1 Nãskakẽ Cristo mato inimama mato noikĩ mato inimamashara ãfe Yõshi Shara mato fe ika. Chanĩma, Cristo mato noikĩ mato inimamashara mã mã meemis. 2 Nãskakẽ ea inimamakõikãfe. Isharakõita keyokõichi nãnorifos shinãkãfe. Mã ranã nõinãsharakõikãfe. Nãskakẽ Jesús mato amapaiyai keskara fisti axikakĩ. 3 Akka fetsafo afara axotama a mã mã afara apaiyai keskara fisti shinãyamakãfe, askatari fetsafãfe eõnoa yoisharakõinõfora ikax kakapaimis iyamakãfe. Askatamaroko isharakõita fetsafoõnoa yoikĩ iskafakãfe: “Nafãfe ea finõtirofoki. Akka ẽkai afama. Jesús fistichi ea imasharatiro,” ixõ fetsafo finõpaiyamakãfe. 4 Askatari a mã mã fichipaiyai keskara fisti shinãyamakãfe, askatamaroko a fetsafãfe fichipaiyaifo keskarafori shinãkãfe.

5 Nãskaxõ nõko Ifo Jesucristo shinãi keskafakĩ mãri nãnori shinãkãfe. 6 Nãfi Nioskõikĩ Apa Nios keskara ari onifafianino yoikĩ iskafapaonima: “Ẽri ẽ Nioskõi nã ẽfe Epanãfori ẽfenã. Nãskakẽ ẽfe Epa nai mẽra ika keskariai ẽ nono mai ano itiro. Ẽ askaito afanã ea afeska fatiroma,” ixokai anori Jesús shinãpaonima. 7 Askatamaroko Jesús ãfe sharafoya ãfe afama mĩshtifo potayoni, nono mai ano oax ato yonoxomis keskara ixiki. Nãri fake feronãfake kãitiro keskai, feronãfakekõi kãini. 8 Feronãfakekõi ixõ isharakõixõ Apa Niospa yoiai keskara nikakõiax nani. Afara chakafamis keskarax ifi cruz ikakinoax omiskõikai nani. 9 Nãskakẽ Epa Niospa xanĩfo finakõia imani, nãatofi keyokõi finõinĩfofanakĩ. 10 Nãskakẽ Jesús keyokõi ato finõano ãfe ane nikakakĩ keyokõichi akiki ratokonõ mai chachikaxõ yoikĩ iskafaxikani: “Jesús, mĩfi xanĩfo finakõiakĩ,” ixõ yoixikani keyokõi nã nai mẽranoafoyaxõ nono mai anoafãfe. Askatari nã Ifofax namisfãferi askafaxikani, niafakafãferi askafaxikani. 11 Nãskafaifono keyokõichi tãpixikani, “Jesucristo nõko Ifora,” faifono. Askafakãki Apa Niosri inimamakõixikani.

12 Nãskakẽ ẽfe yora mĩshtichi, ẽ mato fe ixõ ẽ mato yoiaito mẽxotaima mã ea nikapaoni keskafakĩ, ea nikakĩ finakõikãfe iskaratĩa ẽ chai ikakĩ nono karaxa mẽra. Jesús mãto chaka mato soaxonõ isharakõita shinãsharakõikãfe afe ĩpaxakakĩ kachikiri fakakĩma. Nãskakẽ meseyanã nikakĩ finakõifafãikãfe Niospa mãto chaka mato soaxonõ. 13 Niospa mãto shinã mẽraxõ mato shinãmafafãini a mato amapaiyai keskara mã anõ. Nã apaiyai keskafakĩ, nãnori mato shinãmapai.

