1 Ku gguy nu lan e re fayleng ney e bay ban’en riy ni de mat’aw ni ka ni ngongliy. 2 I Got e ra pi’ ngak be’ e fla’ab, nge liw, nge binaw, nge urngin e tin ba’adag, machane dabi pag nge felfelan’ ngay. Yug be’ nde nang e ra felfelan’ riy. Bm’ayfan ma de mat’aw. 3 Rayag ni nge fakay be’ ra’ay e bitir, me par nib n’uw nap’an, ma demturug feni n’uw nap’an ni par nib fos, ma fa’anra de yag ngak e birok e f’oth ko felfelan’ ma de fel’ rogon e gum’eyag nni tay ngak, me’ere gag e nggog ni kabfel’ be’ nib bitir nni gargaleg ma bayam’. 4 De fel’ ko re tir nem ni ngan gargaleg; me thimur nga fithik’ e lumor, ko gin kan pag talin. 5 De guy e tamilang u reb e rran ara ri’ lamen e yafos, machane gil’og ma ke pir’eg e toffan 6 ni bfel’ boch ngak fa’anem nde pir’eg e felfelan’ u lan e yafos rok, ni manga ki par nge gaman 2000 e duw. Bin rriyul’ riy e yow l’agruw ma ta’ab yang i n’en e ngranow ngay.

7 Gadad ma rin’ e maruwel rodad ni kemus ni nge yag ban’en ni ngad ked, machane der gaman. 8 Bu uw rogon ni bfel’ boch e en ni ba gonop ko en nib bbalyang? Mang bfel’ riy ko en nib gafgow ni nge nang rogon ni ngi i par ko re tamilang ney. 9 Rib m’ayfan; bod ni yibe lol’oeg e nifeng. Kabfel’ ni nge fel’ u wan’um e tin bay rom ko bin ni gubin ngiyal’ ni ngu’um finey e tin dariy rom.

10 Gubin e tin ke buch ma kan mu’ i duwgiliy ni kakrom, ma gadad gubin ni gadad manang ni dabiyag ni nge togopluw be’ ngak be’ nib gel rok. 11 Ra i n’uw nap’an ni ga be tugthin, ma aram feni ri be m’ayfan ni dariy gam’ingin ngom. 12 Bu uw rogon me nang be’ e n’en nib th’abi fel’ ngodad ko chi yafos rodad ney nib ngoch, ma ba m’ayfan, ni ba yafos ni be thimur ni bod fon ban’en. Uw rogon ma gadad nang ko mang e bayi buch u fayleng u tomuren ni kadm’ad?