ROMANOS 15

Nã mã apaiyai keskara fatama fẽtsa apaia keskara axokãfe

1-2 Jesús chanĩmara fakõixõ a Niospa meka tãpisharafoma nõ ato fenãmãshta yoitiro ato fe feratenãtama. Nõa nõ apaiyai keskara fisti nõ atiroma. Nã Jesús chanĩmara faa fetsafori noikĩ nõ ato axotiro ãto shinã mẽra inimamakĩ shara inõfo Jesús Ifo sharafakõinõfo. 3 Shinãkapo. Nõko Ifo Cristo aafi apaiyai keskara fisti shinãpaonima. Aõnoa Nios yoimisto kirika keneni iskafakĩ: “Epa, ẽ mia nikakõia. Akka mia chakafakakĩ eari chakafakani,” ixõ kirika keneni Cristoõnoa yoikĩ. 4 Niospa meka kenepakenifo noko tãpimaxikakĩ. Ãfe meka nõ chanĩmara faxõ afara chaka finõkõixõ nõ tenekõinõ. Ãfe mekaõxõ nõko õiti nõ fepeaxõ nõ tãpitiro nõko Ifo fe nai mẽra chipo nõ afe ipanaka anã afara chakapa noko omiskõimanõma. 5 Noko afara chakapa afeskarafafiaito Epa Niospa noko mitsisfamatiro nõ tenenõ nõko õiti fepeaxokĩ. Nãskakẽ mã Jesús Ifofasharaino mato nãnori fisti shinãmatiro. 6 Nãskakẽ nõko Ifo Jesucristo ãfe Apa nõ yoisharai. Nãskax nã meka fistipa nõ mekai keskarakõi Epa Nios yoisharakĩ nã yora fisti keskara.

Niospa meka shara judeofoma yoinifo

7 Cristo nokoki inimakĩ noko ifini afe yorafo nõ inõ. Nãskakẽ mãri fetsafo fe yõra faatanãkãfe. Mã askaino Niosnoa shinãsharatirofo. 8 Ẽ mato yoinõ Jesucristo mai ano oni judeofo ato yonoxomis keskara ikiyoi. Niospa nõko xinifo yoiyoni keskara Cristo oni. Nãskakẽ Niospa nõko xinifo yoini keskara chanĩmakõikẽ nõ tãpitiro. 9 Akka judeofomaõnoaxri Jesús oni. Nãfãferi chanĩmara faxõ yoixikani iskafakakĩ: “Aicho, Epa Niospa noko noikĩ ãfe Fake nokoki nĩchini. Epa Nios shara,” ixõ yoixikani. Nãnori David kirika keneni iskafakĩ:

Epa Niosi, ẽ mĩõnoa ato yoisharaxii, a judeofoma. Ẽ mia fanãki, “Aicho, Nios shara,” ẽ mia faxii,

ixõ kirika keneni. 10 Anã Niospa meka yoikĩ kirika keneni iskafakĩ:

Judeofoma nã judeofo fe inima faatanãkãfe. Mãri ato fe Niospa yora ixii,

ixõ kirika keneni. 11 Anã kirika keneni iskafakĩ:

Maitio anoafãfe, nõko Ifoõnoa yoisharakãfe. Keyokõi nã maifo tii ikafãfe nõko Ifo fanãkãfe,

ixõ kirika keneni. 12 Isaías aatori iskafakĩ kirika keneni:

Nõko xini Isaí ãfe fena na maitio ikafãfe ãto xanĩfo ixii. Shinãxikani iskafakakĩ: “Nã fistichi Nios ika ano noko ifitiro nõ afe ĩpaxanõ, nõ anã nanakama,” ixõ shinãxikani,

ixõ Isaías kirika keneni Cristoõnoa yoikĩ.

13 Epa Nios chanĩmara faxõ nõko Ifo oxiaino nõ manai. Epa Niospa noko shinãmani iskafakĩ: “Chanĩma, nõko Ifo oxii noko ifixiki nõ afe ĩpaxanõ,” ixõ noko shinãmani. Nãskakẽ ẽ mato kĩfixomis Niospa mato inimamanõ. Askatari mãto shinã mẽra mato shinãmasharai mã afeskatama mã isharanõ mato axosharai. Mã Nios chanĩmara faano ãfe Yõshi Sharapa mato axosharai mã isharanõ.

