2 KINGS 15

Uzziah ni Pilung nu Judah

(1 Kronicles 26:1–23)

1 U lan e duw ni rliw’ nge medlip ko gagiyeg rok Jeroboam ni 2 Pilung nu Israel, me mang Uzziah nib mo’on ni fak Amaziah e pilung nu Judah, ni ragag nge nel’ e duw yangren, me yog e thin u Jerusalem ni wugem nge l’agruw e duw. Ma chitinngin e Jekoliah ni be’ nu Jerusalem. 3 Ma tin i rin’ e ku bod e n’en ni rin’ e chitamngin, i rin’ e tin nib m’agan’ SOMOL ngay, 4 machane de gathay fa yungi tagil’ e meybil rok e pi’in ndar nanged SOMOL, ma de tal e girdi’ i pi’ e maligach nge incense ni yibe urfiy u rom. 5 Me tay SOMOL Uzziah nge yib ba m’ar ni daraw ngak ndaki chuw rok u n’umngin nap’an e yafos rok. Ma i par u reb e naun nib thay ngabang, ni daki ngongliy e maruwel rok, ngiyal’ i n’em ni Jotham nib mo’on ni fak e be gagiyegnag fare nam.

6 Gubin e tin kabay ni rin’ Uzziah e go’ kani yoloy ngalan e babyor ni Chepin e Pilung nu Judah. 7 Me yim’ Uzziah min k’eyag ngalan fapi low ko yam ko pilung u lan fare Binaw rok David, me yan Jotham nib mo’on ni fak nga luwan nge mang pilung.

Zekariah ni Pilung nu Israel

8 U lan e duw ni guyey nge meruk ko gagiyeg rok Uzziah ni Pilung nu Judah, me mang Zekariah nib mo’on ni fak Jeroboam e pilung u Israel, me yog e thin u lan yu Samaria ni nel’ e pul. 9 Ma ku bod e pi’in yad ba m’on rok, ni denen nib togopluw ngak SOMOL. Ni i rin’ e tin kireb ni ki rin’ Jeroboam ni Pilung nib mo’on ni fak Nebat, ni waliy yu Israel nga fithik’ e denen. 10 Me Shallum nib mo’on ni fak Jabesh e makath nib togopluw ngak Zekariah ni Pilung, me li’ nge yim’ u Ibleam, me yan nga luwan nge mang pilung.

11 Gubin e tin ki rin’ Zekariah e kani yoloy ngalan e babyor ni Chepin e Pilung nu Israel.

12 Ma aram me yib i m’ug nib riyul’ fare bugithin ni micheg SOMOL ngak Jehu ni Pilung, ni fa’ani ga’ar: “Pi’in owchem i yib nge mada’ ko bin aningeg e mfen e bay ur manged pilung nu Israel.”

Shallum ni Pilung nu Israel

13 U lan e duw guyey nge mereb ko gagiyeg rok Uzziah ni Pilung nu Judah, me mang Shallum nib mo’on ni fak Jabesh e pilung u Israel, me yog e thin u Samaria ni ta’reb e pul.

14 Me yan Menahem nib mo’on ni fak Gadi u Tirzah nga Samaria, nge li’ Shallum nge yim’, me yan nga luwan nge mang pilung. 15 Gubin e tin kabay ni rin’ Shallum nib mu’un murung’agen e makath ni tay ngay, e go’ kani yoloy ngalan e babyor ni Chepin e Pilung nu Israel. 16 Ngiyal’nem e chuw Menahem u Tirzah me kirebnag fare binaw nu Tappuah, nge girdi’ riy nge ga’ngin yang e binaw u charen, ni bochan e de wenig fare binaw ngak. Mus ngak e pi’in ppin nib diyen ma yi go’ sey e yal rorad.

Menahem ni Pilung nu Israel

17 U lan e duw ni guyey nge mereb ko gagiyeg rok Uzziah ni Pilung nu Judah, me mang Menahem nib mo’on ni fak Gadi e pilung nu Israel, me yog e thin u Samaria ni ragag e duw. 18 Me denen nib togopluw ngak SOMOL, nge mada’ ko ngiyal’ ni yim’ riy nde pag e tin kireb ni i rin’ Jeroboam ni Pilung nib mo’on ni fak Nebat, ni ir e waliy yu Israel nga fithik’ e denen. 19 Me Tiglath Pileser, ni ir e pilung u Assyria, e yib i mael ngak yu Israel, me pi’ Menahem guyey nge meruk e ton e silber ngak ni nge fel’ u wan’ nge ayweg Menahem nge pi’ gelngin ni nge gagiyegnag fare nam. 20 I fek Menahem e pi salpiy ney rok e pi pumo’on ni bfel’ rogorad u lan yu Israel ni i tay gelngin ngorad ni nge bagyad ma wugem e salpiy ni silber ni nge pi’. Ma aram me sul Tiglath Pileser ko nam rok.

