1 Minog ngak Joab ni be yor David ni Pilung ma be dolo’loynag Absalom ni fak. 2 Ma felfelan’ nike tay urngin e salthaw rok David e rofen nem ni bochan e kar gelgad ko mael e pig nge ngal’ ni kireban’, ya kar nanged ni be yornag David fak. 3 Ere ranod ngalan binaw nder non bagayad, ni gowa yad bogi salthaw ni kar tamra’gad ni bochan e kar milgad ko mael. 4 Me upunguy David ni Pilung owchen nge yor ni ba ga’ laman ni be ga’ar, “Absalom ni fakag! Absalom ni fakag!”

5 Me yan Joab nga tafen David ni Pilung me ga’ar ngak, “Kam tamra’nag e salthaw rom e daba’, ni yad e kar ayuweged e pogofan rom, nge pogofan rok pifakam ni pumo’on nge ppin, nge pi le’engim nge pi ppin rom. 6 Ma kam togopluw ngak e pi’in gab t’uf rodad ma kam fol ngak e pi’in ndaburad gur. Kam gagiyelnag ni pi tolang ko salthaw rom nge pi salthaw rom e dariy farad u wun’um. Ya kug guy ni fa’an manga de yim’ Absalom e daba’ ma gamad gubin ni kug m’ad ma ri gab felan’ ni ga be par. 7 Mman e Chiney ngam fal’eg laniyan’ e salthaw rom. Ya fa’anra dab mu rin’, ma ri gu be micheg nga fithingan SOMOL nra gabul ma dakuriy bagayad ni kab fol ngom. Me yan i aw ni irera’ e bin th’abi ga’ e buch wa’athan nike yib ngom u nap’an e yafos rom.” 8 Ma aram me sak’iy David ni Pilung nge yan i par nga but’ u to’oben i langan e garog ko binaw. Me rung’ag e salthaw rok ni bay u rom, miyad yib ra mu’ulunggad ngak.

Ma ngiyal’nem e urngin piyu Israel ni kar milgad nra bagayad ma ke sul nga tabinaw rok. 9 Ma gubin yang u daken e nam nu Israel ni be tugthin e girdi’ riy ni be lungurad, “I David ni Pilung e chuwegdad u tan pa’ e pi to’ogor rodad. I ayuwegdad rok e pi Filistine, machane chiney e ke mil rok Absalom ke chuw ko binaw. 10 Kad gapgep niged Absalom kemang pilung rodad, machane kan li’ u fithik’ e mael. Ere mang ndabi guy be’ rogon nge yan i pining David nge sul ko pilung?”

11 Pi thin nem ni i weliy e girdi’ nu Israel e rung’ag David. Ma aram me l’oeg fa gal prist ni aram Zadok nge Abiathar ni ngar fithew e pi’in yad be yog e thin u Judah ni nge lungurow, “Mang ni gimed e ngam pired ni gimed e th’abi tomur ni ngam muruwliyed ni nge sul e en ni pilung nga tafen e pilung? 12 Gimed pi be’ rog, ni gadad ta’ab ufin nge ta’ab racha’; mang ni gimed e th’abi tomur ni ngam muruwliyed nggu sul?” 13 Miki yog David ngorow ni nga rognew lungun ngak Amasa ni nge lungurow, “I gur e ga be’ rog. Chiney i yan nga m’on e kug tem ni gur e nge milfan e salthaw ngom, ni aram e kam man nga luwan Joab. Fa’anra dab gu tem ngay me Got e nge li’eg nggum’!” 14 Thin ni yog David e adag urngin e girdi’ nu Judah, miyad pi’ e thin nge yan ngak ni ngar sulod urngin e pi tolang ko salthaw rok.

15 Ma nap’an ni be sul i yan, miyad mada’ e girdi’ nu Judah ko lul’ ni Jordan ni karbad nga Gilgal ni ngar chaggad ngak ngar th’abed e lul’ nga baraba’. 16 Shimei ni ba Benjamin, ni be’ nib mo’on ni fak Gera, ni be’ u Bahurim, e gurnag ir nga Jordan ni ngar mada’gow David ni Pilung. 17 Ma 1,000 e girdi’ ko ganong rok Benjamin nike un ngak. Mi Ziba, ni fare tapigpig ko tabinaw rok Saul e ki yib ni yad fa ragag nge lal i pagel ni fak nge fa reliw’ i tapigpig rok, ra tawgad nga Jordan ni yad ba m’on rok David ni Pilung. 18 Miyad th’ab e lul’ nga ba’nem ngar chaggad ngak e pi’in yad be un ngak David ni Pilung ma ngar rin’ed e tin ba’adag David ni Pilung.

Nap’an ni be fal’eg David ni Pilung rogon ni nge th’ab e lul’, me yib i paraw Shimei u p’eowchen nga but’ 19-20 me ga’ar, “Pilung rog, wenig ngom, mpag talin e tin nib kireb ni gu rin’ ngom ko fa rofen ni mu chuw u lan yu Jerusalem. Dab kum togopluwnag ngog ara mu leamnag. Gu manang ni kug denen, aram fan ni gag e som’on e daba’ ni ku gub ko pi ganong ni bay ko lel’och ni ngad mada’gow.”

21 Abishai, ni Zeruyah e chitiningin e non ni ga’ar, “Shimei e susun e ngan li’ ngem’, ya yog e thin nib kireb ngak e en ni SOMOL e turguy ni nge mang pilung.”

