DEUTORONOMY 2

1 ma yuguda pigichelgad ngad sulod nga daken fa gi desert, ni aram e wo’ ni yan ko Red Sea, ni bod ni yog SOMOL ni ngad rin’ed. Ma ba n’uw nap’an ni ud derawgad u daken e nam nu Edom ni go’ burey.

2 “Aram, me yog SOMOL ngog 3 nike gaman n’umngin nap’an ni kad derawgad u daken e yungi ted nem; ere ngad sorgad ko lel’och. 4 Me yog ngog ni nggu pi’ e pi motochiyel ney ngomed: ‘Aram e ke chugur ni ngam th’abed fa yungi ted ni go’ burey ko fare nam nu Edom, fa gin’en ni tafen boch e girdi’ romed nike palog, ni aram e pi’in owchen Esau. Bay ra rusgad ngomed, 5 machane thangri dab mu tabab niged e mael ngorad, ni bochan e dab gu pi’ ngomed ta’bochyang ko binaw rorad. Ya kug pi’ yu Edom ni nge tafnay e pi’in owchen Esau. 6 Rayag ni ngam chuw’lyed e ggan rorad ngam ked nge ran rorad ngam unumed.’

7 “Ngu’um leam niged rogon nike tow’ath nagmed SOMOL ni Got romed u gubin ban’en ni kam ngongliyed. Ke ayuwegmed u n’umngin nap’an ni kam derawgad u lan e regi ted ney ni desert. De pagmed u lan e re aningeg i ragag i duw ney, go’ i yag ngomed e tin nib t’uf romed.

8 “Ma aram ma gadad chuw ko fare pa’ i kanawo’ ni yan ko fa galoch i binaw nu Elath nge Eziongeber ni yan ko Dead Sea, magdad cheal ko lel’och ni ngek ngad sorgad nga Moab. 9 Me ga’ar SOMOL ngog, ‘Dab mu magawon niged e girdi’ nu Moab, ni pi’in owchen Lot, ara m’aged e mael ngorad. Kug pi’ fare binaw nu Ar ngorad, ma aram e dakriy bang u taferad ni nggu pi’ ngomed.’ ”

( 10 Ba ulung i girdi’ ni kanog e Emim ngorad ni yad ba gel ma yad ba tagyet e ur pired u Ar. Yad ba n’uw ni bod e Anakim ni kub mit i girdi’ nib n’uw ma yad ba tagyet. 11 Ma ku yad bod e Anakim ni ku yima yog ni yad e Refaim; machane piyu Moab e yad ma pining e Emim ngorad. 12 Piyu Hor e u ra pired u Edom. Machane pi’in owchen Esau e ra tulufedrad nga wuru’ e re nam nem; miyad gathay fare nam, nge mang yad e ra pired u rom, ri ku bod rogon ni tuluf yu Israel e pi to’ogor rorad ngar chuwgad u lan fare nam nike pi’ SOMOL ni ngar tafned.)

13 “Ma aram mad th’abed fare Lul’ ni Zered, ni bod rogon ni keyog SOMOL ngodad ni ngad rin’ed. 14 Ngiyal’ i n’ey e ke yan guyey nge meruk e duw ni kad chuwgad u Kadesh Barnea. Ma aram e urngin e pumo’on ni ur uned ko mael ko re mfen nem e go’ karm’ad, ni bod ni yog SOMOL. 15 I SOMOL e par ni be togopluw ngorad nge mada’ ko ngiyal’ nike thirifrad u but’ ni yad gubin.

16 “Tomuren ni go’ karm’ad, 17 me ga’ar SOMOL ngodad, 18 ‘Daba’ e ngam marod u lan e binaw nu Ar ngam th’abed nga barba fare gi nug nu Moab. 19 Ma aram e kam chugurgad nga tafen e Ammonite, ni pi’in owchen Lot. Ma dab mu k’aringed lungrad, fa mu tabab niged e mael nib togopluw ngorad. Ya dab gu pi’ bang ni ngam tafned ko fare nam ni kug pi’ ngorad.’ ”

