9
Rivyichasara Judíyuveda Ju̱denu jaryetavay
1-2 Ri̱tay ji̱ta si̱tenu Jesucrístumu, raquivu̱chutya, mityamusiy radyetya rajechimyu Ju̱denu Jnutumusiy: Jaryi rañuvay, ne rapyaru̱ryu̱y nuvayada rinchiy ratyevay, Irayénuveda.
3 Raryi ni̱ru̱y daryaju̱ riyadaju̱, saryi jiyaro̱nu Crístu ray, raryi ma̱cho̱ jiintyasi̱ sa̱jisiy riyadaju̱, sañuma vichaniy Ju̱denu tara variryi, jiryatiy rirrachu daryaju̱ni̱ sadenu Jesucrístu, ne yinu̱y si̱tenu ratyevay nu̱ñi̱ndesa̱damudayu.
4-5 Riy ji̱ta vichasara Irayénuveda. Riy ji̱ta jaryetasavay Ju̱denu dadyeñuju̱ day; sadityadoda jidya riy; sabayadara yiteda riyadaju̱; sasa̱yada jiñiquejada nu̱chara riy, rivyichadeda saradodaju̱yu; sadityadoda rivara nu̱tyuramusiy vurya̱jachipiya̱ sanijyu̱ Ju̱denu, nu̱tyuramusiy, nu̱tyuramusiy vurya̱jvaachara saju̱, nu̱tyuramusiy; su̱teda ya̱jvaay samirya riy; rimyunatyavay rivyichanu̱yada Avurá̱bay, Isácubay, Jacóbubay jaryentiy; si̱tenu rityenu savichasara Crístu, ti̱ta̱ju̱ Nutyityu̱te, Vuryi̱ndenu jchana̱tyasi̱te, ta̱richa̱ra̱ju̱. ¡Daryani̱ ra̱chasarate ti̱ta̱ju̱!
6-7 Dañumamu̱y ne vuryi̱tay jiryatimyu̱ ne rito̱taniy Ju̱denu jtedara jivya̱tara. Ne rivyicha Ju̱denu jaryetavay daryaju̱ day, ti̱ta̱ju̱ jiryatiy Irayénu ju̱devadyeryi, daryantyamu̱y ne vuryi̱tay Avurá̱bay ju̱devay ti̱ta̱ju̱ riy, jiryatiy rivyicha sadadyeñu, Ju̱denu daryaju̱ jteda siva Avurá̱bay:
Jiryatiy yindevay Isácumusiryi, ra̱jtay si̱tenu yindevay variryi.
8 Vuryi̱tay rata jiryatiy Ju̱denu jteda Avurá̱bay dadyeñu riy, vinu rityi rupaya̱ Ju̱denu jtedamu; ramuni̱mu̱y ne rivyichasara Ju̱denu dadyeñu ti̱ta̱ju̱ jiryatiy su̱ndejada Avurá̱bay jivyu̱musiryi. 9 Ju̱denu jteda yinu̱y siva Avurá̱bay:
Darya rundamu ra̱cha jiyuntiy, deti̱numa sa̱cha jivyatura Sára variy.
10 Ne vinu ramusiy vu̱dyetya chavay vichasara Ju̱denu dadyeñucu̱, ne yinu̱y Sáraju̱be denu, vu̱myunatyi̱ Isácu ji̱ta, ni̱ni̱ detuchuni̱ jivyatura Rebéca day. 11-12 Sarupachodajisiñada paruna̱sijyu̱y, Esavú, Jacóbu jarye, su̱teda Ju̱denu Rebécabavya:
Jijyo̱ttya̱ ra̱cha jityeryi̱ cumude.
Su̱teda daryá netimyu̱ ne nanurupeda paruna̱sijyu̱y didye, netimyu̱ ne nadivaacharara samirya didye, va̱cha vicha̱da jarye, ra̱tidye ma̱cho̱ Ju̱denu va̱tara vadichara vu̱jyu̱, jiryatimyu̱ ne sajaryetani̱ nijya̱mi̱ yivaayadiva; sajaryeta ji̱tani̱ ni̱tiy sanaturyu̱y. 13 Darya nu̱chara ni̱day jiryatiy su̱teda Ju̱denu rivasiy Madaquíyabay jtosirya:
Ravya̱tasara riy Jacóbuveda, Esavúveda ji̱ta ra̱vittyuchara day.
Savichasara Ju̱denu vase vichara ti̱ta̱ju̱ nijya̱nvajyu̱
14 ¿Vurya̱jtay dyetya ramusiy ne dyetya vaseni̱ Ju̱denu? ¡Ne dyetya! 15 Su̱teda daryaju̱ siva Muyisésibe:
Ra̱jantyutyani̱, ni̱tiy ra̱jantyutyaru̱y; ra̱jantyuy siva, sivatiy ra̱jantyuryu̱y.
16 Ramuni̱ vu̱dyetya sajaryetasara Ju̱denu vinu ye̱ntyutya̱damu vu̱y, ne sajaryetasara vu̱ñi̱ru̱yadamu vu̱y, daryantyamu̱y ne sajaryeta vuryivaayadiva vu̱y jiryatiy vuryivaay paru̱cha̱rimyusirya. 17 Tapi Ju̱denu jteda siva Aravú̱bay, Muyisésibemyusiy:
Ramu ji̱ta rabeyada nutyityu̱ju̱ ji, ra̱tidye dityanu mityamusirya radyetya̱da yimu, ramutiy ra̱vichaniy darya ji, rirya̱tidye tu̱chunumaya̱ra ri̱tya ti̱ta̱ju̱ mucadiva.