22 Me ga’ar David ngak Abishai nge Joab ni walagen Abishai, “Mini’ e ke fith ngomew lanin’mew? Mognew, gimew be finey ni ngam fekew gag ko kireb? I gag e en ni pilung u Israel e chiney, ere dariy be’ u Israel ni ngan li’ e daba’.” 23 Me ga’ar ngak Shimei, “Nggu micheg ngom ndab kun thang e pogofan rom.”

24 Ma aram me yib Mefiboseth, ni Saul e tutuw rok, ni ngar mada’gow David ni Pilung; ni ka nap’an ni chuw David ni Pilung u Jerusalem nge taw ko ngiyal’ ni sul riy nike gel ko mael me par Mefiboseth ndaki maluknag ay, ma daki puy roben, ara maluknag e mad rok. 25 Fa’ani yib Mefiboseth u Jerusalem ni ngar mada’gow David ni Pilung, me ga’ar David ngak, “Mefiboseth, mangfan nda mu’un ngog ngdarow?”

26 Me fulweg ni ga’ar, “Ga manang ni gub mugutgut. Gog ngak fare tapigpig rog ni nge fal’eg rogon e dongki rog ni fan e nggu un ngom, me ban nigeg. 27 Tin ni weliy ngom ni murung’ageg e de riyul’, machane gur e ga bod e engel rok Got, ere mu rin’ e tin ni ga be finey ni ir e mmat’aw. 28 Ya urngin girdi’en e tabinaw rok e chitamag e ba’ tapgin ni ngam li’rad ngarm’ad, machane gur e mpi’ mat’awug ni ngu’ug un ngom ko abich u tebel rom. Dariy mat’wug ni ngku gu wenignag ban’en ngom ni ngam rin’ ngog.”

29 Me fulweg David ni Pilung ngak ni ga’ar, “Dakuriy ban’en ni ngku mog, ya kug duwgiliy ni gur nge Ziba e nge milfan ngomew e tirok Saul ban’en.”

30 Me ga’ar Mefiboseth, “Nge mang Ziba e milfan ngak ni gubin. Ya kug felfelan’ ni kam sul nde buch ban’en rom.”

31 Ma ki yib Barzillai nu Gilead u Rogelim ni nge cheag ngak David ni Pilung ngar th’abew e Jordan nga baraba’. 32 Mi Barzillai e be’ ni kari pumo’on, ya nga meruk i ragag e duw rok. Ri bo’or ban’en rok ma i pi’ e ggan ngak David ni Pilung ko ngiyal’ ni ba’aram ni i par u Mahanaim. 33 Me ga’ar David ni Pilung ngak, “Mu un ngog ngdarow nga Jerusalem ngu’ug ayuwegnem u rom.”

34 Machane me ga’ar Barzillai, “Dabki n’uw nap’an ni nggu par ko biney e tamilang; ere dakuriy fan ni nggu un ngom nga Jerusalem. 35 Ke meruk i ragag e duw rog, ma dakuriy adagen lanin’ug ma dab kug nang lamen e tin ni bay ug way nge tin ni bay ug garbod ngay, ma dabkiyag ni gu rung’ag laman e pi’in yad be tang. Ra gu par ni kug mang reb e magawon ngom. 36 Dariy rogog ni nga ni pi’ e binir e fel’ rogon ngog. Ere bay gu un ngom ngad mada’gow nga ba’nem e Jordan. 37 Ma ga pageg nggu sul nga tabinaw rog, nggum’ ni gub chugur nga to’oben e malang rok e gallibthir rog. Ba’aray e tapigpig rom i Chimham ni fakag; mfek nge un ngom, ma ga ayuweg nrogon ni ga be finey ni bfel’.”

38 Me ga’ar David ni Pilung, “Bay gu fek nge un ngog mu ug ayuweg nrogon ni ga ba’adag. Ma tin ni ga ba’adag ni nggu ayuwegnem riy e gu ra rin’.” 39 Me th’ab David nge urngin e salthaw rok e lul’ ni Jordan nga baraba’. Me faray owchen Barzillai me yibilay ngak Got, me sul Barzillai nga tabinaw rok.

40 Nap’an nike th’ab David ni Pilung e lul’ nga baraba’ nike un urngin e pumo’on nu Judah ngak, nge baley ko pumo’on nu Israel, me yan u rom nga Gilgal me un Chimham ngak. 41 Ma aram e urngin piyu Israel nranod ngak e en ni pilung nge lungurad ngak, “Pi walagmad ni pumo’on nu Judah e mangfan ni kar feked gur romad ke mang yad e kar cheaggad ngom, nge girdi’ ko tabinaw rom, nge salthaw rom kam th’abed e Jordan?”

42 Me ga’ar e pumo’on nu Judah, “Kug rin’ed ya David ni Pilung e bagamad. Ere mang ni ngam damumuwgad? Dawori pi’ puluwon e ggan romad ma ka dawori pi’ ban’en ngomad.”

43 Me fulweg piyu Israel ni lungurad, “I David ni Pilung e ir bigimed, machane mat’awmad ngak e ba pag e ragag yay ni ba ga’ nga mat’awmed. Mang ni kam changargad ngomad nga but’? Ya gamad e som’on ni gogned ni ngan fulweg David ni Pilung!”

Machane pumo’on nu Judah e ba gel e thin nrogned ni murung’agen mat’awrad ngak David ni Pilung ko pumo’on nu Israel.

<- 2 SAMUEL 182 SAMUEL 20 ->