1 Fa’ani pilibthir Samuel me tay fa gali pumo’on ni fak ni yow e ngar mangew tapuf oloboch nu Israel. 2 Bin ilal rorow e Joel fithingan, ma bin bitir e Abijah; miyow par ni yow e tapuf oloboch u Beersheba. 3 Machane da ur folwokgow rok e chitamangirow; ya kemus ni salpiy e ba t’uf rorow, ma aram mu ur fekew puluwon e sasaliyeb ma da ur pithigew e oloboch nge yan i aw nrogon.

4 Ma aram me mu’ulung e pi’in yad be yog e thin rok piyu Israel ngranod ngak Samuel ni bay u Ramah, 5 me lungurad ngak, “Mu sap, kam pilibthir, ma gal fakam e darir folwokgow rom. Ere mu pilungnag be’ nge mang ir e i gagiyeg nagmad, ni bod rogon yugu boch e nam.” 6 Ma de fel’ u wan’ Samuel e tin karogned ngak ni nge turguy be’ nge par ni pilung rorad; aram me meybil ngak SOMOL, 7 me ga’ar SOMOL ngak, “Mmotoyil ko tin be yog e girdi’ ngom. Ya gathi gur e kar pi’ed keru’rad ngom; ya Gag e kar pi’ed keru’rad ngog ni nggu par ni pilung rorad. 8 Ya ka nap’an e ngiyal’ ni ba’aram ni gu fekrad nga wuru’ yu Egypt miyad cheal ngu’ur ted fan yugu boch e got; me ere chiney e yad be rin’ ngom e n’en ni yad be rin’ ngog ni gubin ngiyal’. 9 Ere motoyil ngorad, machane ngamog ngorad e tin nra yib riy ngorad ma ga weliy ngorad rogon e n’en nra i rin’ e pi pilung rorad ngorad.”

10 I Samuel e yog gubin e tin keyog SOMOL ngak ko fapi girdi’ ni yad be ning ngak ni nge turguy be’ nge mang pilung. 11 Me ga’ar Samuel ngorad, “Pilung romed e ba’aray rogon e tin bayi rin’ ngomed. Bayi fek pifakmed ni pumo’on ngar manged salthaw; ni boch i yad e ngi i yannag e pi chariot, ma boch e ngi i yan u daken e os, ma boch i yad e nge par nga m’on ngu’ur milgad ma be lay e pi chariot rok. 12 Bayi tay boch i yad ni nge mil fan 1,000 e salthaw ngak, ma boch i yad e nge me mil fan wugem e salthaw ngak. Ma pifakmed ni pumo’on e yad e ngu’ur gi’ed e milay’ rok, ma yad be kunuy wom’ngin, ma yad be ngongliy talin e cham rok nge talin e maruwel ni fan ko pi chariot rok. 13 Ma pifakmed ni ppin e dabisiy ni ngu’ur ngongliyed e florida mu ur lumgad ma yad be lith e flowa rok. 14 Ma bayi fek yungi flang romed nib th’abi fel’, nge fi’imed grape, nge fi’imed olive nge pi’ ngak e pi tolang ni bay nga tan pa’. 15 Ma bayi fek ragag e pasent ko grain nge grape romed nge pi’ ngak e pi tolang ni be par u tabinaw rok nge ku yugu boch e pi tolang ni bay nga tan pa’. 16 Ma bayi fek e pi tapigpig romed, nge tin th’abi fel’ e garbaw nge dongki romed nge tayrad ngu’ur maruwelgad rok. 17 Ma bayi fek ragag e pasent ko yu ran’ i gamanman romed. Ma bay mpired ni gimed e sib rok. 18 Ra yan i taw ko ngiyal’nem ma rib gel e gun’gun’ ni bay um ted ni bochan e pilung romed, niki gimed e mu duwgiliyed, machane SOMOL e dabi motoyil ko gun’gun’ romed.”

19 Ma fapi girdi’ e dar motoyilgad ko tin keyog Samuel ngorad. Miyad fulweg ngak ni lungurad, “Danga’! Gamad ba’adag reb e pilung, 20 ya nggu ta’ab rogon gad ko tin ba’aram e nam ni bay e pilung romad ngi i gagiyeg nagmad mi i gafaliymad ko pi mael nge rogon ni nggu chamgad.” 21 Me motoyil Samuel nga urngin e tin karogned ngak, ma aram me yan i weliy ngak SOMOL. 22 Me fulweg SOMOL ngak ni ga’ar, “Mu rin’ e n’en ni yad ba’adag ma ga pi’ be’ nge mang pilung rorad.” Ma aram me yog Samuel ngak urngin e pumo’on nu Israel ni ngar sulod nga tabinaw rorad.

<- 1 SAMUEL 71 SAMUEL 9 ->