1 Efirami bɔnsɔnna n nabilinxi wulen na.

Isirayila yamana n yanfama.

Koni Yuda kaane mɔn biraxi Ala nan fɔxɔ ra,

e lannayaan nabama e nun sariɲandene.

2 Efirami bɔnsɔnna e masoma fe fufafune nan na,

a luxi alo a foyen nan sagatanma fɛriɲɛn gbɛn!

A wulen nun fe ɲaxin nawuyama ayi.

A layirin xidima e nun Asiriya yamanan tagi,

a Oliwi turen soma Misiran mangan yii.

3 Alatala Yuda muxune makitima nɛn,

a Yaxuba bɔnsɔnna wali ɲaxin saranma a ra nɛn,

a yi a saren fi a kɛwanle ra.

4 A a nga kui,

Yaxuba yi a tada santinban suxu,[a]

a to fori,

e nun Ala yi gerenna so.

5 E nun malekan yi yɛngɛn so,

a nɔɔn sɔtɔ.

A yi wuga, a yi mayandin ti.

Yaxuba Ala li Betɛli nin.

E nun Ala falan ti mɛnna nin.

6 Alatala, Ala Sɛnbɛn Birin Kanna nan yi na ra.

Xili gbee kanna nan Alatala ra.

7 I tan xa fa i ya Ala ma,

i hinanɲɛ ayi,

i sariyan suxu.

I xaxili ti i ya Ala ra waxatin birin!

8 Isirayila yanfan tima

alo sarematina,

ligase ɲaxin naxan yii.

Muɲan nafan a ma.

9 Efirami bɔnsɔnna bata a fala,

“N bata bannaya han!

N bata nafunla sɔtɔ,

koni n ma wanla tɔnɔn nan a ra!

Hakɛna hanma yulubi yo mi n ma.”

10 Alatala nan n tan na, i ya Ala,

naxan i rafaxi keli Misiran yamanani.

N mɔn i radɔxɔma nɛn bubune bun

alo yamaan yi kii naxan yi na waxatini.

11 N bata falan ti nabine xa,

e yi toone ti n xɔn.

N bata sandane sa nabine xa.

12 Xa suxurene Galadi yi,

e yɛtɛɛn luma nɛn fuu!

E ɲingene bama saraxan na Giligali yi,

koni e saraxa gandene luma nɛn

alo gɛmɛ malanxine xɛɛne ma.

13 Yaxuba a gixi nɛn

siga Arami yamanani,

Isirayila yi wanla kɛ a ɲaxanla futu seen na,

a yi xuruseene kantan.

14 Alatala Isirayila raminixi nɛn

Misiran bɔxɔni nabiin xɔn,

a Isirayila kantan nabiin sabun na.

15 Koni Efirami yi Ala raxɔlɔ gbeen ti.

Nanara, a marigin mi a mafeluma a faxa tixin na,

a a xɔnnantenyaan naxɛtɛma a ma nɛn.

<- Nabi Hose Sora 11Nabi Hose Sora 13 ->