1 KINGS 4

Pi tolang ko salthaw rok Solomon

1 I Solomon e pilung u ga’ngin yu Israel, 2 irera’ e pi tolang ni yad bay u tan pa’:

En ni prist: Azariah nib mo’on ni fak Zadok

3 Tayol u kort: Elihoreph nge Ahijah, ni l’agruw i pumo’on ni fak Shisha

En ma cha’riy babyoren ban’en: Jehoshafat nib mo’on ni fak Ahilud

4 En nib ga’ ko salthaw: Benayah nib mo’on ni fak Jehoyada

Prist: Zadok nge Abiathar

5 En th’abi ga’ u fithik’ fa pi’in yad bay u tan pa’: Azariah nib mo’on ni fak Nathan

Tafnow rok e en pilung: Zabud ni prist nib mo’on ni fak Nathan

6 En nib milfan e pi tapigpig nu lan tafen pilung ngak: Ahishar

En nma gagiyegnag e tin th’abi gel e maruwel: Adoniram nib mo’on ni fak Abda

7 Me mel’eg Solomon ragag nge l’agruw i pumo’on ni ngar manged owchen e am ko yungi nug nu lan yu Israel. Yad e ngu’ur pi’ed e ggan u lane yungi nug rorad ni fan ngak e en ni pilung nge chon e tabnaw rok, ra reb fapi pumo’on ma ireram e maruwel rok u reb e pul u lan reb e duw. 8 Ba’aray fithingan e re ragag nge l’agruw i tolang ney nge yungi nug ni bay u tan pa’rad:

Benhur: Efraim ni go’ burey

9 Bendeker: fapi binaw nu Makaz, Shaalbim, Beth Shemesh, Elon, ngu Beth Hanan

10 Benhesed: fapi binaw nu Arubboth ngu Sokoh nge ga’ngin yu Hefer

11 Benabinadab, ni i leengiy Tafath ni be’ ni bpin ni fak Solomon: ga’ngin e nug nu Dor

12 Baana nib mo’on ni fak Ahilud: fapi binaw nu Taanak, Megiddo, nge ga’ngin yang e nug u charen yu Beth Shean, nib chugur ko fachi binaw nu Zarethan, ni bay nga yimuch ko fachi binaw nu Jezreel, me yan nge taw ko fare binaw nu Abel Meholah nge fare binaw nu Jokmeam

13 Bengeber: binaw nu Ramoth u Gilead, nge fa yochi binaw nu Gilead nib milfan ngak fare ke girdi’ rok Jair, ni be’ ni owchen Manasseh, nge nug nu Argob u Bashan, nel’ i ragag e pi binaw ni gagang’ nem, ni kan ubung e rungrung riy nib tolang ni fan ko mael, ni yuley i wasey ni bronze e bay ko garog riy

14 Ahinadab nib mo’on ni fak Iddo: nug nu Mahanaim

15 Ahimaaz, nike le’engiy Basemath, ni ku reb e bpin ni fak Solomon: gin tafen Naftali

16 Baana nib mo’on ni fak Hushai: Asher nge binaw nu Bealoth

17 Jehoshafat nib mo’on ni fak Paruah: gin tafen Issakar

18 Shimei nib mo’on ni fak Ela: gin tafen Benjamin

19 Geber nib mo’on ni fak Uri: nug nu Gilead, niki i gagiyegnag Sihon ni Pilung nu Amor nge Og ni Pilung nu Bashan

Ragag nge l’agruw i girdi’ ney, machane kabay reb e governor ni ir e ga’ u ga’ngin e gi but’ ney.

Gagiyeg rok Solomon ni i mon’og i yan

20 Girdi’ nu Judah ngu Israel e yad ba yo’or ni bod urngin e yan’ nu dep’el’ay; ur abichgad ma yad be garbad, mu ur pired ni yad bfelfelan’. 21 Gagiyeg rok Solomon e bmu’un urngin e pi nam ni tabab ko fare Lul’ ni Eufrates nge mada’ nga Filistia nge fare mathil nu Egypt. U ra pi’ed e tax rorad ngak mu ur pired u tan pa’ ni n’umngin nap’an e yafos rok.

22 Pin’en nib t’uf rok Solomon ni gubin e rran e 150 e barril e flour ni kan bilig nrib fel’ rogon, nge 300 e barril e flour nde fel’ i bilig; 23 ragag e garbaw ni un duruw’iy u chumol, rliw’ e garbaw ni un duruw’iy u daken e flang ko gamanman, nge 100 e saf, nda nir theeg e pi gamanman ni deer, gazelles, roebucks, nge nimen.

24 Me gagiyegnag Solomon fare nam ni ga’ngin u ba’ ni ngal fare Lul’ ni Eufrates, ni tabab u Tifsah u Eufrates nge yan ko ngal nge mada’ ko fare binaw nu Gaza. Urngin e pilung ko ngal u Eufrates e go’ yad bay u tan pa’, ma gubin e pi nam ni yad ba liyeg e bfel’ thilrad. 25 Ma n’umngin nap’an ni i par nib fos, ma girdi’ u ga’ngin yang u lan yu Judah ngu Israel e ra pired nde buch ban’en rorad, ra reb e tabnaw ma bay e grape nge gek’iy ni fig ni fi’in.

26 Me Solomon e immoy 40,000 e chumol rok ni fan ko os rok nma girengiy e chariot nge 12,000 e os ni fen e mael. 27 Ma fa ragag nge l’agruw i tolang ko am rok, e ra bagyad ma re pul nike pi’ ngak ni nge pi’ e ggan riy ngak Solomon ni Pilung, ni urngin nib t’uf rok nge urngin e pi’in yad ma un ko abich u lan e naun rok e pilung; gubin ngiyal’ ma yad ma pi’ urngin e tin nib t’uf. 28 Ma ku ra reb fapi tolang ko am ma ku ra pi’ e barley nge pan ni fan ko pi os nma girengiy e pi chariot nge fan ko gamanman ni yibe maruwel ngorad ko gin’en ni kanog ngorad ni ngar feked ngay.

29 Got e pi’ ngak Solomon e gonop nge tamilangan’ ni kay gi pag rogon, nge llowan’ ni kay gi ga’ ni dabkiyag i foleg. 30 Kab gonop Solomon ngak e pumo’on ni gonop u lan e ngek ara pumo’on ni gonop nu Egypt. 31 I ir e th’abi gonop u fithik’ gubin e girdi’: ba gonop ngak Ethan ni be’ nu Ezrah, nge Heman, Kalkol, nge Darda, ni bogi pumo’on ni pifak Mahol, i garer bugwan u lan urngin e nam nib liyeg. 32 Me kameg dalip e bbiyu’ yu bugithin nib machib ma bay e gonop u fithik’ ma bpag e bbuyu’ e tang niki tunguy. 33 Me weliy murung’agen e gek’iy nge garger, ni mus ko fapi gek’iy ni cedar nu Lebanon me mada’ ko gek’iy ni hyssop nma tugul u daken e yoror; me weliy murung’agen e gamanman, arche’, gamanman nma gararaw u maday ma ku ma par u arow, nge nig. 34 Ma pi pilung nu fayleng ni ga’ngin e go’ rrung’aged murung’agen feni gonop Solomon mu ur l’oeged e girdi’ ngu’urbad ra motoyilgad ngak.

<- 1 KINGS 3 1 KINGS 5 ->