MATHAYI 4

Kuhukumuka kwa Yesu

(Mlk 1:12-13; Luk 4:1-13)

1 Hanga Yesu bamunatisi, kwena Kitembu, muna nganga, ndangu bamuhukumuna kwena kiphidi-mutu[a]. 2 Amana kunima kuzila kudya bilumbu makumaya bya mwini yi phipha makumaya, wáyuka nzala. 3 Amana muhukumuni[b] wisa bwesuka, wámuzimbwala: «Yukani [c]Mwana wa Nzambi wenina, zimbula kwena matadi mama, makituka mapha.» 4 Amana, yandi wámuvutwala: «Tala mana másonama: "Mutu kazingilaku mu madya lwesi, kaasi mu ndinga yosu yina yisi lubuka mu munwa wa Nzambi".»

5 Hanga Kiphidi-Mutu wumunati ku Yelusalemi, mbanza yatoma, wumunenginiki hana kisoka kya mudilu wa nzu ya Nzambi, 6 amana wumuzimbwadi: «Yukani Mwana wa Nzambi wenina, tsutsuka ha tsi, mukuma tala mana masonama:»

"Kahana kwena banzyo bandi miswa kikuma kya ngeyi,

amana bakwisa kuyaka muna moku ma bawu,

ndangu kitambi kyaku kidikhukulaku ku tadi dimosi."

7 Yesu wumuvutwadi: «Tala mana másonama hika: "Wamekaku Pfumu, Nzambi waku."»

8 Kiphidi-mutu wámunata hika ha mongu wa kaleyi lawu, wámusongila bipfumu byosu bya tsi yi khembu ya byawu, 9 amana wumuzimbwadi: «Yikuheka bima bina byosu, yuka ni wabwa mu bitambi byama mu kufukama ku thwala meni.» 10 Hanga Yesu wumuzimbwadi: «Katuka Satana! Mukuma tala mana másonama: "Ku thwala Pfumu, Nzambi waku, lwesi wafúkama amana yandi lwesi wasámbila."» 11 Hanga kiphidi-mutu wumusisi. Amana banzyo bábwesuka amana bekina musadila.

Yesu wuyandikini kisalu kyandi ku Ngadidi

(Mlk 1:14-15; Luk 4:14-15)

12 Amana buna káyuka ni Yowani bamulambudi, hanga wáyombuka ku Ngadidi. 13 Amana wákatuka ku Nazaleti, wenda kala ku Kafadinawumu, ku mukinda wa yanga dya mbuta, muna milambu mya Zabuloni yi Nefutadi. 14 Ndangu dyalungila dyambu dina bázimbula mwena mbikudi Yesaya:

15 «Tsi ya Zabuloni, tsi ya Nefutadi,

mukinda wa nzadi, yi kuna sambwa dya Yolutani,

Ngadidi ya makanda ma batu!

16 Kanda dina dyákala mu phipha,

dimoni mutemu wa lawu!

Yi kwena bana bázakala mu kinzunga yi mu kivula kya lufwa,

mutemu wumosi wumoniki kwena bawu!»

17 Tuka tangwa meni dina, Yesu wáyandika kusamuna yi kulonga: «Balumunenu mbundu zenu mukuma Kipfumu kya mazilu kibwesukini!»

Balonguki baya batheti ba Yesu

(Mlk 1:16-20; Luk 5:1-11)

18 Amana Yesu buna kakala kangala muna mukinda wa yanga dya Ngadidi, wámona baphangi bodi, Simoni, wuna bisi tela Phetelu, yi Andele myaki wandi; bakala losa wanda dimosi muna yanga dya mbuta, mukuma balobi bákala. 19 Hanga wubazimbwadi: «Alwisa ndanda, amana yilukitula balobi ba batu.» 20 Amana bawu, muna mbala mosi, básisa mawanda, benda mulanda. 21 Amana buna kaphusana, wámona baphangi bahika bodi, Zyaki mwana wa Zebeteya yi Yowani, phangi wandi, bákala muna mudimba yi tata wa bawu Zebeteya, bakala yilulula mawanda ma bawu. Yesu wabatela; 22 Amana bawu muna mbala mosi básisa mudimba yi tata wa bawu, amana bámulanda.

Yesu kisi longa amana kisi belula

23 Amana kakala kwenda muna Ngadidi yosu; mu kulonga muna nzu za kimvuka za Bayuta za bawu yi kusamuna Musamu wa Bukheti wa Kipfumu kya mazilu, amana kakala belula maladi moosu yi bimbefu byosu mu kati dya batu. 24 Amana khululuka ya yandi yámwangana mu mulambu wosu wa Sidiya. Amana bakala munatina batu boosu babana bákala bela, babana bákala yi makhasi ma mutindu yi mutindu yi miyangu mya bitembu bya mbi yi bakwa kikhoni, yi khonzu, amana wubabeludi. 25 Milumba-lumba mya batu bakala mulanda; tuka mu Ngadidi yi kuna mulambu wa Mbanza Kumi yi ku Yelusalemi yi ku Yuteya yi ku sambwa dikwawu dya Yolutani.

<- MATHAYI 3 MATHAYI 5 ->