1 Fa’ani yan i mael Saul ngak e pi Filistine nge sul, minog ngak ni bay David u daken e ted nib chugur nga Engedi. 2 Me fek Saul 3,000 ko tin th’abi falu’ e salthaw rok u Israel nge yan ni be changarnag David nge salthaw rok ko ngek ko fapi war ni kanog fithingan ni War ko Kaming ni Malboch. 3 Me yib Saul nga ba yiy nib chugur nga bogi chum ni tafen e saf ni bay u to’oben e kanawo’, me yan nga lan fare yiy ni nge pithig rogon. Ma bay David nge salthaw rok ni kar m’onod kar mithgad ngalan fare yiy. 4 Me lungurad ngak David, “Irera’ e ngiyal’ ni ngam og ngak! Ya keyog SOMOL ngom ni bayi pi’ e to’ogor rom ngalan pa’am ngam rin’ e tin ni ga ba’adag ngak.” Me pach David i yan nge th’ab bang ko fare mad rok Saul nib n’uw nde nang Saul. 5 Machane me dabuy David e ren’em nike rin’, 6 me ga’ar ngak e salthaw rok, “I SOMOL e nge ayuwegneg nge dab gu rin’ ban’en ngak e masta rog ni SOMOL e turguy ni nge mang pilung! Thingar dab gu rin’ bochi ban’en ngak, ya ir fare pilung ni SOMOL e ke turguy!” 7 Ma aram me yog David ngak e salthaw rok ndab ra oggad ngak Saul.

Me sak’iy Saul, nge chuw u lan fare yiy nge yan. 8 Me lek David nga wean nge pining ni ga’ar, “Pilung rog!” Me sap Saul nga tomur me siro’ David ngak nike tay fan, 9 me ga’ar, “Mangfan ni ga be motoyil ngak e pi’in yad be yog ngom ni gu be guy rogon ni nggu rin’ ban’en ngom? 10 Gur ma kam guy ni daba’ e ke pi’em SOMOL nga pa’ag u lan fare yiy. Yog boch e salthaw rog ngog ni nggu li’em nga mum’, machane me kireban’ug ngom, mu gog ngorad ndariy bochi ban’en ni nggu rin’ ngom, ya gur fa’anem ni SOMOL e duwgiliyem ni ngam mang pilung. 11 Chitamag, mu sap ngabang e mad rom ni ba’aray u pa’ag! Gu th’ab nggu fek machane da gu li’em nga mum’. Re gi mad ney e susun e nge micheg nga lanin’um ndagur finey ni nggu togopluw ngom fa gu thang e fan rom’, yugu aray rogon ni ga be gayeg ni ngam thang e pogofan rog, ndariy ban’en nib kireb ni kug rin’ ngom. 12 Mang e yigi pufthin nagdow SOMOL ko mini’ e arodow nib kireb! Mang e yigi gechig nagem ko tin kam ngongliy nib togopluw ngog, ya gag e dariy bochi ban’en ni gu ra rin’ ngom. 13 Bay ba thin ni yima yog kakrom ni yima ga’ar, ‘Tin nib kireb ban’en e pi’in nib kireb e yad ma rin’.’ Ere dab gu ngongliy e kireb ngom. 14 Pilung nu Israel, a mu guy e ren’en ni ga be guy rogon ni ngam li’ ngem’! Mu sap ko ren’en ni ga be lol’oeg! Ba pilis nib yam’, ara ba yanuk! 15 I SOMOL e bayi pufthin, me duwgiliy ko mini’ e arodow nib kireb. Mang e yigi changar nga fithik’ e re pa’ i oloboch ney, me yoror rog, me ayuwegneg u pa’am.”

16 Fa’ani mu’ David ko welthin, me ga’ar Saul, “David ni fakag, mog, ri gur e yer?” Me tabab Saul ko meyor. 17 Me ga’ar ngak David, “I gur e gab mat’aw, me gag e gub kireb. Rib fel’ e tin ga be rin’ ngog, me gag e gu be rin’ e kireb ngom! 18 Daba’ e kamdag ngog rogon feni fel’ e tin ga be rin’ ngog, ya yugu aram rogon ni pi’eg SOMOL nga pa’am ma da mu thang e fan rog. 19 Uw urngin yay nra kol be’ e to’ogor rok miki pag nge yan ndabi li’? I SOMOL e nge ayuwegnem ni bochan e tin kam rin’ e daba’. 20 Chiney e kari gu nang ni bay mmang pilung nu Israel, ma bayi par e re lungun nem rom nge mang gur e mu gagiyegnag. 21 Machane ngam micheg ngog u fithingan SOMOL ndab mu thang owchen e pi’in owcheg, nge par fithingag nge fithingan e tabinaw rog ndab ni pag talin.” 22 Me micheg David ngak nra rin’ ni aram rogon.

Ma aram me sul Saul nga tabinaw rok, me sul David nge salthaw rok ko gin yad be mith riy.

<- 1 SAMUEL 231 SAMUEL 25 ->