Pin’ey e thingar mu fil ma ga machibnag ngak e girdi’. 3 En nra machibnag yugu ban’en nde ta’reb rogon ko tin nib riyul’ e thin ni thin rok Somol rodad i Jesus Kristus nge rogon murung’agen ni gadad ma liyor ngak Got 4 e ba ufanthin, ma dariy ban’en ni manang. Ma ri ba’adag ni nge malu’ag thin me tugthin ngak be’ u murung’agen yu bugithin, ma ireray e ren’en nma sunumiy e awan’, mma wereg e girdi’, mma k’aring e thin nib kireb nganog, ma ir e ma pow’iy e girdi’ ngi i sana be’ ku be’ nib kireb e n’en ni be leamnag, 5 nge tugthin ni be yib rok e girdi’ nib kireb lanin’rad ndakuriy e thin rok Got u wun’rad ni ir e tin nib riyul’. Ma yad be finey ni liyor ni yibe tay ngak Got e reb e kanawo’ ni nge yib e salpiy ni pire’ riy.

6 Liyor ni yima tay ngak Got e ri ra fel’ rogon be’ riy ni fa’anra kefel’ u wan’ e tin bay rok. 7 Mang e n’en ni kad feked i yib ko biney e tamilang? Dariy! Ere mang e rayag ni ngad feked nge un ngodad ko ngiyal’ ni ngad chuwgad ko biney e tamilang? Dariy! 8 Ere fa’anra bay e ggan rodad nge mad ni ngdon’ed, ma susun e ke gaman e tin nge yag ngodad. 9 Machane pi’in yad ba’adag ni nge yo’or e salpiy rorad e yad ma pagrad ngak e pin’en nma pingeg e girdi’ nge denen, miyad aw ko wup ko ar’ar ni aram e yibe ar’arnag e tin ndariyfan nge tin nra kireb nigey, ni ir e ma girengiy e girdi’ ko kireb miyad malog. 10 Ya chogowen e salpiy e ir lik’ngin urngin mit e kireb. Boch e girdi’ e ri yad ba’adag ni nge yag ngorad ni aram tapgin ma kar mal’afgad u rogon ni nge mich Kristus u wun’rad, ma ke m’ingan’rad ke yib e kireban’ ni pire’ ngorad.

11 Machane gur, e gur be’ ni girdi’en Got, ere mpar u orel ko pin’ey ni urngin ndab mu’un ngay. Mu athamgiliy e tin nib mat’aw, nge tin ni bfel’ u p’eowchen Got, ma ga par nib mich Got u wun’um, ma ba t’uf Got rom nge girdi’, mu um par ni gab k’adan’, ma gab sumunguy. 12 Mu athamgil ngam mil nike musmus rogom ko sagreng ni yibe tay u rogon nib mich Got u wun’uy, ngam yagnag ngom e yafos ndariy n’umngin nap’an; ya ireray e re yafos nike piningem Got ngay ko fa ngiyal’nem ni mu weliy ni bfel’ rogon u p’eowchen bo’or e girdi’ rogon nike mich Kristus u wun’um. 13 Gu be ta’chiylen ngom u p’eowchen Got, ni ir e ma pi’ e yafos ngak urngin ban’en, ngu p’eowchen Kristus Jesus, ni fa’ani ir e weliy fare welthin ni bfel’ u p’eowchen Pontius Pilate ni be lungug: 14 Mu fol ko tin ka ni midilnag ngom ngam tay nib machalbog ma dariy thibngin nge yan i mada’ ko Chirofen ni bay yib i m’ug e Somol rodad i Jesus Kristus riy. 15 Bay yib i m’ug ko ngiyal’ ni bay duwgiliy Got ni nge m’ug riy, ni ir e ba fla’ab, ma kemus ni ir e be gagiyegnag urngin ban’en, me ir e Pilung ko pi pilung nge Somol ko pi somol, 16 ni kemus ni go ir e dabi yim’; mma par ko tamilang ndariy be’ nrayag ni nge chugur ngay. Dariy be’ ni ka’a guy, ma dariy be’ nrayag ni guy, me ir e ngu’un tayfan ma bay i par gelngin ndariy n’umngin nap’an! Amen.

17 Mog ngak e pi’in bo’or ban’en rorad ko biney e tamilang ndab ra ufanthin gad, ma dabi l’agan’rad ko pin’em nde muduwgil, ni aram e pin’en nma fel’ rogoy riy ko biney e tamilang, machane nge l’agan’rad ngak Got ni ir e ba gol ni be pi’ urngin ban’en ngodad ni be fel’ rogorad riy. 18 Mog ngorad ngar ngongliyed e tin ni bfel’, ma ngongol ni bfel’ e nge yo’or ni ngar ngongliyed, ma ngar golgad ni nge m’agan’rad ngay ni ngar pi’ed boch e tin bay rorad ban’en ngak boch e girdi’. 19 Ireray kanawo’en miyad kunuy e fla’ab ni fan ngorad ni ir e bay mang def ngorad nib gel ni fan ngorad e chiney i yan ngaram. Ma aram e rayag ngorad e yafos ni ir e bin riyul’ e yafos.

20 Timothy, mu ayuweg e n’en ni gur e kan pag fan ngom ni ngam ayuweg. Dab mu’un i yog e thin nma yog e pi’in ndariyfan Got u wun’rad nge tugthin ndariyfan ni murung’agen e llowan’ nike balyang boch e girdi’ karogned e llowan’ ngay. 21 Ya boch e girdi’ e karogned ni bay e re llowan’ nem rorad, ma wenegan ni be yib ngorad e kar olobochgad da ku ranod u rogon kanawo’en nib mich Got u wun’uy.

I Got e ngi i ayuwegmed ni gimed gubin.

<- 1 TIMOTHY 5