21 Gubin e tin kabay ni rin’ Menahem e go’ kani yoloy ngalan e babyor ni Chepin e Pilung nu Israel. 22 Me yim’ min k’eyag, me Pekahiah nib mo’on ni fak e yan nga luwan nge mang pilung.

Pekahiah ni Pilung nu Israel

23 U lan e duw ni wugem ko gagiyeg rok Uzziah ni Pilung nu Judah, me mang Pekahiah nib mo’on ni fak Menahem e pilung nu Israel, me yog e thin u Samaria ni l’agruw e duw. 24 Me denen nib togoluw ngak SOMOL, ni i rin’ e n’en nib kireb ni i rin’ Jeroboam ni Pilung nib mo’on ni fak Nebat, ni ir e waliy yu Israel nga fithik’ e denen. 25 I Pekah nib mo’on ni fak Remaliah ni ir e ga’ ko fa raba’ i salthaw rok Pekahiah, e makath ngak wugem i pumo’on nu Gilead, ngan li’ Pekahiah nge yim’ u lan fare yoror ko naun ko pilung nu Samaria, me yan nga luwan nge mang pilung.

26 Gubin e tin i rin’ Pekahiah e go’ kani yoloy ngalan e babyor ni Chepin e Pilung nu Israel.

Pekah ni Pilung nu Israel

27 U lan e duw ni wugem nge l’agruw ko gagiyeg rok Uzziah ni Pilung nu Judah, me mang Pekah nib mo’on ni fak Remaliah e pilung nu Israel, me yog e thin u Samaria ni rliw’ e duw. 28 Me denen nib togopluw ngak SOMOL, i rin’ e kireb ni bod Jeroboam ni Pilung nib mo’on ni fak Nebat, ni ir e waliy yu Israel nga fithik’ e denen.

29 Ma ngiyal’ nib pilung Pekah me kol Tiglath Pileser ni ir e pilung nu Assyria fapi binaw nu Ijon, Abel Beth Maakah, Janoah, Kedesh, ngu Hazor, nge nug nu Gilead, Galilee, ngu Naftali, me fek e girdi’ nga Assyria ni kalbus.

30 U lan e duw ni 20 ko gagiyeg rok Jotham ni Pilung nu Judah, nib mo’on ni fak Uzziah, me makath Hoshea nib mo’on ni fak Elah nib togopluw ngak Pekah ni Pilung, me li’ nge yim’, me yan nga luwan nge mang pilung. 31 Gubin e tin i rin’ Pekah ma yi go’ ni yoloy ngalan Chepin e Pilung nu Israel.

Jotham ni Pilung nu Judah

(2 Kronicles 27:1–9)

32 U lan e bin l’agruw e duw ko gagiyeg rok Pekah ni Pilung nu Israel nib mo’on ni fak Remaliah, me mang Jothan e pilung nu Judah nib mo’on ni fak Uzziah 33 ni rliw’ nge lal e duw yangren, me yog e thin u Jerusalem ni ragag nge nel’ e duw. Chitinngin e Jerusha, ni be’ ni bpin ni fak Zadok. 34 Miki rin’ e tin i rin’ e chitamngin ni Uzziah, ni Jothan e rin’ e tin nib m’agan’ SOMOL ngay. 35 Machane de gathay fa yungi tagil’ e meybil rok e pi’in ndar nanged SOMOL, ma girdi’ e dar talgad i pi’ e maligach nge incense ni yad be urfiy u rom. I Jotham e ireram e cha’ ni ngongliy fare Garog ni Lel’och ko fare Tempel.

36 Gubin e tin ki rin’ Jotham e go’ kani yoloy ngalan Chepin e Pilung nu Judah. 37 U nap’an e ka ir e be pilung me l’oeg SOMOL Rezin ni Pilung nu Syria nge Pekah ni Pilung nu Israel ni ngar maelgow ngak yu Judah. 38 Me yim’ Jotham min k’eyag u lan e low ko yam’ rok e pilung u lan fare Binaw rok David, me Ahaz nib mo’on ni fak e yan nga luwan nge mang pilung.

<- 2 KINGS 14 2 KINGS 16 ->