1 Me weliy David ni Pilung ngak fare ulung i girdi’ ni gubin ni ga’ar: “Fakag i Solomon e ir e cha’ nike mel’eg Got, machane dawri ilal ma dawori yo’or ban’en nike nang rogon. Maruwel ni ngan rin’ e rib ga’, ni bochan e gathi ba naun ni tafen e pilung ni girdi’, ya ba tempel ni fen SOMOL ni Got. 2 Karimus rogog i t’ar madlin urngin ban’en ni fan ko fare Tempel — gol, silber, bronze, wasey, ren, nge malang nib tolang pulwon nge tin kan th’ab ni nge mang nunuw, nge tin ngan fal’eg ya’an ban’en riy, nge malang ni marble ni yo’or. 3 Ma ku gon’ nga daken e tiney ni gubin e tirog e silber nge gol ni bochan e rib t’uf rog e Tempel rok Got. 4 Kug pi’ ra’ay nge ragag nge lal e ton e gol nge l’agruw mir’ay nge nel’ i ragag nge lal e ton e silber ni ngan fanay ko nunuw u downgin e rungrung ko fare Tempel 5 ma ku fan nga urngin e pin’en ni nge ngongliy fapi pumo’on ni yad ba salap ko maruwel. Ere ku mini’ e bm’agan’ ngay ni nge pi’ reb e maligach ngak SOMOL?”

6 Ma aram e pi’in lolgen e yuke girdi’, nge pi tayugang’ ko pi ganong, nge pi tolang ko fa raba’ i salthaw, nge pi’in ma tay murung’agen gubin ban’en nib milfan ngak e en pilung nrogned ni ngar pi’ed 7 e tin ni ba’aray ni fan ko maruwel ko fare Tempel: 190 e ton e gol, 380 e ton e silber, nge 675 e ton e bronze, nge 3,750 e ton e wasey. 8 Pi’in immoy e pi malang rorad nib tolang pulwon e ra pi’ed ngan tay ko machaf u Tempel, ni Jehiel ni be’ ko Levite ko fare ganong rok Gershon e ir e ma tay murung’agen. 9 I pi’ e girdi’ e pin’ey ngak SOMOL nrib m’agan’rad ngay, ma ri yad ba felfelan’ ngay ni bo’or ban’en ni kan pi’. Me David ni Pilung e riki felfelan’ nib gel.

10 U rom u p’eowchen fare ulung ni ga’ngin me pining David ni Pilung e sorok ngak SOMOL. I ga’ar, “SOMOL ni Got rok e chitamngimad i Jakob, ngu’un pining e sorok ngom ni manechibog ko pichibod! 11 Ba gil bugwam ma ga ba gel, mab sorom, ma dariy thibngim ma gil’ilungum e ba polo’ u fayleng. Gubin ban’en nu tharmiy ngu fayleng ni go’ tirom, me gur e pilung, tagagiyeg ni th’abi tolang u gubin e gagiyeg. 12 Gubin e fel’ rogon nge fla’ab nma yib rom; ga ma gagiyegnag gubin ban’en nga gelngim nge fenam gel; ma rayag rom ni ngam gilnag bugwan be’ ma ga pi’ gelngin. 13 Got romad, chiney e gamad be pining e magaer ngom, ma gamad be pining e sorok nga fithingam nib mathangeluwol.