( 20 Re gin’ey e ku yi manang ni tafen e Refaim, ni aram fithingan e pi girdi’ ni urpired u rom. Machane pi Ammonite e yad ma pining e Zamzummim ngorad. 21 Yad ba n’uw ni bod e pi Anakim. Urmed ni yad bo’or, ma yad ba gel. Machane me thirifrad SOMOL u but’, ya nge yag ni par e pi Ammonite ko re nam nem. 22 Ma ku ireram e n’en niki rin’ SOMOL ni fan ngak piyu Edom, ni pi’in owchen Esau, ni ur pired u lan e nam ni go’ burey u Edom. Ya thirif piyu Hor u but’, me yan yu Edom ngar pired ko fare nam rorad, ni aram e gin ni kayad be par riy e chiney. 23 Ma binaw u p’el’ay ko Mediterranean e ke par e girdi’ ko fare donguch nu Krete ngay. Kar li’ed e pi Avvim ni aram e pi’in nri taferad e re gin’em. Ma kar tafned taferad ni ga’ngin, ni yan ko yimuch nge mada’ ko fare binaw nu Gaza.)

24 “Nga tomuren ni kad th’abed yu Moab nga barba’, me ga’ar SOMOL ngodad, ‘Chiney e mmarod ngam th’abed fare lul’ ni Arnon. Kug pi’ Sihon ni Pilung nu Heshbon ngalan pa’med nib mu’un e nam rok ngay. I ir fare pilung rok e pi Amorite. Mu chamgad ngak mi gimed fek tafen ngam pired ngay. 25 Daba’ i yan ngaram e bay gu tay daguwmed nga lanyan’ e girdi’ u gubin yang. Nap’an ni yira yog fithingimed ma gubin e girdi’ ni bay ra t’on gad ko marus.’

Yu Israel nra gelgad ngak Sihon ni Pilung

(Numbers 21:21–30)

26 “Ma aram mu gu l’oeg e pi tamol’og u daken e ted u Kedemoth ngranod ngak Sihon ni Pilung nu Heshbon, ni kar feked i yan e thin ko gapas, ni ga’ar: 27 ‘Mu pagmad nggu warod u lan e nam rom. Ni dab gu talgad u bang, ma dab gu thum’gad nga wuru’ e wo’. 28 Gamad ra pi’ puluwon e ggan ni gamad ra kay nge ran ni gamad ra unum. Kemus ni n’en ni gamad ba’adag e nggu warod u lane nam rom, 29 nge taw ko ngiyal’ ni kug th’abed fare Lul’ ni Jordan nga daken fare binaw ni bayi pi’ SOMOL ni Got romad ngomad. Pi’in owchen Esau ni yad ma par u Edom, nge piyu Moab ni yad ma par u Ar e ra paged gamad nggu warod u lan taferad.’

30 “Machane de pagdad Sihon ni Pilung ngdarod u lan e nam rok. Ya SOMOL ni Got romed e ke gelnag laniyan’ fare pilung be togopluw. Ni bochan e nge yag ni ngad gelgad ngak ngad tafned tafen ni ir e kagdad be par riy.

31 “Ere ga’ar SOMOL ngog, ‘Amchangar, kug pi’ Sihon ni Pilung nge nam rok ngomed; mu feked e nam rok ngam pired riy ni kam tafned.’ 32 Ma aram me yib Sihon nge urngin e pi salthaw rok ni ngar maelgad ngodad u to’oben fare binaw nu Jahaz. 33 Machane SOMOL ni Got rodad e pi’ Sihon nga pa’dad, ma gadad thang e fan rok, nge pi pumo’on ni fak, nge urngin e pi salthaw rok. 34 Ma ku ireram e ngiyal’ nda koled nga da gatheyed urngin e pi binaw rok, ma gadad thang e pogofan rok urngin e pumo’on, nge ppin, nge bitir. Dariy be’ nda paged ni kabfos. 35 Da feked u fithik’ e yargel e yuran’ i gamanman, nge urngin e tin gadad ba’adag u lan fapi binaw. 36 I SOMOL ni Got rodad e pi’ urngin fapi binaw ngalan pa’dad, ni mus u Aroer ni bay u thathren fare loway ni Arnon, nge fare binaw ni bay u lukngun e re loway nem, me yan nge mada’ nga Gilead. Dariy reb e binaw ni dad buthuged e yoror riy. 37 Machane da darod nga charen fare binaw ko pi Ammonite, nge charen e Lul’ ni Jabbok nge fapi binaw ni go’ burey nge ku boch e binaw nike yog SOMOL ni Got rodad ndab darod ngay.

<- DEUTORONOMY 1 DEUTORONOMY 3 ->