1 Timoteoshta, Jesucristo ãfe kerex sharaõnoax isharafe, afaa chakafaxima. 2 Ẽ yorafo Jesúsnoa yoiaito mĩri ea nikafafãini. Nãskarifiai mĩ ato chanĩmara fasharatiro. Nãskaxõ a feronãfakefãfe a shinã sharaifo ifife mĩ ato tãpimaxikĩ afãferi fetsafo tãpimanõfo.

3-4 Akka soraro õiti sharayato omiskõifikĩ tenetiro. Ãfe pexe shinãyamata ãfe xanĩfo fisti ifofaxõ nikasharakõi. A afara yonoai keskara ãfe xanĩfãfe yonomanaino soraro sharapa yonosharatiro. Nãskarifakĩ Niospa mia yonomapaiyai keskari fakĩ yonosharaxõfe fanĩrira fetsa shinãkima. Jesúsnoax omiskõifi meseyamafe. 5 Askatari fetsafo xonõnõnãxikakĩ ĩkisi itipinĩsharatirofo xonõnõnãpaikani. Askatari mĩri shinãsharafai Niospa mia yoiaito nikasharakõife. Akka mĩ nikasharayamaito Niospa mia, “Aicho, mĩ fãsi sharakõi,” ixokai mia yoitiroma. 6 Askatari feronãfãke yonosharamiskõi ãfe tare efapafaxõ, ĩkisi ãfe yono fitiro pixikĩ. Nãskarifiakĩ mĩri Jesúsnoa yonoxosharamis Jesús mikiki inimakõinõ mia afara shara inãxii. 7 Ẽ mia yoiai keskara shinãsharafe. Nõko Ifãfe mato tãpimasharai kiki.

8 Nãskakẽ shinãmakiyamafe Jesucristo naafiakẽ anã Niospa otofani noko ifimis inõ. Nã David ãfe fena. Nãnori nã meka shara ẽ yoifafãimis. 9 Nã ẽ yoifiaito, yorafãfe Jesús Ifofaafoma õitifishkikakĩ. Ẽ Niospa mekasharaõnoa yoiaino ekeki õitifishkikakĩ ea karaxa mẽra ikimanafo. Ẽ afaa chakafayamafiakẽ ẽ feronãfake chaka keskarakẽ ea karaxa mẽra ikimanafo. Ea ikimafianifono Niospa meka Jesucristoõnoa ẽ enetiroma. 10 Nãskakẽ ẽ atoõnoax omiskõifikĩ ẽ tenekõi a Jesús Ifofaafo tii ẽ ato tãpimani chanĩmara fanõfo, Nios fe ĩpaxakakĩ.

11 Na meka sharakõi nikafe:

14 Na ẽ mia yoiai anori, mefe yorafo ichanãmisfo ato shinãma fafãife. Niospa mia xafakĩa õiaino ato yoife Niospa mekaõnoa feratenãnõfoma, feratenãkani aõnoax mekanõfoma. Akka fatotokai yoisharaimãkai fatotori yoisharaimamãkai ikaxõ tsõa tãpitiroma tãpipai kakĩ. Anorima nika kakĩ tsõa tãpitiroma. Askakani fanĩrira mekamisfo ãa chanĩkani. 15 Timoteo, Niospa meka pena tii õife. Askafaxõ Niospa meka tãpisharaxõ yorafo mẽstekõi ato tãpimafafãife. Mĩ askaito Niospa mĩõnoa yoitiro iskafakĩ: “Na ea yonoxosharamis, ẽ akiki inimasharakõi,” ixõ mĩõnoa yoixiki. Mia askafainokai mĩ aõ rãfitiroma. 16 A feratenãmisfo ãto meka nikayamafe. Nõ ãto meka nikaxõ meka mẽstekõi Jesúsnoa nõ nikapaitiroma. Askaxõ anã nõ Nios Ifofapaitiroma. Chakakõi itiro. 17 Oa yora faraxiki finaxõ, koofi payokometiro keskafakĩ, a yõra anorima yoikĩ yorafo ãto õiti chakana fatiro. Himeneo feta Fileto askara chakakõi ato yoimisfo. 18 A Jesús oaitĩa a namisfo anã otoxiaifo mã nõ tãpifekẽ, a feronãfake rafeta Himeneo feta Fileto anorima mato yoimisfo. Akka nõ tãpia mã Jesús anã fotoaino Epa Niospa nã namisfo otofaxii. Akka nã rafeta mato pãramisfo ãa chanĩkakĩ. Iskara mato yoimisfo: “Mã finõa a mato yoimisfo keskara. A Niospa namisfo mã ato otofaa,” ixõ a refeta yoimis. Afãfe nã meka nikaxõ shinãkĩ iskafatirofo: “Ooa. Mã nõ nakẽ Niospa noko anã otofaima,” ixõ anorima shinãtirofo. Anori shinãkani Jesús shinãmakitirofo. 19 Akka Niospa meka chanĩmakõi. Tokirinĩfakai tsõa rafetiroma. Niospa meka nãskarari. Tsõakai ãfe meka fetsafatiroma. A chanĩma, nã yoimis keskara nãskarakõi. Tokirinĩfakĩ yõra keneakai tsõa soatiroma. Nãskarifiakĩ Niospa meka kenenifo iskafakĩ: “Nõko Ifãfe afe yorafo tãpikõia.” Nãskakaxõ, “Afe yorafãfe a afara chakafamisfo keskara potatirofo,” ixõ kenenifo.

20 Feronãfãke ãfe pexe efapa sharakõi faxõ a mẽra kecho sharakõifo faa, askaxõ a kecho sharafo mẽra afara sharafo fatiro. Akka a kecho chakafo mẽra afara chakafori fatiro. 21 Mã mĩ chaka mĩ xatekõiax, nã fẽta xinikĩ afara chaka potatiro keskara itamaroko. Nã sapa choka keskara sharakõi mĩ itiro. Nãskax Jesús keskara shara mĩ ikaino Epa Niospa mia yonomapaiyai keskara mĩ aõxõ afara sharafo faxotiro.

22 A naetapafãfe afara chakafo shinãkĩ nã apaiyai keskara faifono mĩri askayamafe. Anori shinãtamaroko Niospa fichipaiyai keskara shinãfe, Jesús chanĩmara fafãi, yorafo noikĩ, fetsafãferi shinãsharakõiaifono, Jesús Ifofaifo ato fe mẽstekõi isharakõife. 23 Anã ẽ mia yoinõ, ea nikasharafe. A feratenãifo ato nikayamafe. Ato fe feratenãpaiyamafe. Askara yorafo samama õitifishkitirofoki. 24 Niospa meka yoimisto tsoa feratetiroma. Anori askatamaroko keyokõi yorafo ato noisharafãi, ato tãpimasharatiro, tenekõisharata ato yoitiro. 25 Fẽtsa Niospa mekakõi nikakaspakĩ meka anorima fisti shinãito, fenãmãshta ato tãpimasharafe. Mĩ ato askafaino ãto chaka xatetirofo Niospa mefeta akaino. Askaxõ Jesús chanĩmara fakõinõfo. 26 Nãskafakĩ anã Niosnoa shinãsharanõfo. Oa tarapa mẽra ikia keskara Satanás ato fapai kiki. Nãskaxõ ato amapaiyai keskafakĩ ato yonofafãini. Akka mia nikaxõ Jesús ato ifitiro. Nãskaifono Satanás afianã ato afara yonomatiroma. Afianã tarapa mẽra ikia keskara ikanima.

<- 2 TIMOTEO 12 TIMOTEO 3 ->