Pablo Corinto Anoafo Kirika Kenexõ Fomani

Pablo Jesús chanĩmara faafo Corinto anoafo kirika kenexõ ato fomani

1 Ẽkĩa Pablo, ẽ mato kirika kenexõ fomai. Nofe yora feta nã Jesús Ifofamis feta, ãfe ane Sóstenes, efeta mato kirika kenexoni. Epa Niospa ea katopaikĩ ea katoni ãfe meka shara Jesucristoõnoa ẽ yoifofãsafanõ. 2 Akka Jesucristo ea nĩchini ẽ ãfe meka shara keyokõi maifo tii ẽ ato yoifofãsafanõ. Corinto anoafãfe mãfi Niospa fakefoki. Nãskakẽ ẽ mato kirika kenexõ fomai. Mã mẽxotaima ichanãmis Niospa meka shara tãpisharakõixikĩ. Niospa mato katoni Jesucristoõnoax mã afe yora shara inõ. Mato fisti katonima, a shinãifori keyokõi ato katoni mato fe Niospa yora inõfo. Nã mai fetsa anoafãfe nõko Ifo ãto Ifori. 3 Mato noikĩ mãto shinã mẽraxõ mato shinãmasharanõ. Epa Nios feta nõko Ifo Jesucristo mato askafanõ.

Jesucristo afara sharafo noko axotiro

4 Mẽ tãpia Jesucristo mato noikĩ afarafo mato tãpimani ãfe õiti keskara mã inõ. Nãskara tãpixõ ẽ Epa Nios kĩfikĩ iskafa fafafãini: “Aicho Epa Niosi, mĩ Corinto anoafo afara sharafo Jesucristoõxõ mĩ ato tãpimanaki,” ixõ ẽ kĩfifafãini. 5 Chanĩma, Jesucristo mato fe rafesharaino aõxõ mã Niosnoa tãpisharakõitiro. Akka ãfe shinãõxõ xafakĩa mã yorafo mã yoisharatiro. Jesucristoõnoa mã ato yoisharatiro. 6 Nõ mato Jesúsnoa yoini keskara nikakĩ mãto õiti fetsafaxõ a keskara shara mã ixii. Nãskakẽ mã Jesús chanĩmara faxõ mã mã ato õimana. 7 Nãskakẽ Epa Niospa ãfe Yõshi Sharaõxõ mato imapaiyai keskara mã iki. Nios chanĩmara faa fetsafo nãskarifiakani Niospa mato shinãmasharaino. Nãskakẽ mã nõko Ifo Jesucristo fe ipaikõikĩ mã manasharai nã nokoaitĩa õixikĩ. 8 Oyoxoma mato kexesharayoi. Ãfe kerex shara mato inãyoi mã Ifofasharano. Nãskakẽ nokoõxõ yoixii iskafakĩ: “Mãfi efe ipanakaki, ẽ mato chaka soaxonano. Nãskakẽ tsõa mato iskafatiroma: ‘Mã chakakõifoki,’ mato tsõa fatirofoma,” ixõ mato Jesús yoixii. 9 Epa Niospa mato katoni ãfe Fake nõko Ifo Jesucristo fe mã rafenõ. Epa Nios chanĩma, noko yoiai keskara aki.

Corinto anoxõ Jesús chanĩmara faafãfe anoris shinãnifoma

10 Efe yora mĩshtichi, ẽ mato yoisharapai. Nõko Ifo Jesucristo ea yoiaino ẽ mato yoi nãnorifos mã shinãnõ, mã fetsa shinãnõma. Jesucristo mato shinãmapaiyai keskara fisti shinãkãfe. 11 Efe yora mĩshtichi, mẽ nika a Jesucristo mato shinãmapaiyai keskara fisti mã shinãima. Cloépa afe yorafo nono fẽkaxõ ea yoiafo mã feratenã faatanãito. 12 Akka mã atiri iskai fetsei: “Nõfi Pablo ifofamiski. Noko tãpimanai keskara kayakaikõi nõ nikamis. Fetsafãfekai kayakai shinãkanima,” ixõ mã yoimis. Askatari fetsafori iskakani: “Nõfi Apolos ifofamiski,” ixõ mã yoimis. Askatari fetsafori mã iskamis: “Nõfi Pedro ifofamiski,” ixõ mã yoimis. Askatari fetsafori mã iskamis: “Nõfi Cristo Ifofai,” ixõ mã yoiketsamis.

