Alatala falan naxan tixi Xadiraki yamanan xili ma,

a Damasi taan li.

Amasɔtɔ Alatala gbeen nan adamadiin bonne ra,

alo Isirayila bɔnsɔnne birin.

2 A mɔn xa Xamata taan li,

Damasi danna,

e nun Tire taan nun Sidɔn taana,

kolonna gbo dɛnaxan yi.

3 Tire taan bata yinna ti,

a bata gbetin malan

alo burunburunna.

A xɛmaan gbo alo kira xɔn borona.

4 Koni Marigina a bama a yii nɛn,

a yi a yinna radin baani,

tɛɛn yi taan gan.

5 Asikalɔn kaane na toma nɛn e gaxu.

Gasa kaane fan gaxuma nɛn e xuruxurun,

e nun Ekirɔn kaane,

amasɔtɔ e yigitɛgɛma nɛn.

Mangayaan ɲanma nɛn Gasa taani,

Asikalɔn taani gelima nɛn.

6 Siya basanxin fa Asadodi taan tongoma nɛn,

n yi Filisitine wason kala.

7 N suben bama nɛn e dɛ wunla naxan yi,

e nun donse haramuxine.

E dɔnxɛn naxanye na lu,

ne fan findima nɛn en ma Ala gbeen na.

E yi lu alo Yuda xabila kedenna.

Ekirɔn kaane luma nɛn alo Yebusu kaane.

8 Ganla naxanye danguma

hanma naxanye fama,

n daaxama nɛn n ma yamaan makantandeni ne ma.

E mi luma fitina muxu yo a nɔɔn bun,

amasɔtɔ iki n yɛɛn tixi e ra.

9 Siyon kaane, ɛ ɲaxan han!

Yerusalɛn kaane, ɛ xuini te sɛwani.

Ɛ a mato!

Ɛ mangan fama ɛ ma.

A tinxin. A bata rakisi.

A limaniya.

A fama sofanla nan fari,

sofali diina, sofali gilɛn diina.

10 N yɛngɛ so wontorone bama nɛn Efirami yi

e nun soone Yerusalɛn taani.

Yɛngɛ so xanle kalama nɛn.

A tan bɔɲɛ xunbenla ralima siyane ma nɛn.

A mangayaan xuyama ayi nɛn

keli fɔxɔ igen ma han fɔxɔ igena,

keli baan ma han bɔxɔn danna.

11 Ɛ tan mabinni,

n na ɛ muxu suxine xunbama nɛn

en ma layirin wunla fe ra

naxanye ramaraxi alo kasorasane yili kui xareni.

12 Ɛ mɔn xa so taa makantanxini,

ɛ tan kasorasaan naxanye yigi saxi.

N mɔn xa a rali ɛ ma to:

n ni i saranma nɛn dɔxɔɲa ma firin.

13 Amasɔtɔ n bata Yuda yitɔn alo xanla,

Efirami yi lu alo n ma xalimakunla.

Siyon, n ni i ya dii xɛmɛne rakelima nɛn Girɛki kaane xili ma.

N yi ɛ lu alo sofana silanfanna.*Silanfanna: Sofane yɛngɛso dɛgɛmana.

14 Alatala a makɛnɛnma nɛn e xun ma,

a xalimakunla yi siga alo kuye sarinna.

Marigina Alatala xɔtaan fema nɛn,

a fa yiifari ma tule foyeni.

15 Alatala Sɛnbɛn Birin Kanna e rakantanma nɛn.

E e dɛgema nɛn,

e sigan ti lantan gɛmɛne fari.

E e minma nɛn sɛwani,

e sarin alo dɔlɔ minne.

E lugo alo goron nafexina

alo saraxa ganden tongonne wasan wunla ra kii naxan yi.

16 Alatala, e Ala e rakisima nɛn na lɔxɔni,

alo a xuruse kuruna.

E nɔrɔxin yi lu a yamanani

alo gɛmɛ faɲine mangaya taxamaseri kɔmɔtin ma.

17 E tofanma nɛn han!

E rayabuma nɛn han!

Balon banxulanne ragboma nɛn,

minse faɲine yi sungutunne rayabu.

<- Nabi Sakari Sora 8Nabi Sakari Sora 10 ->