14 Nãskatari nã mato amapaiyai keskara akãfe, yõachẽpekakima, askatari feratenãyamakãfe, 15 mã isharakõiano tsõa matoõnoa afaa chaka yoiyamanõ. Askatamaroko yora chakafo mẽra ikax mã isharakõiaito mato õitirofo mãmãi Niospa fakekõiax afaa chakafamisma. Akka mã ato mẽra ixõ ato õimasharakãfe, oa fakishi fishifãfe chai chaxatiro keskafakĩ. 16 Nãskaxõ Niospa meka sharaõnoa ato yoifofãfofãikãfe afe ĩpaxanõfo. Nãskakẽ mã Cristo oaino ẽ matoõnoax inimaifinakõitiro, ẽakairoko kaxpa Niospa meka ẽ mato tãpimanax, askatari ẽa ẽ kaxpa yonomisma. 17-18 Ẽ mato yoisharamis mã Jesús chanĩmara fakõinõ. Akka Epa Nios ẽ yoitiro iskafakĩ: “Epa Niospa, ea mĩa yoini keskafakĩ Filiposo anoafo mĩ Fake Jesúsnoa ẽ yoimis. Nã chanĩmara fakõinõfo, a mĩ ato yoiai keskara akõixikani. Ẽ mia ato chanĩmara famaõxõ ea retexikani rakikĩa,” ixõ ẽ Epa Nios yoitiro. Akka ea retefiafono eõxõ mã Jesús Ifofaano ẽ inimatiro. Nãskakẽ mãri efe inimakãfe Niospa ea sharafaino matoõnoax ẽ natiro.

19 Nõko Ifo Jesucristo nĩchipaiyaino ẽ matoki samamashta Timoteo nĩchipai mato õikanõ. Mã anã oxõ matoõnoa ea yoiaito nikai ẽ inimakõixii. 20 Akka tsõakai efeta iskafakĩ shinãima, Timoteo fistichi shinãi ẽ shinãi keskara. Chanĩma, na Timoteo mato noikõikĩ matoõnoa tãpipai mã Jesús Ifo sharafaamãki. Akka tsoakai na Timoteo keskarama. Nãskaxõ ẽ mato noiai keskafakĩ nãatori mato noikõi. 21 Akka fetsafãfe ãakõi apaiyaifo keskara fisti shinãmisfo. Cristo Jesús ato amapaiyai keskara amisfoma. 22 Akka mã mã tãpia na Timoteo isharakõixõ mato õimamis efeta Niospa meka sharaõnoa ato yoimis. Nã fãke ãfe apa feta yonotiro keskafakĩ na Timoteo efeta yonosharamis. 23 Nãskakẽ Timoteo, ẽ mato ano nĩchipai mato õikanõ. Mẽ tãpixõ ẽ afeskaimãkai, akka mẽ tãpixõ mato ari ẽ Timoteo nĩchi eõnoa mato tãpimanõ. 24 Akka ẽ nõko Ifo chanĩmara fai, ea mato ari nĩchiaino samamashta kaxõ ẽ mato õikai.

25 Akka ẽ shinã nofe yora Ipafrodito mato ari nĩchipaikĩ. Fekaxfiano nãato efeta yonokõimis na Ipafrodito mã ekeki nĩchini, ẽ afara yopaito ea axonõ. 26 Na Ipafrodito mato õisharapaikõi, mato shinãkõi mãmãi nikamiskẽ isinĩ ikaito. 27 Chanĩma, na Ipafrodito isinĩ ikõini, mã nakerati. Nãskaino akka Nios aõ noikõikĩ mã sharafaita, eari noikõiyanã. Akka mã naano ẽ shinãmitsaifinakõikeraita. 28 Nãskakẽ ẽ mato ari nĩchipaikõi mã inimakõinõ matoki anã nokoaino, ẽri shinãmitsakõiyamaxiki. 29 Nãskakẽ matoki nokoaito inimayanã ifisharakõikãfe nõko Ifoõxõ. Nãskakẽ nã mã Ipafrodito noiai keskafakĩ nã keskarafori fetsafo noikõikãfe. 30 Akka na Ipafrodito Cristo yonoxoni mã nakeraita. Akka mã chai ikax ekeki oyamaino matoõnoa omiskõinixakĩ nã Ipafrodito ekeki oyamea ea axosharaxiki.

<- FILIPENSES 1FILIPENSES 3 ->