1 Me ga’ar Moses ngak e girdi’ nu Israel, “Ngu’um folgad u urngin e pi motochiyel ni ba’aray ni nggu fil ngomed, ni ngu’um pired ni dabi buch ban’en romed, mi gimed par u lan fare nam ni SOMOL ni Got rok pi chitamangimed e bayi pi’ ngomed. 2 Dab mu puthuyed ban’en ko tin nggu taychilen ngomed ni ngu’um rin’ed, ma dab mu lufed ban’en riy. Ngu’um folgad ko thin rok SOMOL ni Got romed ni fa’an ku gu pi’ ngomed.[a] 3 Gimed e mu guyed nga owchemed e n’en ni rin’ SOMOL u burey ni Peor. I thang owchen e pi’in ni ur ted fan Baal u rom.[b] 4 Machane gimed e pi’in ni mu pared nigmed ba yul’yul’ ngak SOMOL ni Got romed e kigmed ba fos e daba’.

5 “Kug fil ngomed urngin fapi motochiyel nrogon ni yog SOMOL ni Got rog ngog ni nggu fil ngomed. Ngu’um folgad riy u lan e re nam ni ba’aram ni ngam koled ngam pired riy. 6 Ngar mu ted u gil’ e pi motochiyel nem, ya ra aram rogon ma ra guy e pi nam fanmed gonop nge feni tamilangan’med. Yad ra rung’ag murung’agen urngin e pi motochiyel ney mra lungurad, ‘Dakuriy girdi’en reb e nam ni bod feni gonop nge feni tamilangan’ girdi’en e re nam ney nib sorok!’

7 “Dariy reb e nam ngabang, ndemturug feni sorok nma chichir e birok e kan ngak ni bod rogon SOMOL ni Got rodad nma chichir ngodad ko ngiyal’ ni gadad ra wenig ngak ni nge ayuwegdad. 8 Dariy reb e nam u bang nib sorok ni bay e motochiyel rok ni bod feni yal’uw e tiney e motochiyel ni kug fil ngomed e daba’. 9 Ngar mu ayuwgad! Ngar mu guyed rogon nge dab mpaged talin e tin kam guyed nga owchemed. Mu guyed rogon nge dabi m’ay u wun’med u n’umngin nap’an e yafos romed. Ngu’um weliyed ngak pifakmed nge pifak pifakmed 10 fa rofen ni fa’an mu sak’iygad u p’eowchen SOMOL ni Got romed ko burey ni Sinai, me ga’ar SOMOL ngog, ‘Mog nge mu’ulung e girdi’ nga p’eowcheg, ngar rung’aged lamag ni nggu welthin ngorad, miyad nang ni ngu’ur pired ni bay madgug u wun’rad u n’umngin nap’an e yafos rorad, miyad fil ngak pifakrad ni ngu’ur pired ni bay madgug u wun’rad.’

11 “Ngu’um weliyed ngorad rogon nim marod mu sak’iygad nga enggin e burey. Ma be gak’ fare burey ni be yan e daramram riy u fithik’ e ath nib dib’ag ma ba talumor nge yan i tun ngalang. 12 Ngu’um weliyed ngorad rogon ni par SOMOL u fithik’ e re nifiy nem nge welthin ngomed, nge rogon ni um rung’aged laman ni be non, machane damur guyed. 13 Me weliy ngomed e n’en nthingar um rin’ed mu’um ted u gil’ fare m’ag ni ngongliy u thilmed, ni aram e ngu’um folgad ko fa Ragag i Motochiyel, ni yoloy nga daken l’agruw yang i malang. 14 I SOMOL e weliy ngog ni nggu fil ngomed urngin fapi motochiyel ni ngu’um folgad riy u lan e re nam ni dabki n’uw nap’an mi gimed yan ngay ngam koled ngam tafned.

