Pablo Galacia Anoafo Kirika Kenexõ Fomani

1 Ẽkĩa Pablo, ẽ mato kirika kenexõ fomai. Niospa ea nĩchini aõnoa meka shara ẽ ato yoinõ. Yorafãfe ea nĩchinifoma, Jesucristo feta Epa Niospa ea nĩchini. Nã Niospa Jesucristo otofani mã nakẽ.

2 Mã Galacia anoxõ Nios Ifofakẽ, na nono efe ikafãfe, akairi Nios Ifofakaxõ efeta mato kirika kenexõ fomakani. 3 Epa Niospa nõko Ifo Jesucristo feta mato noikĩ mato sharakõi fanõ. Askatari mãto õiti mẽranoax mã anã fekaxtenõma. 4 Nõ afara chakafamisno nokoõnoax Jesús nani nõko chaka noko soaxoxiki, askatari nã yorafo chakafo mẽranoa noko ifixiki Epa Niospa fichipaiyai keskafakĩ. 5 Nãskakẽ Nios sharakõi mẽxotaima fapanakafo. Nãskapakexapainõ.

6 Ooa. Epa Nios potakanimara ixõ ẽ shinãmis, koshikõi kachikiri fayanã mã potafiaino, Cristo mato noiaino Epa Niospa mato katofinino. Epa Nios fe ipaikakĩ ãfe meka shara nikafiyanã, meka fetsa fetsatapafo nikakakĩ kachikiri famisfo. 7 Akka anã anokai meka fetsama, a nikax Nios fe nõ ipaxatiro. Akka nã Nios Ifofaafãfema mato fekaxtefakani. Meka fetsafaxõ anorima mato yoipaikani, Cristoõnoa meka shara mã nikapaifiaito a nikax afe ipaxakĩ. 8 Akka fetsafãfe Nios fe mã ipaxanõ Niospa mekaõnoa mato yoifikakĩ, meka fetsafaxõ anorima mato yoikani, mã nõ mato yoifimisno. Nã keskara yorafo nã omiskõipakenakafo mẽranoax omiskõipakenakafo, ẽ iyamai Niospa ãjiri itiro nai mẽranoax oax. 9 Nã ẽ taefakĩ mato yoiyoni keskafakĩ, iskaratĩa anã ẽ mato yoi. Fetsafãfe Nios fe mã ipaxanõ Niospa mekaõnoa mato yoifikakĩ anorima mato yoikani, mã nõ mato yoifimisno. Nãnori mato yoikanax nã omiskõipakenakafo mẽranoax omiskõipakenakafo.

10 Ẽ yoiki iskafaino, yorafãfe eõnoa yoisharanõfora ixõ ẽ shinãima, askatamaroko Niospa eõnoa yoisharanõ. Ẽkai yorafo eõnoa shinãmasharapaima. Akka yorafo eõnoa shinãmasharapai, ẽkai Cristo yonoxomis itiroma.

11 Efe yora mĩshtichi, xafakĩakõi ẽ mato yoipai. Na meka shara Jesucristoõnoa ẽ mato yoimis nõ afe ipaxanõ. Na keskarakai yorafãfe ãto shinãmã shinãmisfoma. 12 Na meka shara ẽ mato yoimis keskara yorafãfe ea tãpimanifoma. Tsõarikai ea tãpimanama. Askatamaroko nõko Ifo Jesucristo ea tãpimana keskara ẽ mato yoimis.

13 A ẽ ipaoni keskara mã mã nikapaoni. Ẽmãi judeoxõ a nõko xinifãfe yoipaoni keskara ẽ nikayopaoni. Mã mã tãpia mitsisipakõikai a Nios Ifofaafo ẽ ato omiskõimapaoni, anã Nios Ifofayamanõfora ixõ. 14 Nõko xinifo judeofãfe yoipaonifo keskara ẽ nikakõini, ẽfe kaifofo ẽ ato finõkõini, efe yosifinifono. Ẽ nikakõikĩ a ẽfe xinifãfe yoipaonifo keskara ẽ nikakĩ finakõini.

15 Akka taefakĩ Epa Niospa ea katoni ẽ fakeyoamano. Ea noikõikĩ ea katoni. Nãskakẽ ea tãpimapaikĩ ea askafani. 16 Nãskaxõ ãfe Fake ea tãpimani ãfe meka shara a judeofoma ẽ ato yoinõ afe ipaxanõfo. Nãskakẽ ẽ rama Jesús Ifofakĩ ẽ tsoa yõkaikai kanima ea tãpimanõ. 17 Nãskakẽ Jerusalén ano ẽ kayonima a taefakĩ Jesúsnoa meka sharaõnoa yoimisfo ato õikai. Askatamaroko Arabia mai ano ẽ kani. Nãskata Damasco ano anã ẽ oni.

18 Nãskata Jerusalén ari fena ẽ kayonima, mã xinia tres akax ẽ kani. Nãnoxõ ẽ Pedro tãpini, nãno ẽ afe oxa ranãyoni quince nia ẽ ini ano oxai. 19 Akka nã Jesús fe rafemisfo fetsafori ẽ õinima. Nõko Ifãfe ãfe exto Santiago fisti ẽ õini. 20 Niospa ferotaifi ẽ mato yoikõi, na ẽ mato kirika kenexokĩ chanĩmakõi ẽ mato yoi.

21 Nãskata chipo Siria yafi Cilicia mai ano ẽ kani. 22 Akka Judea mai anoxõ Cristo Ifofafiakaxõ ea tãpiayonifoma. 23 Ea õiyamafikatsaxakakĩ eõnoa iskafakĩ yoiaifãfe nikapaonifo: “A na feronãfãke taefakĩ noko omiskõimapaofinixaki, iskaratĩa Jesúsnoa meka shara ato yoifofãsafai. Askatari noko keyokõi omiskõimakĩ noko xatemapaipaoni nõ anã Jesús nikanõma,” ixõ eõnoa yoinifo. 24 Nãskaxõ eõxõ Epa Nios aicho fakani, mã Pablo Nios Ifofara ikaxõ.

GÁLATAS 2 ->