristus. 26 Fa’anra mu damumuwgad, ma dab mpaged e damumuw romed nge fekmed nga fithik’ e denen; ma dab mpired ni gimed ba damumuw nge polo’ reb e rran. 27 Dab mu binged e kanawo’ ngak mo’onyan’. 28 Cha’ ni be moro’ro’ e nge tal ko moro’ro’ nge tabab ko maruwel nge thognag e salpiy ni fan ko par rok, nge yag ni ayuweg e pi’in gafgow. 29 Dab umogned e thin nib kireb ku be’. Kemus ni thin nra ayuweg be’ e ngu u mogned, ni fa mit nem e thin nma fonownag e girdi’ me yib fan ngorad, fan e tin ni ngmogned e nge rin’ e tin ni bfel’ ban’en ngak e pi’in kar motoyilgad ngomed. 30 Ma dab mu kireb niged laniyan’ fare Kan Nthothup rok Got; ya Kan Nthothup e ireram e pow rok Got nike tay ngomed nike suweymed, ni aram e mich riy ni bay reb e Rran ni bayi taw ngay me ri pithigmed Got rok e denen. 31 Mu n’iged fan u wun’med urngin ban’en nib kireb nike aw nga lanin’med, nge tin kam dabuyed rok be’, ma dab ku um damumuwgad. Dab ku um tolulgad ngak be’ u fithik’ e damumuw ara umogned e thin nib kireb ngak be’! Dab ku um fanenikayed be’! 32 Machane um golgad ngomed, me bigimed me munguy ngak bigimed, mu um n’iged fan u wun’med e tin nib kireb nike rin’ bigimed ngak bigimed, ni bod rogon Got ni bochan Kristus ma aram fan nike n’ag fan u wan’ e kireb ni kam rin’ed.
