1 Tomuren e biney, me chuw Paul u Athens nge yan nga Korinth. 2 Me pir’eg be’ u Israel u rom, ni Aquila fithingan, nni gargeleg u Pontus, ni be’ ni ka fini yib u Italy ni yow e bpin rok ni Priscilla, ni bochan e ke pi’ Klaudius ni Emperor nu Roma e thin ni nge chuw urngin piyu Israel u Roma. Me yan Paul i guyrow, 3 me par rorow ma be un ngorow ko maruwel, ya ma yag e salpiy ngak ni nge abich riy ko mongongol tent, ni bod yow. 4 Ma gubin e Sabbath ni yad ma lulu’ag e girdi’ e thin u lan tafen e mu’ulung, ni aram e be guy rogon ni nge mich e tin be yog u wan’ piyu Israel nge piyu Greece.

5 Ma fa’ani sul Silas nge Timothy u Macedonia, me pag Paul urngin ban’en me par ni yigo’o thin rok Got e be machibnag ko girdi’, ma be weliy ngak piyu Israel ni Jesus e ir fare Messiah. 6 Ma fa’anra togopluwgad ngak miyad yog e thin nib kireb ni murung’agen, me rurug e fiyath ko mad rok ni aram e ke togopluw ngorad ma be ga’ar ngorad, “Fa’an gimed ra malog, ma gimed e kireb romed! Me gag e dariy rogon ngog. Chiney i yan ngaram e bay gu wan ngak e pi’in gathi yad piyu Israel.” 7 Ma aram me pagrad nge yan i par nga tabinaw rok be’ ni gathi be’ u Israel ni Titius Justus fithingan, nma meybil mma liyor ngak Got; nib migid tafen nga tafen e mu’ulung. 8 Mi Krispus, ni ir e ma yog e thin u lan tafen e mu’ulung, e mich Somol u wan’, ni ir nge urngin e girdi’ u tabinaw rok; ma bo’or e girdi’ u lan yu Korinth ni rung’ag e re thin nem ni murung’agen Jesus, me mich Jesus u wun’rad min tawfe nagrad.

9 Me reb e neap’ mi ni piliyeg e changar rok Paul me ga’ar Somol ngak, “Dab mu tamdag, ma dab mu tal ko machib ma dab mu pag, 10 ya gu be un ngom. Dariy be’ nrayag rok ni nge rin’ ban’en ngom, ya bo’or e girdi’ u lan e re binaw ney ni yad e tirog e girdi’.” 11 Ma aram me par Paul u rom ni reb e duw nge baley, ni be machibnag e thin rok Got ngak e girdi’.

12 Ma nap’an nturguy Gallio ni nge governor nu Roma u Greece, me mu’ulung piyu Israel ngar koled Paul ngar feked i yan ngalan tafen e pufthin. 13 Me lungurad, “Re mo’on ney e be guy rogon ni nge towasor ngak e girdi’ ngar meybilgad miyad liyor ngak Got u reb e kanawo’ nib togopluw ko motochiyel! 14 Ke yan ni nge welthin Paul me ga’ar Gallio ngak piyu Israel, “Fa’an mang e ban’en nib kireb e ren’ey ara ban’en nrib gel e kireb riy ni kan ngongliy ma bay rogon ni nggu gum’an’ nigeg nggu motoyil ngomed piyu Israel. 15 Machane bochan e kemus ni yu bugithin nge bogi ngachal nge motochiyel romed e gimed be lu’ag murung’agen, ma aram e gimed romed e ngam pithiged. Ye gag e dab gu pithig e tinir e thin!” 16 Me tulufrad ngar chuwgad u lan tafen e pufthin. 17 Ma yad gubin nra koled Sosthenes, ni ir e ma yog e thin u lan tafen e mu’ulung ngar pirdi’iyed u mit tagil’ e pufthin. Machane dariyfan u wan’ Gallio.

18 Bo’or e rran ni par Paul rok e pi walag ni aram girdi’en Kristus u Korinth, me pagrad nge af nga barkow nge yan nga Syria ni yad Priscilla nge Aquila. Machane u m’on ndawori af nga barkow u Kenkrea, min th’ab piyan lolugen ni urngin, ni fan e keyog bbugithin ni nge rin’ ni fan ngak Got.[a] 19 Miyad taw nga Efesus, me pag Paul Priscilla nge Aquila. Me yan nga tafen e mu’ulung ngar lu’aged piyu Israel e thin. 20 Miyad wenig ngak ni nge par rorad nib n’uw nap’an, machane de yog e kefel’ ngay. 21 Ya nap’an ni pig ni nge yan me ga’ar ngorad, “Fa’anra mm’agan’ Got ngay ma gu ra sul ngomed.” Ma aram me af nga barkow nge chuw u Efesus.

22 Ma fa’ani taw nga Cesarea me yan nga Jerusalem nge fingichiy girdi’en e galesiya riy, me yan u rom nga Antiok. 23 Me par boch u rom me yan. Me yan u lan e nug nu Galatia ngu Frygia, ni be pi’ e athamgil nga laniyan’ e pi’in ke mich Jesus u wun’rad.

24 Be’ u Israel ni Apollos fithingan, nni gargeleg u lan yu Alexandria, e yib nga Efesus, ni ir be’ ni bfel’ l’ugun ko welthin ma ba tamilangan’ ko thin ni bay u lan e babyor nib thothup. 25 Ka ni sukulnag ko birok’ Somol e Kanawo’, me weliy u fithik’ e pasigan’ e tin riyul’ ni murung’agen Jesus. Machane kemus ni manang nge mada’ ko tawfe ni i tay John. 26 Me tabab ko machib u lan tafen e mu’ulung nde tamdag. Ma fa’ani rung’ag Priscilla nge Aquila e thin rok, miyow fek nga tabinaw rorow ngar weliyew ngak murung’agen Kanawo’en Got nib puluw. 27 Me turguy Apollos ni nge yan nga Greece, ma pi’in ke mich u wun’rad Jesus ni yad bay u Efesus e ra ayuweged ni aram e ra yoloyed bangi babyor nge yan ngak e pi walagrad ni bay u Greece ni aram girdi’en Kristus, ni yad be wenig ngorad ni nge yan ngorad ma ngar ayuweged u rom. Ma fa’ani taw, ma ri ba ga’ e ayuw ni pi’ ngak e pi’in ke mich Jesus u wun’rad u daken e runguy nge ayuw rok Got ngorad. 28 Miyad ma lu’ag thin piyu Israel u fithik’ e girdi’ ni yo’or nib el merin me gel ngorad, ni aram e be micheg ngorad u lan fare babyor nib thothup ni Jesus e ir fare Messiah.

<- ACTS 17ACTS 19 ->