2
Ala bata a yamaan kala
1 Ee! Marigin bata a xɔlɔn nagodo Siyon taan ma alo kundana,
a yi Isirayilaa binyen nadin bɔxɔni
keli kore xɔnna ma!
A san tidena fe mi rabiraxi a ma a xɔlɔn lɔxɔni.
2 Marigin bata Yaxuba bɔnsɔnna dɔxɔdene birin naxɔri,
a mi kininkinin!
A fitinaxin bata Yuda yamanan taa makantanxine birin kala.
A bata e mangayaan nun e kuntigine birin nabira
a yi e rayarabi.
3 A bata Isirayila yamaan sɛnbɛn birin kala a xɔlɔ gbeeni.
Yaxun to so,
a mi tin a yamaan maliyɛ.
Koni a xɔlɔn luxi nɛn
alo a tɛɛ gbeen nan nakeli Yaxuba bɔnsɔnna xili ma
naxan a rabilinna birin gan.
4 A bata a xanla bandun alo yaxuna,
a yi a yiifanni te e xili ma alo yɛngɛfana.
Muxun naxanye birin nayabu, a yi ne birin faxa.
A bata a xɔlɔn nagodo Ala Batu Banxin ma Siyon taani
alo tɛɛna.
5 Marigin bata lu alo yaxuna.
A bata Isirayila yamanan naxɔri.
A bata a manga banxine birin naxɔri,
a yi a taa makantanxine birin kala.
A bata wugan nun sunun nagbo ayi Yuda bɔnsɔnna xa.
6 A bata so a sansanna kui karahanni,
a yi en nun a tan naralanden kala.
Alatala bata sali lɔxɔne nun Matabu Lɔxɔne raɲinan Siyon kaane ra,
a fitinaxin yi a mɛ mangane nun saraxaraline ra a xɔlɔni.
7 Marigin bata a mɛ a saraxa ganden na,
a yi a yire sariɲanxin nabeɲin.
A bata taan manga banxine lu yaxune yii.
Yaxune bata e sɔnxɔ xuini te Alatalaa banxini
alo sali lɔxɔn nan yi a ra nun.
8 Alatala bata a ragidi
a xa Siyon taan makantan yinne rabira.
A bata lutin bandun alogo a xa e birin sa yɛlanni
a mi a yɛtɛ ratangama a raxɔri feen ma.
A bata taan makantan yinne radinɲɛ ayi, e birin yi bira.
9 Taan so dɛɛne bata godo bɔxɔn bun.
Ala bata e balan wurene bolon, e kala.
A mangan nun a kuntigine bata xali siya gbɛtɛne konni,
sariya mi fa na sɔnɔn!
Hali a nabine yɛtɛɛn mi fa fe toon tima sɔnɔn fata Alatala ra.
10 Siyon taan fonne dɔxi bɔxɔni, e birin dunduxi.
E bata burunburunna sa e xunni,
e sunu dugine ragodo e ma.
Yerusalɛn sungutunne bata e xun sin bɔxɔn ma.
11 N yɛɛne bata xadan wugɛ,
n kuina a raminima.
N bɔɲɛn bata kala
masɔtɔ gbalon ma naxan n ma yamaan sɔtɔxi.
Bayo diidine nun dii futene fugama a ra taan yama malandene yi.
12 E e ngane maxɔdinma, e naxa,
“Donseen nun minseen minɛn?”
E fugama a ra taan yama malandene yi
alo muxu maxɔlɔxine,
e niin bama e ngane yii kanke.
13 N mi fa a kolon n naxan falɛ ɛ xa.
Yerusalɛn kaane, n na ɛ sama nanse ma?
N na ɛ misalɛ seen mundun ma, n yi ɛ madɛndɛn,
ɛ tan Siyon taa faɲi kaane?
Bayo i ya tɔrɔn gbo alo fɔxɔ igena.
Nde nɔɛ i dandanɲɛ?
14 Ɛ nabine wule fe toone nun fe fuune nan tun yɛbaxi ɛ xa alo xiyene.
E mi ɛ hakɛne makɛnɛnxi ɛ xa alogo ɛ xa ratanga konyiyaan ma.
E waliyiya wule falane nun yanfa falane nan tun tixi ɛ xa.
15 Dangu muxune birin e yiin bɔnbɔma ɛ fe ra,
e kolin ɛ kala kiin ma,
e yi e xunni maxa Yerusalɛn kaane magele feen na.
E yi a fala, e naxa, “A yi falama taani ito nan ma ba,
fa fala a taan naxan ma tofanna kamalixi,
bɔxɔn birin sɛwa xunna?”
16 Ɛ yaxune birin dɛni bixi ɛ xili ma han!
E kolinma ɛ kala kiin ma, e yi e ɲinne raxin ɛ xili ma
e naxa, “Nxu bata e gerun!
Nxu yi lɔxɔni ito nan mamɛma yɔ!
A bata a li, nxu bata a to!”
17 Alatala naxan nagidi,
a bata na liga.
A bata a falan nakamali,
a feen naxan yamari xabu a fɔlɔni.
A bata halagin ti kininkinintareyani.
A bata tin
ɛ yaxune yi e xunnayeren ɛ xun na,
a yi ɛ yaxune sɛnbɛn fari sa.
18 Yamaan bata e wuga xuini te
Marigin ma e bɔɲɛn ma feu!
Hali ɛ taan yinna, a xa a yɛɛgen namini
kɔɛɛn nun yanyina alo baa igena.
Ɛ nama ɛ matabu, ɛ yɛɛgen nama dan de!
19 Ɛ keli, ɛ gbelegbele kɔɛna ngaan na.
Ɛ yi ɛ bɔɲɛ yi feen fala Marigin yɛtagi alo ɛ igen nan bɔxɔnma.
Ɛ yiine ti a xa alogo a xa ɛ diidine rakisi
naxanye fugama a ra kamɛn ma kira xunne ma.
20 Alatala, a mato, i yi a rakɔrɔsi
i ito ɲɔxɔnna ligaxi muxun naxanye ra!
Ɲaxanle lan ba, e xa e bari diine don
e dii ɲɔrɛn naxanye xanuxi?
A lan ba, i ya saraxaraline nun i ya nabine xa faxa
Marigina yire sariɲanxini?
21 Diidine nun fonne birin biraxi bɔxɔni kirane xɔn.
N ma sungutunne nun n ma banxulanne bata faxa yɛngɛni.
I bata faxan ti i ya xɔlɔ gbeen lɔxɔni,
i yi muxune kɔɛ raxaba hinantareyani.
22 I bata gaxun nafa n ma sa keli yiren birin yi,
alo yamaan na maxili sali lɔxɔni.
Alatalaa xɔlɔn lɔxɔni,
muxu yo mi a yimini,
muxu yo mi lu a nii ra.
N naxanye xanuxi, n diidin naxanye maxuru,