18 Ramuni̱ vu̱dyetya sa̱ntyuy Ju̱denu siva sivatiy sa̱ntyuryu̱dye, sasuru̱tyaniy va̱cha jvaayadamuju̱ni̱, ni̱tiy sasuru̱tyaniryu̱ntyidye.
19 Ya̱jtay dyetya variy riva: ¿Nu̱tyuramusiña̱ sayasay vani̱ra vu̱y, nu̱tyuramusiy? ¿chi̱na̱ rañi vanu̱tya yitay raju̱ Ju̱denu va̱tarayu, chi̱? 20 Ritaja̱nu varintyi ji: ¿Chi̱ra yitay ji, chi̱? ya̱tiy jmutya̱ yindenu nijyu̱. Ritaja̱nuviy ju̱desarani̱ yindenu: ¿Ta̱raju̱ yinde darya darye, ta̱raju̱? 21 Saryintya jvaayasa jiimo̱ jvaañu tapuqui nandiipumusirya tanuqui japatyu, tato̱qui ra̱mu mutityo̱ risa̱ju̱. 22-23 Daryamusiñi̱ dyetya sadityanuru̱y Ju̱denura jiñique̱yada juuchuveda jchaju̱, su̱ndevay jarapu̱vyemyu jidyityanura. Sadatyataniryu̱y parutasavamyura jivyanu̱yada, dañuma sajachi̱deda paru̱cha̱rimyusiy rijyu̱yu. Jadchintyi sadityanuru̱y jantyutyasavamyu ti̱ta̱ju̱ra jidyá, jiryatiy su̱dutyanuma vurya̱jiju̱ darya. 24 Vu̱jyu̱ ji̱ta darya, jiryatiy sanatuyada ramuju̱ jidyá vu̱y, ne vinu Judíyuveda jsa̱siy sanatuyada, ruvay jsa̱sintyi, jiryatimyu̱ ne Judíyuveda daryi. 25-26 Darya saniquejada Josíyabay catera padyemyu:
Ra̱jtay rañijya̱nvaryi rityimyu̱ ne rañi̱cha̱da rañijya̱nvay; jiryatimyu̱ ne va̱tasavay riñi̱cha̱da, ra̱jtay ravya̱tavay varintyiryi. Jijyomu ji̱ta jasityi su̱teda ta̱riy ruuva: Ne jirye̱cha rañijya̱nvay, jasiy vichajomu day rirya̱jtay rinchintyi: Riñi vichasara Ju̱denu dadyeñu jiryatiy ju̱na̱reju̱ jnu̱vyeryi.
27-28 Satu̱choda Isayíyasibe vijyo̱mujache Irayénuvedanchiy:
Dañuma rirya̱jasa̱y Irayénu dadyeñu rajuuju̱ nu̱tyu ti̱cha̱juru sa̱ra̱ju̱, rirya̱ramitya vinu rityevay, jiryatiy sa̱jto̱taniy varenu jaryuve Nutyityu̱ra jiñiquejada, jirya mucadincha.
29 Daryani̱ satu̱choda Isayíyasibe ra̱jisintyi:
Netimyu̱ ne sama̱cho̱tadeda jarichu su̱tarumiy nutyityu̱ riy tavay vuryi̱ndebimijyu̱, vu̱pyarutaye̱tye variy, nu̱tyu raparuteda vicha̱da, Sodóma jtya tara, vu̱vyichava̱te variy daryantidye, nu̱tyu Comórra paruteda daryantiy.
Ne rityuva̱churu̱yada Judíyuveda samitu̱chodamu
30 ¿Nu̱tyura vurya̱jtay variy, nu̱tyura? Jiryatimyu̱ ne Judíyuveda daryi, riñi̱ ji̱ta saryedara jiryatiy su̱teda Ju̱denu vase vichavay rityuva̱chodamusiyu, dañumamu̱y ne rivya̱tanu̱yada rana̱cho̱. 31 Irayénuveda ji̱ta rañi va̱tanu̱yada rana̱cho̱ day, ne ridyi riva samirya vichasa̱da Ju̱denu diya, ne vinu niquejada jto̱tadedamuju̱. 32 ¿Nu̱tyuramu ne vana̱y, nu̱tyuramu? Jiryatiy ridyirya jvaayadamusiy jivya̱ta̱da rana̱cho̱, va̱ rityuva̱chodamu jiñi va̱tara cay. Ricyasinu̱ya̱jada nta sanchasiy ravichu̱, jiryatiy casinu̱ya̱si̱ daryaju̱ni̱ Crístu rijyu̱, ne ridyetyaru̱yada daryaju̱ra jiryatiy sabatyeda crusitya̱sa riyadaju̱. 33 Darya nu̱charani̱ daryaju̱ sanchiy Crístu darya:
Jirya̱jnu̱y, rabe rañijya̱nvay vicha̱damuni̱ casinu̱ya̱si̱ ravichu̱, rabe Siyó̱muni̱ ja̱mu ravichu̱ nu̱tyu ta̱a̱nu̱ rijyu̱, dañumamu̱y ne rirya̱jada variy ranchiy rityi tuva̱chu simu.
<- Róma 8Róma 10 ->