15 “Nap’an ni non SOMOL ngomed u fithik’ fare nifiy ko Burey ni Sinai, ma dam guyed fon be’, ere ngam kol ayuwgad ngam micheged 16 ni dab mu denengad ngam ngongliyed ba liyos ni demturug e re ya’an ni mu ngongliyed riy ko ya’an be’ nib mo’on fa be’ ni bpin, 17 fa gamanman fa arche’ 18 fa gamanman nma goraraw u but’ ara nig. 19 Gimed ra sap ngalang ni mu guyed e pin’en nib sug riy, ni aram e yal’ nge pul nge t’uf, ma ngam guyed rogon nge dab mu ted fan ara mu meybilgad ngay. Ya SOMOL ni Got romed e ke pi’ e tiney ngak yugu boch e nam u gubin yang yad be tayfan, 20 ma gimed e ke chuwegmed Got u lan yu Egypt ni fare tafen e nifiy nma rannag e wasay, ni fan e ngam manged girdi’en, ni bod rogon e chiney. 21 Me damumuw SOMOL ngog ni bochmed, nge taychilen ngog ni dab kug th’ab e Jordan nga ba’ nem nggu wan ngalan e re nam nem ni bfel’ ni SOMOL ni Got romed e nge pi’ ngomed. 22 Thingar gum’ u lan e biney e nam ni dab gu th’ab e Jordan nga ba’ nem, ma gimed e dabki n’uw nap’an mi gimed th’ab nga ba’ nem ngam feked e re nam nem ni bfel’ ngam tafned. 23 Ngam ayuwgad nge dab mu paged talin fare m’ag ni SOMOL ni Got romed e ke ngongliy u thilmed nge ir. Dariy bmit e liyos ni ngam ngongliyed ni bochan e keyog SOMOL ni Got romed ni dab mu rin’ed, 24 ya SOMOL ni Got romed e bod ba nifiy ni be daramram. Dabun yug reb e kan ni nge tagenging ngak.[c]

25 “Yug ra kam pired u lan e re nam nem nike n’uw nap’an nike yib pifakmed nge fak pifakrad, ma dab mu denengad ngam ngongliyed ba liyos ni demturug ko ya’an e mang. Biney e rib kireb u mit SOMOL, mra k’aring e damumuw ngak. 26 Fa’anra dab mu folgad rog, ma gu be pining e tharmiy nge fayleng e daba’ ngar mangew mich nib togopluw ngomed, ni dabi n’uw nap’an min thang owchamed u daken e re nam nem. Ma, re nam nem u ba’ nem e Jordan ni aray e ngam marod mpired ngay e, dabi n’uw napmed riy. Ya bay ni thirifmed u but’. 27 I SOMOL e ra weregmed ko pi nam i yan, ri’in i gimed e ra magach nib fos. 28 Ni aram e yungi n’en ni bay um pigpiggad ko pi got ni girdi’ e ngongliy nga pa’, ni bogi got nni ngongliy ko ren fa malang, ndabiyag ni nge guy fa rung’ag fa kay ban’en ara faray bon ban’en. 29 U rom e bay um changar niged SOMOL ni Got romed riy; fa’an gimed ra gaweg u polo’ i gum’ircha’med ngu polo’ i lanin’med ma gimed ra pir’eg. 30 Nap’an ni gimed ra aw nga fithik’ e gafgow ko pin’ey nike buch romed, ma tomuren e gimed ra sul ngak SOMOL ni Got romed ngam folgad rok. 31 I SOMOL ni Got romed e ba Got ko runguy. Dabi n’agmed fa thang owchemed. Ya dabi pag talin fare m’ag ni ngongliy u thilin pi chitamangimed nge ir.

