1 Nõko Ifo Jesucristo nõ chanĩmara fakẽ nõko chaka noko soaxonano aõnoax nõ Nios fe isharapakexatiro. 2 Nõ Jesús chanĩmara faito noko noikĩ Niosya noko rafemani. Nãskakẽ, “Ẽ Nios ikano kaax ẽ a keskara shara itiro,” ixõ nõ shinãi nõ akiki inimakõitiro. 3 Askatari Jesúsnoax omiskõi nõko shinã mẽra nõ inimakõitiro. Askax nõ a keskara nõ itiro. Omiskõifiaito Jesús ãfe shinãmã nõko shinã mẽra noko mitsisfamaxotiro nõ tenenõ. 4 Akka Jesúsnoax omiskõikĩ nõ tenei nõ yora finakõia ipainãkafatiro anã chaka shinãyamaxiki. Nãskakẽ Nios nokoki inimai. Nokoki inimaino nõ tãpia nõ afe ĩpaxanõ. 5 Nõ askara shinãi nõ rãfitiroma Niospamãi a yoia keskara noko axõaino. Akka noko Niospa noikõikĩ ãfe Yõshi Shara nõko shinã mẽra noko nanexotiro.

6 Akka nõa nõko chaka nõ soametiroma. Nãskakẽ Niospa ãfe Fake nĩchipaiyaitĩa nai mẽraxõ nãmã nĩchini yora chakafoõnoax naaxinõ. 7 Tsõakai yora fetsa nãxopaitiroma sharafiano. Ẽtsa, itiro rakikĩa yora nai yora sharafoõnoax. 8 Akka nõ chakafokẽ Niospa ãfe Fake nĩchini noko nãxonõ. Nãskakẽ nõ tãpitiro Niospa noko noikõiai. 9 Askax nõõnoax naano ãfe imi foni. Nõ chanĩmara fakẽ afaa chakafamisma keskara noko õi noko chaka soaxõ. Akka nõ chakakẽ Jesús nõõnoax nani. Nãskakẽ iskaratĩa mã nõ chanĩmara fakĩ finakõia. Anã nokoki Nios õitifishkikĩ noko omiskõimaxima. 10 Askata nõ Nios noikaspaino ãfe Fãke noko nãxoni Nios fe nõ rafenõ. Nãskax nõ iskaratĩa Jesús afe yorafo nõ afe rafekõia. Askaxõ noko sharafakĩ finakõi. Jesús nakẽ Niospa anã otofani, nõri afe nipaxanõ. 11 Akka nõ Nios noikaspayoni. Iskaratĩa mã nõko Ifo Jesucristoõxõ noko raefaa nõ afe isharakõia. Nãskakẽ Jesús Nioski noko inimamasharakõia.

12 Niospa nã feronãfake Adán taefakĩ onifani. Nã Adán taefakĩ afara chakafani. Nãskakẽ aõxõ afara chakafapafo. Nã Adán afara chakafaniõnoax keyokõi nõ natiro nõmãi keyokõichi afara chakafaax. 13-14 Mã Adán afetĩama naniano Moisés Niospa meka yoini kirika keneni afe keskara nõ niimãkai. Akka Niospa Moisés yoiyoamano keyokõichi chakafayopaonifo. Nãskax mã nai keyonifo. Fetsafãfe chakafafiakaxõ Moisés kirika keneni tãpipaonifoma. Askafafiaifãfe oa afaa chakafamisfoma keskara Niospa ato õini tsõakairoko ãfe meka tãpikẽ. Adán keskarafoma. Adán Niospa meka tãpifiax nikayospani. Nãskaxõ Adán chakafakĩ taefani. Nãskarifiakĩ yorafãfe keyokõichi chakafamisfo. Akka nãskax mã nai keyokani, Adánmãi taeyoi nanikẽ. Nãskarifiai Cristo oni yora chakafoõnoax naiyoi. Nãskakẽ yorafo aõnoax nĩpaxatirofo.

15 Akka Jesucristo Adán keskarama. Adán Nios nikakaspax nani. Nãskakẽ nõri aõnoax natiro. Akka Jesúsxõ Niospa yorafo noikõikĩ ato imasharapakenaka afaa chakafamisma keskaramãi ato õikĩ. Akka nã Adán nai taeni afara chakafaax. Nãskax yorafo Adánnoax nãpanakafo. Akka Jesús Ifofakanax Jesús fistiõnoax keyokõi isharapakenakafo. Jesúsxõ Niospa ato raefatiro a chanĩmara faafo tii. 16 Adán afara chakafaniõnoax yorafo nai keyotirofo. Nãskatari ãto chakaõnoaxri nai keyotirofo. Akka nõ keyokõichi chakafakẽ Niospa noko omiskõimatiro. Nã Adán ani keskarakai Cristo afaa chakafamisma. Mã nõ keyokõichi afara chakafamiskẽ Jesucristoõxõ Niospa noko noikĩ nõko chaka noko soaxotiro afaa chakafamisma keskara noko õikĩ. Omiskõitamaroko nõ afe isharapakexanõ. 17 Adán ãfe chakafoõnoax keyokõi nakani. Akka Cristo fisti nokoõnoax nani nõ aõnoax Nios fe nĩpaxanõ Niospamãi noko shara õiaito. Jesucristoõxõ Niospa noko noixõ noko nimapakenaka. Nãskakẽ noko askafaxõkĩ Jesús Adán finõkõia.

18 Nãskakẽ ẽ mato yoiai keskara nã feronãfake Adán ãfe chakaõxõ keyokõi Niospa noko omiskõimani. Akka Jesúskai afaa chakafamisma. Nãskakẽ nã chanĩmara faafo tii Nios fe nĩpanakafo. Nãskakẽ nã afaa chakafamisma keskara Niospa ato imai. 19 Akka nã feronãfake Adán Nios nikakaspakĩ taefani. Nãskax Adán nikayospakõi taeyoi ini. Keyokõichi aõxõ nõ chakafapamis. Akka nã Cristo fistichi ares Nios nikakõimis. Afaakai chakafamisma. Nãskakẽ nã chanĩmara faafo tii aõnoax afaa chakafamisma keskarafo ipanakafo.

20 Moisés Niospa meka yoikĩ ato kirika kenexoni afara chakaõnoa tãpinõfo. Akka nã Moisés ato kenexoni mã õifikakĩ a Niospa ato yoia keskara tsõa nikakõikanima. Keyokõichi afara chakafamisfo. Mã chakafakĩ finafiafono Niospa ato noisharakõixõ ãfe Fake atoki nĩchini ato chaka soaxonõ. 21 Afara chaka fisti shinãkani namisfo. Akka Niospa noko noikõia. Nãskakẽ ãfe Fake Jesús noko nãxoni nõko chaka noko soaxoxiki. Nãskakẽ nõ Jesús chanĩmara faito Niospa afaa chakafamisma keskara noko õi. Noko chaka soaxonano nõ afe ipanaka.

<- ROMANOS 4ROMANOS 6 ->