Pablo Jesucristoõnoa judeofoma ato yoini

14 Efe yora mĩshtichi, mẽ tãpia mã noinã faatanãito Jesúsnoa mã tãpisharai mã yoinõnãsharatiro. 15-16 Niospa ea noikĩ ea katoni Jesucristo ãfe yonomati ẽ inõ, ãfe meka shara ẽ mato tãpimanõ. Nãskakẽ ẽ ranotama anã aõnoa ẽ mato shinãmasharai kirika kenekĩ. Akka Niospa ea nĩchini judeofoma ẽ ato Jesús Ifofamanõ. Mã Jesús Ifo sharafaxõ, mãto chaka mã soax a keskara shara mã inõ. Nãskax Epa Nios matoki inimakõi.

17 Nãskakẽ ẽ inimakõi nõko Ifo Jesucristomãi ea katonikẽ Epa Nios ẽ yonoxonõ judeofoma Niospa meka ẽ ato yoinõ. 18 Ẽa ẽ ato yoima. Cristo ea shinãmanaino ẽ ato yoimis. Nãskakẽ a ẽ ato yoimis keskara Epa Niosnoa nikakõimisfo. 19 Ãfe Yõshi Sharapa ea shinãmanaino a tsõa atiroma keskara ẽ ato õimana. Nã maitio Jerusalén anoafo yoita Ilírico anoafori ẽ ato yoini. Keyokõi nã meka shara Cristoõnoa ẽ ato yoifofãsafamis. 20 Ẽkai a yora fetsafãfe Cristoõnoa yoimisfo ari ẽ kapaimisma. A Cristoõnoa nikamisfoma ano ẽ kapaimis ato tãpimaxiki. 21 Nãnori Isaías Niospa meka keneni iskafakĩ:

Tsõa aõnoa nikayomisma chipo nikakaxõ tãpinõfo,

ixõ keneni.

Pablo Roma ano kapaikĩ shinãni

22 Akka ẽ mato ari kapaimis. Ẽ mato õikapaifi ẽ kamisma. Afara fẽtsa ea katimafamis. 23 Nãskafixõ iskaratĩa Jesúsnoa mẽ ato yoikĩ mẽ mitoa. Nãskax mẽ itipinĩa mato ari kaxiki. Mẽ xini ichapa amis mato õikapaikĩ. Mẽxotaima ẽ mato ari kapaimis. 24 Ẽ España ari kai ẽ mato ano nẽteyoxii mato fe mekaxiki nõ yoinõnãsharaxiki. Mato anoax ẽ kaito a ẽ yopai ea inãxikãfe ẽ España ari nokosharanõ. 25 Akka iskaratĩa ẽ Jerusalén ano kayoikai. Jesús chanĩmara faafãfe ea nĩchikani a Jerusalén anoxõ Jesús chanĩmara faafo ẽ ato kori inãnõ. 26 Macedonia anoxõ a Jesús chanĩmara faafãfe Jerusalén anoafo a Jesús chanĩmara faafo ato kori inãpainifo. Acaya anoxori Jesús chanĩmara fakaxõ ato kori inãpainifo a afaamaisfo. Nãskakẽ ea kori inãnifo ẽ ato inãtanõ. 27 Inimayanã ato inãpaikakĩ ato yoinifo iskafakakĩ: “Jerusalén anoax Jesúsnoa yoimisfo nokoki fenifo Jesúsnoa meka shara noko yoi fekani. Akka nokoki feyamanifono na meka shara nõ nikakeranama. Nãskaxõ nõ afarayaxõ nõ ato inãpai ato sharafakĩ,” ixõ yoinifo. 28 Nãskata ẽ ato kori inãfainikai Jerusalén anoax España ari kakĩ. Nãskaxori ẽ Roma anoa ẽ mato õifainikai. 29 Mẽ tãpia ẽ mato ano nokoxõ nõko Ifoxõ ẽ mato yoisharaxii mãto shinã mẽra mã inimanõ.

30 Efe yora mĩshtichi, meka fetsari ẽ mato yoipai. Mã nõko Ifo Jesucristo noixõ ãfe Yõshi Sharaõxõ ea noikãfe. Ea Nios kĩfixokãfe ẽ yonosharaxonõ afanã ea afeska fanõma. 31 Ea kĩfixokãfe Epa Niospa ea kexenõ Judea anoafãfe a Jesús chanĩmara faafãfema ea afeska fanõfoma. Ea kĩfixokãfe a Jesús chanĩmara faifo Jerusalén anoafo ẽ ato kori inãino inimakõikai finõfo. 32 Mẽ ato inãkĩ mitoano Epa Niospa ea nĩchiano ẽ inimayanã matoki nokoxinõ. Nãskata nõ yoinõnãsharaxinõ nõko õiti mẽra inimayanã. 33 Epa Nios mato fe inõ. Akka Niospa noko imasharatiro nõ isharanõ.

<- ROMANOS 14 ROMANOS 16 ->