32 “Mu sulod ngam gayed murung’agen e kakrom, ni tin ba’aram e rran ndawor ni gargelegmed, ni tabab ko fa ngiyal’ ni ba’aram ni sunumeg Got e girdi’ u daken e fayleng; mu gayed u ga’ngin yang e fayleng. Ka’a m’ug ban’en ni yira ngat ngay ni aram rogon? Ka e rung’ag be’ murung’agen ban’en ni ara’ rogon? 33 Gur bay girdi’en ba nam ni ka’ar rung’aged laman ba got ni be non u fithik’ e nifiy ngorad ni bod rogomed ma kayad be par ni yad bfos? 34 Ka’ e yigi yan reb e got i fek e girdi’ u reb e nam ngar manged girdi’ rok, ni bod ni rin’ SOMOL ni Got romed ngomed u lan e nam nu Egypt? U p’eowchemed e maruwel Got riy nga gelngin nib gel nge yib e gafgow nge mael, me ngongliy e maang’ang nge tin yira ngat ngay, me k’aring boch ban’en nge yib ni ba gel e marus riy. 35 I SOMOL e dag urngin e pin’ey ngomed ya ngam nanged ni kemus ni ir e Got ni bay ma dakuriy yug reb ngabang.[d] 36 I gagiyegnag nge yib laman u tharmiy ngomed ni fan e nge fonow nagmed ngam yal’uwgad, mu daken e fayleng e gagiyeg nagmed riy ngam guyed fare nifiy rok nib thothup, me par u fithik’ nge non ngomed. 37 Ba t’uf pi chitamangimed rok me mel’eg e pi’in ni owcherad u fithik’ e girdi’ ni nge mang e tirok e girdi’, ma gelngin nrib gel e maruwel ngay nge fekmed nga wuru’ yu Egypt, 38 me tuluf girdi’en e pi nam ni ba ga’ ma ba gel ngomed, ni fan e nge yag ni mmarod ngalan e nam rorad nge pi’ nga pa’med, ni nge par ni tafenmed nge mada’ ko daba’. 39 Ere chiney e kari mu nanged ni SOMOL e ir e Got nu tharmiy ngu fayleng, ma dakuriy yugu reb e Got nga bang. Ngu’um ted e pin’ey u lanin’med ma dab mu paged talin. 40 Um folgad u urngin e pi motochiyel rok ni kug pi’ ngomed e daba’, ma aram e gimed nge pi’in ni bay ra bad ni owchemed e yugu bay um pired ni bfel’ rogomed mu’um pired u lan e re nam nem ni SOMOL ni Got romed e nge pi’ ngomed ngam tafnayed ni dariy n’umngin nap’an.”

41 Me fael Moses dalip e binaw ngabang ni bay ko ngek ko fare Lul’ ni Jordan.[e] 42 Ni nge chey ni kal be’ nge thang e fan rok be’ ni gathi to’ogor rok, mrayag ni mil nge yan nga langgin reb e pi binaw ney ma dab ni thang e fan rok. 43 Binaw nu Bezer e tagil’ e ayuw rok e ganong rok Ruben, ni bang i ted ni desert; ma binaw nu Ramoth e fan ko ganong rok Gad, ni bay ko gin ba milsuwon ngak e Gilead; ma binaw nu Golan e fan ko fare ganong rok Manasseh, ni bay ko gin ba milsuwon ngak Bashan.

44 I Moses e pi’ e pi motochiyel rok Got ngak e girdi’ nu Israel. 45-46 Nga tomuren ni karbad nga wuru’ yu Egypt ni yad bay ngalan e loway u ngek ko lul’ nu Jordan, ni bay fare binaw ni Bethpeor nga barba’ riy, me pi’ Moses e pi motochiyel ney ngorad. Gin’ey e immoy ko gin ba milsuwon ngak Sihon ni Pilung ko Amorite, ni ir e i gagiyeg u lan fachi binaw nu Heshbon. I Moses nge girdi’ nu Israel e ra gelgad ngak u nap’an nra chuwgad u Egypt. 47 Miyad kol e binaw rok ngar pired ngay nge fare binaw rok Og ni Pilung nu Bashan, ni fa binem e pilung ni i par ko ngek u Jordan. 48 Regi binaw ney e tabab ko fare binaw nu Aroer, u thathren e lul’ ni Arnon, me yan ko lel’och nge mada’ ko fare burey ni Sirion, (ni ku yima yog e Burey ni Hermon ngay.) 49 Ki un ngay ga’ngin yang e nug u ba’ ni ngek fare Lul’ nu Jordan nge yan i yan ngalan e yimuch nge mada’ ko Dead Sea me yan ko ngek nge tun nga enggin e burey ni Pisgah.

<- DEUTORONOMY 3DEUTORONOMY 5 ->