THESSALONIKA

Thessalonika e fare binaw ni ba ga’ ko nug nu Macedonia nib milfan nga Roma, me sunumiy Paul ba galesiya u rom ko ngiyal’ ni chuw u Filippi. Ma aram me togopluw boch e girdi’ nu Israel ngak ni bochan e ke awan’rad ngak Paul ya ke machibnag murung’agen Jesus u fithik’ e pi’in gathi yad piyu Israel, ni pi’in ni ka’ar motoyilgad ko machib rok yu Israel. Ma dakiyag ni nge par u Thessalonika me yan u rom nga Berea. Ma nap’an ni taw Paul nga Korinth me yib e babyor ngak nike pi’ Timothy ni be’ ni yow nga maruwel, ya nge nang Paul salpen girdi’en e galesiya nu Thessalonika.

Ngiyal’ nem e yoloy Paul e gin m’on e babyor rok ngak girdi’en e galesiya nu Thessalonika ni fan e nge pi’ e athamgil nga lanin’rad. Me weliy rogon e felfelan’ nike tay nga gelngin e michan’ nge t’ufeg rorad, nge rogon ni be pining e magaer ngak Got ni fan ngorad. I Paul e puguran ngorad rogon e wok rok ko ngiyal’ ni i par u fithik’rad, me ki pi’ e fulweg ko de’er rorad u murung’agen e wub ni bay tay Kristus. Yad ba’adag ni ngar nanged ko rayag e yafos ndariy n’umngin nap’an ngak girdi’en Kristus ni karm’ad u m’on ndawori sul Kristus riy fa dangay. Ma kur fithed ngak ko wu’in e ra sul Kristus. Nap’an ni fulweg Paul e de’er rorad me fonow nagrad ni ngar ul’ulgad ko maruwel rorad ma ngar pired nike l’agan’rad ma ke pagan’rad ngu’ur son niged e wub rok Kristus.

Tin ni bay riy

Tabolngin 1:1

Felfelan’ ni tay Paul nge rogon ni pining e magaer ngak Got 1:2—3:13

Fonow ni nga ni ngongol nrogon girdi’en Kristus 4:1–12

Machib u murung’agen e wub rok Kristus 4:13—5:11

Tin tomur e fonow 5:12–22

Tin tomur e thin 5:23–28

Ngak e girdi’ ko galesiya nu Thessalonika, ni yad girdi’en Got ni Chitamangiy nge Somol Jesus Kristus:

I Got e ngi i ayuwegmed ma be pi’ e gapas nga lanin’med.

2 Gubin ngiyal’ ma gamad ma pining e magaer ngak Got ni bochmed ni gimed gubin, ma gubin ngiyal’ ni gamad ma unegmed ko meybil romad. 3 Ya der m’ay u wun’mad u p’eowchen e Got rodad ni ir e Chitamangidad u rogon ni kam maruwelgad ko michan’ romed, nge rogon nike ngongliymed rogon nib t’uf Got romed nge girdi’ kam maruwelgad nrib gel, nge rogon ni kari l’agan’med ngak e Somol rodad i Jesus Kristus. 4 Pi walagmad ni girdi’en Kristus, gamad manang ni gimed ba t’uf rok Got ma ke mel’egmed ni ngam manged girdi’en. 5 Ya gu feked i yib ngomed fare Thin Ni Bfel’, ni gathi kemus ni ug weliyed, ya ku errogon gelngin Got nge fare Kan Nthothup nib chagil ngay, ma ku errogon nib mich u wun’mad nib riyul’. Gimed manang rogon pangimad ko fa ngiyal’nem ni ug moyed romed; ren’em e fan ngomed ni nge fel’ rogomed riy. 6 Ya mu folwokgad romad nge Somol; ni yugu aram rogon nib gel e gafgow ni mu ted mi gimed fol ko thin rok Got u fithik’ e felfelan’, ni felfelan’ nma pi’ fare Kan Nthothup. 7 Ma aram mi gimed dag e kanawo’ ngak urngin e girdi’ nike mich Kristus u wun’rad ni yad bay u Macedonia ngu Greece. 8 Ya fare thin ni murung’agen Somol e wear romed ngak e girdi’ ni gathi kemus nu Macedonia ngu Greece e wear nge mada’ ngay, ya ku errogon murung’agen rogon nib mich Got u wun’med nike wear nga urngin yang. Ere dakuriy ban’en ni kabay ni nggogned. 9 Urngin e pi girdi’ ney ma yad be weliy rogon ni mt’ufeged gamad ko fa ngiyal’ ni gu bad ngomed, nge rogon ni mpi’ed keru’med ko liyos nma meybil boch e girdi’ ngay ngam sapgad ngak Got, mi gimed pigpig ko bin nib riyul’ e Got ni ir e be par nib fos, 10 ma gimed be sonnag Fak ni nge sul u tharmiy — ni Fak ni Jesus, ni Got e faseg ko yam’, me ir e ke chuwegdad ko damumuw rok Got ni bay fini yib.

1 THESSALONIANS 2 ->