1 Pi walagmad ni girdi’en Kristus, gamad ba’adag ni ngam nanged rogon nike ayuweg Got girdi’en e pi galesiya nu Macedonia. 2 Ba gel e sikeng ni kan tay ngorad ko gafgow ni yib ngorad; machane ri ba ga’ e felfelan’ rorad ni bo’or e tin ni ur pi’ed ban’en, ni yugu aram rogorad nri yad ba gafgow. 3 Nggog ngomed, nra pi’ed urngin e tin nrayag rorad ni ngar pi’ed, ya ra pi’ed nge pag e fol; ni yad e leam rorad 4 nra weniggad ngomad ni ngan pagrad ngar uned i ayuweg e girdi’ rok Got ni yad bay u lan yu Judea. 5 Tin nra pi’ed e pag urngin e tin ni gu leam niged! Som’on e ra pi’ed yad ngak Somol; nge mu’ ma ra pi’ed yad nga pa’mad, ni Got e gagiyegnag nge yodorom. 6 Ere gu weniggad ngak Titus, ni ir e sunumeg e re maruwel ney, ni nge ul ul ngay nge ayuwegmed ngam mu’niged e re maruwel ney ni pigpig u fithik’ e t’ufeg. 7 Gimed e ri bo’or ban’en romed: ni aram e michan’, nge salap ko welthin, nge tin gimed manang, nge rogon ni gimed ba’adag ni ngam pi’ed e ayuw, nge rogon ni gamad ba t’uf romed.[a] Ere gamad ba’adag ni ngkum pi’ed boch ban’en ni pire’ ko re ayuw ney ni ayuw u fithik’ e t’ufeg.

8 Gathi kug tay e motochiyel riy. Machane gu ra guy rogon ngam nanged feni pasigan’ boch e girdi’ ni ngar pi’ed e ayuw, ma aram e rayag ni gu nang feni riyul’ e t’ufeg romed. 9 Ya gimed manang rogon ni runguydad e Somol rodad i Jesus Kristus ni ba’aray rogon: aram rogon feni fla’ab, me pag ir nge gafgow ni fan ngomed, ni fan e nge yagnag e fla’ab ngomed u daken e gafgow nike tay.

10 Ba’aray rogon e leam rog ko tin ni kad weliyed: bfel’ ni ngam mu’niged e chiney e n’en ni mu tababgad ngay fa binem e duw. Gimed e som’on, ni gathi kemus ni mu ngongolgad, machane ku errogon nib m’agan’med ngay ni ngam ngongolgad. 11 Ere mmuruwliyed nge chuw! Mu pasigniged lanin’med ngay ngam mu’niged ni bod rogon ni mu leam niged nib pasigan’med ngay, mi gimed mu’nag ko tin ni bay romed. 12 Ya fa’anra ba pasigan’med ngay ni ngam pi’ed ban’en, mra fek Got e tin ni kam pi’ed nib tow’ath nrogon e tin nrayag ni ngam pi’ed, ma gathi tin ndariy romed.

13-14 Dagur guy rogon ni nggu tay ban’en nib tomal nga pomed ni bochan e nggu ayuweg boch e girdi’ ko gafgow rorad; machane pire’ ban’en ni bay romed e ngiyal’ney, ere rib mat’aw ni ngam ayuweged e pi’in gafgow nthingari yag ban’en ngorad. Ma bay mu gafgowgad nthingari yag ban’en ngomed ma ke yo’or ban’en rorad, ma aram miyad ayuwegmed. Ireray rogon me par nib mat’aw ngomed ni gimed gubin. 15 Ni bod ni be yog e babyor nib thothup ni be ga’ar, “Cha’ ni pire’ e kunuy e de pag rogon e tin ni yag ngak, ma cha’ ni bochu’uw e kunuy e de pag feni lich e tin ni bay rok.”

16 Ri ba ga’ e magaer ni gu pininged ngak Got ni ayuweg Titus nge pasigan’ ni bod gamad nge ayuwegmed! 17 Gathi kemus ni m’agan’ ko tin ni gu wenig niged ngak; ya ku errogon ni ir rok ma ba pasigan’ ngay ni nge pi’ e ayuw, me ir e duwgiliy u wan’ ni nge yib ngomed. 18 Bay reb i walagdad ni girdi’en Kristus ni kug l’uged ni nge cheag ngak ngar bow, ni be’ ni urngin e galesiya ni yibe tayfan riy ni bochan e maruwel rok ni aram e be machibnag ngak e girdi’ e Thin Ni Bfel’ ni yib rok Got. 19 Ma girdi’en e galesiya i yan e kar mel’eged e cha’ney ma kar duwgilyed ni ir e nge un ngomad ko milekag ko re gaf i maruwel ney ni ayuw u fithik’ e t’ufeg ni fan e ngan tayfan Somol riy, ma ngan dag ni gadad ba’adag ni ngad pi’ed e ayuw.

20 Gamad be guy rogon ni dabi nonnon e girdi’ u rogon ni gamad be muruwliy e re salpiy ney ni ba ga’ ni ngan pi’ nib tow’ath. 21 Gamad be nameg ni nggu rin’ed e tin nib mat’aw, ni gathi kemus nu p’eowchen Somol, machane ku errogon u p’eowchen e girdi’.

22 Ere kug l’uged walagmad ni girdi’en Kristus ni nge un ngorad; ke yo’or yay ni kug sikeng niged, ma kug pir’eged ni gubin ngiyal’ ma rib pasigan’ ngay ni nge pi’ e ayuw. Ma chiney e kari pagan’ ngomed, ni aram e kari pasigan’ ngay ni nge ayuwegmed. 23 I Titus e ma ayuwegneg ko maruwel ni gamow be maruwel ni nggu ayuwegew gimed; ma tin ni be’er i walagdad ni girdi’en Kristus ni ngar uned ngak e yad owchen e pi galesiya, ni maruwel ni yad be tay e bayi tay e girdi’ fan Kristus riy. 24 Mu t’ufeged yad, nge mich u wan’ urngin girdi’en e pi galesiya ni n’en ni kug weliyed ni murung’agmed ni gamad ba felan’ ngay e ba riyul’.

<- 2 KORINTH 72 KORINTH 9 ->