1 Me chuw Moses ko tafel’fel’ u Moab nge farthag ko Burey ni Nebo, me yan u rom nge p’ebgul e Burey ni Pisgah ko ngek u Jeriko, ni aram e gin ni dag SOMOL ngak riy ga’ngin yang fare nam ni tabab ko nug nu Gilead nge mada’ ko fachi binaw nu Dan ko lel’och; 2 nge ga’ngin e nug nu Naftali, nge nug nu Efraim ngu Manasseh; nge nug nu Judah nge yan ko day ni Mediterranean ko ngal; 3 nge ley ni yimuch e nug nu Judah; nge fagi tafel’fel ni yan u Zoar nge mada’ nga Jeriko, ni fare binaw ko gek’iy ni palm. 4 Me ga’ar SOMOL ngak Moses, “Irera’ fare nam ni gu micheg ngak Abraham nge Isak nge Jakob ni bay gu pi’ ngak e pi’in ni owcherad. Kug dag ngom, machane dab gu pagem ngam man ngay.”

5 Me yim’ Moses, ni fare tapigpig rok SOMOL u rom u lan e nug nu Moab, ni bod ni yog SOMOL. 6 Me k’eyag SOMOL Moses u lan fare loway nu Moab, ni barba’ riy e fachi binaw nu Bethpeor, machane ke mada’ ko bin daba’ e rran ma dariy be’ ni manang e chigi n’en nni k’eyag riy. 7 Moses e 120 e duw rok ko ngiyal’ ni yim’, ni kayigu chirogon gelngin ma kab m’uth owchen. 8 Me yornag yu Israel Moses ni guyey e rran u daken fa gi tafel’fel nu Moab; nge taw nga nap’an nike m’ay e mowaw rok Moses.

9 Joshua nib mo’on ni fak Nun e ni suguy ko gonop, ya Moses e turguy ni ir e nge yan nga luwan. Yu Israel e ur folgad rok Joshua mu’ur ted u gil e tin keyog SOMOL ngorad u daken Moses.

10 Ka aram nap’an i yib ma dawori sum reb e profet nga Israel ni bod Moses. I SOMOL e i non ngak ni yow ba sabol. 11 Ma dariy yugu reb e profet ni ngongliy e maang’ang nge pin’en ni un ngat ngay ni bod e tin ni l’oeg SOMOL Moses nge ngongliy nib togopluw ngak e pilung nu Egypt nge pi tolang ni bay u tan pa’, nge nam rok ni ga’ngin. 12 Dariy reb e profet ni yag rok ni ngongliy e maang’ang ni ba ga’ nge pin’en nib gel e marus riy ni bod ni rin’ Moses u p’eowchen yu Israel.

<- DEUTORONOMY 33