1 Dab mu puwan’ ngak be’ nib mo’on ni be’ nike pilibthir, machane ngam wenig ngak ni gowa ir e chitamam. Ma rogon e ngongol rom ni ngu’um tay ngak e pi’in pumo’on ni kayad ba pagel e ngu’um rin’ ngorad ni gowa yad pi walagem, 2 ma ku er rogom ngak e pi’in ni puwelwol ni gowa yad pi chitinam, ma ku errogon e ngongol rom, ngak e pi’in nrugod ni ngar pired ni gowa yad pi walagem ni ppin nib machalbog lanin’um ngorad.

3 Mu tayfan e pi’in ni ppin nike yim’ figirngirad, ni pi’in nri dariy be’ ni be ayuwegrad. 4 Ma fa’anra bay be’ ni bpin ni aray rogon ma bay pifak ara pifak pifak, ma susun e som’on e nge fil e pi’in ni pifak nem rogon ni ngar ngongliyed e maruwel rorad nrogon e maruwel nma tay girdi’en Kristus ngak girdi’en e tabinaw rorad, ireray kanawo’en miyad fulweg taban e magaer rok e matam nge matin rorad nge matam nge matin rok e gallibthir rorad, ya ireram e n’en nib m’agan’ Got ngay. 5 Be’ ni bpin nike yim’ e pumo’on rok ma ri dariy be’ nrayag ni nge ayuweg, e be par nike pagan’ ngak Got ni be meybil ni be wenig ngak Got ni neap’ nge rran ni ngi i ayuweg Got. 6 Machane re pin nike yim’ e pumo’on rok ma ke pi’ ir ko tin ni be ar’arnag ke pag rogon e yugu aram rogon ni be par nib fos, machane ba yam’. 7 Mog e re bugithin ney ngorad, ni bochan e nge dabiyag ni puwan’ be’ ngorad. 8 Ma fa’anra dabi ayuweg be’ e girdi’ rok, ni ba ga’ ni girdi’en e tabinaw rok, ma aram e ke n’ag rogon nib mich Got u wan’, ma kab gel e kireb rok ngak be’ ndawori mich Got u wan’.

9 Dab mu uneg fithingan be’ nga babyoren fithingan e pi’in ke yim’ figirngirad ni fa’anra dawori pag nel’ i ragag e duw yangren. Ma ku errogon ndabisiy nta’ab yay nike mabgol,*nta’ab yay nike mabgol; ara nge par nib yul’yul’ ko pumo’on rok. 10 ma bfel’ murung’agen ko ngongol rok ni ba’aray rogon: i ir be’ ni bpin ni chuguliy pifak ni bfel’ rogon, ma i ayuweg e milekag ni karbad nga tafen, ma i luknag e rifrif u ay e pi’in girdi’en Got ni karbad nga tafen, ma i ayuweg e pi’in ni kar gafgowgad, ma i tiyan’ nga urngin mit e ngongol ni bfel’.

11 Machane dab mu uneg fithingan e ppin nike yim’ figirngirad ma dawor ra pilibthirgad nga fithingan e pi’in ke yim’ figirngirad ma kan tayrad nga babyor; ni bochan e ngiyal’ ni ra t’uf rorad ni ngar uned ko mabgol, ma yad ma pi’ keru’rad ngak Kristus, 12 ma aram me yan i aw nib kireb e rorad ni fan e kar th’abed e tin nrogned ngak Kristus ko som’on. 13 Ma ku errogon ni bayi n’en miyad ra fil rogon ni ngar adbeyed e tayim rorad ko yan ni yad ma tay u mit e tabinaw; machane gathi kemus aray, ku yad ma fil rogon e dugdug thin ma yad be yan ra magawon niged e maruwel rok boch e girdi’, ni yad be weliy murung’agen bogi ban’en nsusun e dab ra weliyed murung’agen. 14 Ere kabfel’ u wun’ug ni pi’in ke yim’ figirngirad ma dawor ra pilibthirgad e ngar uned ko mabgol, ngar fakyed e bitir, mu ur ayuweged e tabinaw rorad, ngad guyed rogon ni dabi yib tapgin ni nge yog e pi’in nto’ogor rodad ni gadad ba kireb, 15 ni bochan e boch e ppin nike yim’ figirngirad e kar pi’ed keru’rad ngak Got kar folgad rok Satan. 16 Ma fa’anra bay be’ ni bpin nib mich Kristus u wan’ ma bay e girdi’ ko tabinaw rok ni ppin nike yim’ figirngirad, ma thangri ayuwegrad, ma dabi pagrad ni nge mil farad ko galesiya, ni fan e nge bung rogon e galesiya ni nge ayuweg e pi’in ni ppin nike yim’ figirngirad ma dariy be’ nra ayuwegrad.

17 Pi’in pi’ilal ko galesiya ni bfel’ e maruwel ni yad be tay ni aram e yad be gagiyegnag girdi’en e galesiya e susun e ngan tafinaynag ni bay rogorad ni nge bagayad min pi’ puluwon nike l’agruw yay, ni ba ga’ ni pi’in nrib gel e machib ni yad be tay nge thin rok Got ni yad be fil ngak e girdi’. 18 Babyor nib thothup e be ga’ar, “Dab ni m’ag l’ugun ba garbaw ko ngiyal’ ni be yot’yot’ wom’ngin e woldug ni yima ngongliy e flowa riy ni aram e be gunugunuy,” ma ki ga’ar, “En ni be maruwel e bay mat’wun ni ngan pi’ puluwon ngak.” 19 Dab mmotoyil ko tin kanog nib togopluw ngak be’ nib ilal ko galesiya ni fa’anra de yib i yog l’agruw ara dalip e girdi’ ni yad e mich riy. 20 Mu non u fithik’ e girdi’ ngak urngin e pi’in yad be denen, ya nge tamdag e tin kabay e girdi’.

21 Ri gu be non ngom u p’eowchen Got, nge Kristus Jesus, nge pi engel nib thothup ni ngam fol ko pi thin ney, ma urngin ban’en ni ga ra ngongliy ma dab mu dabuy daken be’ ara mu fol ngak be’. 22 Dab mu gur ngam tay pa’am nga daken be’ ngam yibiliy ni fan e nge muruwliy e maruwel rok Somol. Dab mu’un ko denen ni be ngongliy boch e girdi’; mu tem ni gab machalbog.

23 Dab mu unum e ran ni go’ ran, machane mu unum bochu’uw e wayin nge ayuweg e yal rom, ni bochan e yugu ma yib e m’ar ngom.

24 Denen ni be ngongliy boch e girdi’ e mmom ni ngan guy, ni ir e be waliyrad i yan ko gechig; machane denen ni be ngongliy boch e girdi’ e bay fini m’ug ko tomur. 25 Ere ku errogon ni ngongol ni bfel’ e ba tamilang ni yima guy, ni mus ko tin ni bfel’ e ngongol ni gathi rib tamilang ma dabiyag ni ngan mithag.

<- 1 TIMOTHY 41 TIMOTHY 6 ->