1 Efe yora mĩshtichi, iskaratĩa nõko Ifoõnoax inimakãfe. Mẽ mato kirika kenexokatsaxakĩ, anã ẽ mato yoi. Akka mã nikakõisharanõ ẽ mato yoi. 2 Kexemesharakãfe, a yora chakafo fishtayamakãfe, nã paxta põfe keskarafoki. Nãfãfe afara chakafamisfoki. Iskafakĩ mato yoipaikani kiki: “Mã foshki repa xateyamax mã Nios ari kaima,” ixõ mato yoipaikani kiki. 3 Akka nõ foshki repa xatexokai nõko chaka nõ soatiroma. Cristo Jesús noko nãxoni nõko chaka noko soaxoxiki. Niospa ãfe Fakeõxõ ãfe fakefo noko imatiro. Ãfe Yõshi Sharaõxõ nõ Nios yoitiro iskafakĩ: “Nõ mia noi. Mĩ sharakõi,” ixõ nõ yoitiro. Nãskakẽ nõ akiki inimakõi ares fisti noko nimatiro. Mã nõ tãpia nõ foshki repa xateaõxokai noko afeska fatiroma. 4 Fetsafãfe yoikĩ iskafakani: “Ẽ shara famis. Nãskax ẽ Nios fe ĩpanaka,” ixõ shinãifono, ẽri anori shinãpaiki ẽ shinãkĩ finapaoni. 5 Mẽ kãiax ocho nia ẽ oxano ea foshki repa xatenifo. Ẽfi israelikõikĩ, ẽkai osiama. Benjamín ẽfe xini ipaoni, ẽfi ãfe fenaki. Ẽfe epa feta ẽfe ẽfa hebreoxomãi ea fake fiafono, nãskakẽ ẽri hebreo. Askatari fariseo ẽ iyopaoni, nãskaxõ Niospa Moisés yoipaoni keskara ẽ nikakõipaoni ẽmãi fariseoxõ. 6 Askatari Niospa meka nikasharapaikõikĩ a Nios Ifofaafo ẽ ato chakafapaoni. Askatari ẽ isharapaikõikĩ Moisés yoini keskara ẽ nikasharakõipaoni. Nãskakẽ eõnoa yoikĩ tsõa iskafatiroma: “Na Pablokai Moisés yoini keskara nikakõipaonima,” ixõ tsõa yoitiroma.

7 Akka nãfo taeyoi ẽ õia ẽfenã sharafinakõia iyopaoni. Akka iskaratĩa ẽ õia afokai anã afama. Cristo Ifofakĩ afo ẽ anã shinãima mẽ shinãmakikõia. Cristo fisti Ifofakĩ afe ĩpaxakĩ. 8 Akka a ẽ ipaoni keskara anã ẽ shinãima. Nãfo mẽ shinãmakikõia, afo shinãi ẽ finakõia ipaoni. Akka ẽ shinãi afokai afama, nã afara chaka potamea keskarafo. Akka ẽfe Ifo Jesucristo fisti ẽ tãpipaikõi, nãfi sharafinakõiaki. Ares fisti ea imasharatiro, a Moisés yoini keskarakai ẽ anã nikatiroma ea imasharanõ. 9 Askatamaroko ẽ Cristo chanĩmara faino Epa Niospa ãfe Fakeoxõ ea imasharatiro a keskara shara ẽ inõ. Akka ẽ Nioski nokoaino ekeki inimatiro, ẽ Cristo fisti chanĩmara fakẽ ea imasharanõ. 10 Ẽ Cristo tãpipaikõi afe rafesharaxiki. Niospa ãfe kerex sharayaxõ Cristo anã otofani keskai, ẽri ãfe kerex shara mepai a keskara shara ea imanõ. Jesucristo omiskõini keskai ẽri aõnoax omiskõipai. Jesús naani keskai ẽri askapai a keskara ixiki, afaa chakafaxikima, askatari afaa chaka shinãxikima. 11 Nãskakẽ a chakafo kachikiri fata, nã Jesús keskara sharakõi ẽ ipai, oa yora naax anã otoa keskara shara.

12 Ẽ isharakõira ẽ ifiax ẽkai isharakõiama. Askatari Jesús keskara ẽ ipaifi ẽ askakõima. Jesucristo ea Ifofamani ẽ a Ifofanõ. Nãskakẽ ẽ Jesús Ifofakõini a keskara sharakõi ixiki. 13 Efe yora mĩshtichi, ẽ Jesús keskara iyamafiai a ẽ ipaoni keskara ẽ anã shinãima. Akka ẽ Jesús fisti Ifofai. Nã feronãfakefo ichokani xonõnõnãkĩ texkeakekafã õitirofoma. Nã ifi nĩchiti nia ari fisti õiax ichotirofo keskariakĩ afara chaka shinãkima Jesús fisti ẽ shinãmis a keskara sharakõi ixiki. 14 Nãskaxõ afaa fetsa ẽ shinãima. Nã Cristo Jesús ẽ shinãmis Ifofapaikõikĩ. Akka Niospa ea katoni ẽ afe ĩpaxanõ, Cristo Jesúsõnoax Epa Nios ari ẽ nokotiro, ariax a keskara sharakõi ixiki.

15 Mã Jesús Ifofakĩ nã ẽ mato yoimis keskafakĩ nãnorikõi shinãkãfe. Akka fetsafãfe a ẽ shinãi keskara shinãyamaifono, Niospa ato tãpimakĩ mẽstekõi shara ato yoixii. 16 Akka nãfo nõ tãpiax, shinãsharakõita nõ isharakõitiro, mã nõmãi Jesucristoõnoa tãpiax.

17 Efe yora mĩshtichi, ẽ Jesús Ifofaa keskafakĩ mãri Ifofakãfe. Mã nõ mato õimamiskĩ, nõ ikai keskai mãri askakãfe. 18 Mẽ mato mẽxotaima yoitaifamis, nãskafekẽ afianã ẽ mato yoi oiayanã. Akka fetsafãfe na ẽ mato yoiai keskara nikakaspakani. Ãto chaka xatekaspakakĩ Jesucristo ifi cruz ikakinoax noko nãxoni nikakaspakani. Nãskakanax Jesús noikaspayanã ikafo. 19 Jesús ato amapaiyai keskara shinãtama ãa apaiyaifo keskara fisti shinãmisfo. Nã piai fisti shinãkata, a ayai fisti shinãmisfo. Feronãfakefãferi kẽrofo shinãmisfo, ãto ãfifoma. Kẽrofãferi feronãfake fetsafo shinãmisfo ãto fenefoma. Nãskara chakafos shinãkĩ, nã keskara fisti tãpiafo. Akka nõ chakama, nõ isharakõimis imisfo. Nãskakanax rãfitirofoma, nã keskarafo mã keyokani. Askatari nã omiskõipakenakafo mẽra fokani. 20 Akka nõfi askaramakĩ, nõ Niospa fakefokĩ nõ afe nai mẽra ĩpanaka. Akka nõ manai a noko Ifimis nai mẽranoax oxõ noko ifiyonõ, nõko Ifo Jesucristo. 21 Nãato nõko yora chakakẽ noko fetsafaxoxii afe yora keskara sharafinakõia nõ inõ. Nãskaxõ ãfe kerex sharaõxõ nõko yora noko fenasharafaxoxii afara chakafo nõ finõinĩfofanõ.

<- FILIPENSES 2FILIPENSES 4 ->