14 “Yug aray rogon ma pi girdi’ rog nge gag e ri dabiyag ni gu pi’ed ban’en ngom, ni bochan e gubin ban’en ma tow’ath ni yib rom, ma n’en ni gamad be fulweg ngom e katirom. 15 SOMOL, ga manang ni gamad ma par ko biney e yafos ni bod e girdi’ nu boch e nam ara bogi milekag, bod rogon e pi chitamngimad kakrom. Pi rran romad e bod bangi taglul’ ni be m’ay, ma dabiyag ni gu milgad ko yam’. 16 SOMOL ni Got romad, ku gu kunuyed nga ta’bang e pin’en ni aray urngin ni ngan toy ba tempel riy ni ngan tayfan fithingam nib thothup, machane gubin ni gur e yib rom ma gubin ni gur e ba milfan ngom. 17 Gu manang ni ga ma changar nga gumircha’en gubin e girdi’ ma bfel’ u wun’um e girdi’ ni bfel’ laniyan’. Gu be pi’ gubin e pin’ey ngom nrib fel’ lanin’ug ma kug guy rogon e girdi’ rom ni kar mu’ulunggad e ngaray nib felfelan’rad ngay ni ngar pi’ed e pi maligach rorad ney ngom. 18 SOMOL ni Got rok e pi chitamngimad i Abraham, Isaak, nge Jakob, mu tay e biney e tafinay ni bfel’ ni gubin ngiyal’ u lan gumircha’en e girdi’ rom ma ga tayrad ni gubin ngiyal’ ni yad ba yul’yul’ ngom. 19 Ma ga pi’ ngak Solomon ni fakag reb e leam ni bfel’ ni ngi i fol u gubin ban’en ni kamog ni ngan rin’, ma nge toy fare Tempel ni ku gu t’ar madlin ku gu tay.”

20 Ma aram me yog David ngak fapi girdi’ ni ga’ar, “Ngu’um pininged e sorok ngak SOMOL ni Got romed!” Ma fa ulung i girdi’ ni gubin e ra pininged e sorok ngak SOMOL, ni Got rok e pi chitamngirad, miyad siro ni yad be liyor ngak SOMOL nge fare pilung.

21 Me yan i reb e rran riy miyad li’ e gamanman ni maligach, ni yad be ognag ngak SOMOL, miyad pi’ ngak e girdi’ ni ngar ked. Mu ku ni chagiy ngay reb e bbiyu’ e garbaw ni pumo’on, nge reb e bbiyu’ e saf ni pumo’on, nge reb e bbiyu’ pifak e saf, ngar pi’ed ni maligach, ra urfiyed ni ka yu reb u daken fare altar. Mu ku ra feked i yib e pi maligach ni wayin. 22 Ere rofen nem e ri yad ba felfelan’ ni yad be abich ma yad be garbad u p’eowchen SOMOL.

Ma aram e yay ni l’agruw yay ngay nra weliyed u fithik’ e girdi’ ni Solomon e pilung. U fithingan SOMOL e ra gapgep niged riy ni nge mang ir e gagiyeg nagrad me Zadok e nge mang prist. 23 Ma aram me thilyeg Solomon David ni chitamngin u daken fare chiya ko pilung nike tay SOMOL. Ir reb e pilung ni bfel’ rogon gubin ban’en rok, ma fare nam nu Israel ni ga’ngin e i fol rok. 24 Gubin e pi tolang nge pi salthaw, nge gubin e tin kabay e pagel ni pifak David, nra micheged ni yad ra yul’yul’ ngak Solomon nike mang pilung. 25 Me tay SOMOL fare nam ni ga’ngin ni ka ra ngatgad ngak Solomon, me gilnag bugwan Solomon ni dariy reb e pilung nike gagiyeg u Israel nra ta’reb rogon ngak.

26 David nib mo’on ni fak Jesse e i gagiyeg u daken yu Israel ni ga’ngin 27 ni aningeg i ragag e duw. I gagiyeg u Hebron ni medlip e duw mu Jerusalem e guyey nge dalip e duw. 28 Me yim’ ni kari pilbithir nike yo’or i yo’or talin ni ir be’ ni yima tayfan, me Solomon nib mo’on ni fak e yib nga luwan ko pilung. 29 Murung’agen David ni Pilung ko ngiyal’ ni tabab ko gagiyeg nge mada’ ko ngiyal’ ni tal e kan yoloy ngalan chepin fa dalip i profet ni aram Samuel, nge Nathan, nge Gad. 30 Pi babyor ney e be yog rogon ni i gagiyeg, nge rogon feni gel gelngin, nge gubin e tin i yib ngak, nge tin i yib nga daken yu Israel, nge pi nam nib liyeg.

<- 1 CHRONICLES 28