1 Ere bin som’on e gu be wenignag ngak girdi’en e galesiya ni ngu’ur meybilgad ngak Got ni fan ngak urngin e girdi’, ma yad be wenig ngak ni nge runguyrad, miyad pining e magaer ngak ni fan e tin ni bayi rin’ ni fan ngorad, 2 aray rogon ni ngar meybilgad ni fan ngak e pi pilung nge urngin e girdi’ ni yad be tay murung’agen e girdi’, ni bochan e nge yag nda pired u fithik’ e mocha’ nge gapas, ni gadad be liyor ngak Got ma bfel’ pangidad. 3 Ren’ey e bfel’ ma ba felan’ Got ngay ni ir e ma thapegdad ngak, 4 ni ir e ba’adag urngin e girdi’ ni ngar thapgad ngak ma ngar nanged e tin nib riyul’. 5 Ya ri ta’reb e Got ni bay, ma ri ta’abe’ e bay ni ir e ma chagiy Got nge girdi’ nga ta’bang, ni aram fare girdi’ ni Kristus Jesus, 6 ni ir e pi’ ir nge biyuliy urngin e girdi’ ngak Got. Ireram e mich riy ko re ngiyal’ i n’en ni turguy Got, ni ba’adag Got urngin e girdi’ ni ngar thapgad ngak, 7 ma ireray fan nnol’igeg ni gag reb e apostel ni tamchib ngak e pi’in gathi yad piyu Israel, ni nggu wereg e thin rok Got ngorad ni murung’agen rogon ni nge mich Got u wun’uy min nang e tin nib riyul’. Gathi ban’en ni gu be ban, ya gu be yog e tin riyul’!

8 Gubin yang ni yira mu’ulung ngay ma gub adag ni pumo’on e nge meybil riy, ni pumo’on ni kar pi’ed yad nga pa’ Got mrayag ni ngar puged pa’rad ngalang ngar meybilgad ndarir damumuwgad ara yad be tugthin.

9 Ma ku errogon e pi’in ni ppin ni gub adag ni ngar gonopiyed rogon e mad rorad nge yan i par ni bfel’ rogon, miyad yin’ e mad nrogon yalen e munmad ko ppin; ma gathi ngar ngongliyed piyan lolugrad ni nge thum’ nga wuru’, ara ra ted e nunuw ni gol ara nunuw nni ngongliy ko churuwo’ nu l’ugun e yar ara mad nib tolang puluwon, 10 machane ngar ngongliyed e ngongol ni bfel’ nib m’ag ngak e ppin ni yad be dag ni yad girdi’en Got. 11 Ba’aray rogon ni nge fil e pi’in ni ppin ban’en: ngar th’abed gulungrad ngar motoyilgad u fithik’ e sobut’an’. 12 Dab gu pag e pi’in ni ppin ni ngar machibgad fa ur gagiyeg niged e pumo’on; thingar ra pired ni kar th’abed gulungrad. 13 Ya Adam e ir e som’on nsunumiy, nge mu’ mfin nsunumiy Eva. 14 Ma gathi Adam e ni bannag; ya fa en ni bpin e ir e ni bannag nge th’ab e motochiyel rok Got. 15 Machane pi’in ni ppin e ku yad ra thap ngak Got ni fa’anra ur chuguliyed e bitir ma yad be par ni yad ba yul’yul’ ngak Got u fithik’ e michan’ rorad ngak ma yad be par nib t’uf Got rorad nge girdi’, ma yad ba thothup ma ba sobut’an’rad.

<- 1 TIMOTHY 11 TIMOTHY 3 ->