13 Efe yora mĩshtichi, ¿afeskai mã feratenãimẽ? Askarakai sharama. Cristokai anori noko shinãmanima feratenãyanã anorima nõ shinãketsanõ. Cristokai ãfe shinã ranãyama. Mẽstekõi fisti noko yoimis. Akka, ¿afeskakĩ “Nõ Pablo ifofaira” mã ato faimẽ? Ẽkai mato ifi cruz ikakĩnoax nãxonima. Cristo fistichi mato ifi cruz ikakĩnoax nãxoni mã Ifofanõ. Askatari ẽkai tsoa faka mẽra ikimakĩ maotisafama ea ifofanõfo. 14 Nãskakẽ ẽ inimai. Ẽkai tsoa maotisafama. Akka Crispo yafi Gayo nã rafes ẽ maotisafa Cristo Ifofaifãfe õikĩ. 15 Nãskakẽ tsõa yoitiroma iskafakĩ: “Pablo ãfe aneõnoax ẽ maotisameni. Nãskakẽ ẽ Pablo ifofai,” ixõ tsõa shinãtiroma. 16 Chõõ, iskaratĩari ẽ rama shinãi. Estéfanas yafi afe yorafori ẽ ato maotisafani. Ẽ shinãyoama ẽ tsoa fetsa maotisafamara ẽ ika. 17 Cristokai ea yoiama ẽ yorafo maotisafapanõ. Akka ea yoia ẽ aõnoa meka shara ẽ mato yoinõ. Ẽa shinãxõ ẽ mato yoima. Ẽa shinãxokai ẽ mato Jesucristo chanĩmara famatiroma. Jesucristo mato ifi cruz ikakĩnoax nãxoni mato chaka soaxoxikĩ. Cristo mekaõxõ Niospa mato chanĩmara famatiro.

Epa Niospa keyokõi tãpikõia afara fetsa apaikĩ atiro. Cristoõxõ noko õimayopaoni

18 Nãskakẽ Jesús ato nãxoni nikakanax a chanĩmara faafãfema yoikĩ iskafakani: “Jesús ifi cruz ikakinoax noko nãxoni nõko chaka noko soaxoxikĩ, ixõ noko yoipaiyaifãfe nõkai chanĩmara fatiroma. Ãa chanĩkani,” ixõ shinãmisfo. Nãskakanax nãfo fenokõikani. Omiskõipakenakafo mẽra fokani. Akka nõ Jesús chanĩmara faito noko nimapakenaka nõ afe ĩpaxanõ. Niospa ãfe shinãõxõ Jesús noko nãxoni nõko chaka noko soaxoxiki. Afara fẽtsakai noko nimatiroma nõ afe nĩpaxanõ. 19 Akka Niospa meka kirikaki kenekĩ iskafanifo:

Fẽtsa yoikĩ iskafatiro: “Nõ tãpikõia. Nõko mãpo shinãsharafãi nõ afara fetsafo fatiro nõfi tãpisharakõiakĩ,” ixõ shinãfikakĩ afaa tãpiafoma. Askarafofi ẽ ato õimanikai afãfe shinãifo keskarakai ẽ ato shinãmanima. Nãfãfekai afaa tãpimisfoma. Ãa shinãmisfo,

ixõ Niospa yoini.

20 Akka, ¿fanĩmẽ a nõ kirika kenekĩ tãpiakõiara imisfo? Akka tãpifikaxõ a Niospa shinãi keskara shinãkanima. Nãfofi Niospa ato õimaxii afaa tãpiafoma keskara fakĩ. “Nõfi afama mĩshti tãpikõiaki,” ifiaifãfe Niospa afaa tãpiama keskarafo ato imai. 21 Tsõa pishtakai ãto shinãmã Nios tãpitirofoma. Nios fistichi keyokõi tãpisharakõia. Nãskakẽ nõ ato yoimis iskafakĩ: “Niospa tãpikõixõ ãfe Fake Jesucristo nĩchini noko nãxonõ nõko chaka noko soaxoxikĩ,” ixõ nõ ato yoimis. A Nios chanĩmara faafãfema yoikĩ iskafamisfo: “Jesús chanĩmara faifãfe aõnoa anorima yoimisfo,” ato famisfo. Akka nã Jesús chanĩmara faifo Niospa ato chaka soaxoni afe nipaxanõfo. Nã nõ mato yoimis.

22 Akka ẽfe kaifo judeofo iskamisfo: “Niospa nai mẽraxõ afama mĩshti noko õimanaito chipo nõ Jesús chanĩmara fatiro,” ixõ shinãmisfo. Akka nã judeofomafãferi afama mĩshti tãpipaikani. Afeskaxõ Niospa yorafo imasharaimãkai tãpipaikani. Askatari afeskaxõ Jesús yorafo ãto chaka soaxonamãkĩ nãri tãpipaikani. Afama mĩshti ãa shinãkakĩ tãpipaikani. Akka tãpitirofoma. Nãskakẽ iskamisfo: “Noko Jesucristoõnoa yoiaifono nõ tãpitiroma, fekaxkõi. Nãskakẽ nõ Jesús chanĩmara faima. Nã afara nõa nõ shinãi nã nõ chanĩmara fai,” ixõ yoimisfo. 23 Nãnori shinãfiaifono nõ yoikĩ iskafamis: “Jesucristo ifi cruz ikakinoax noko nãxoni noko chaka soaxoxikĩ,” ixõ nõ yoimis. Akka ẽfe kaifãfe judeofãfe yoikĩ iskafamisfo: “Ifi cruz ikakĩ mastafo askarakai nõko Ifo itiroma. Akka Cristokai afeskax natiroma,” ixõ judeofãfe shinãmisfo. Nãskatari yora fetsafo Cristoõnoa nikakani akiki kaxepaikani iskamisfo: “Tsõakai askara chanĩmara faima. Akka tsoa fẽtsakai noko nãxotiroma,” ixõ yoimisfo. 24 Askafiaifono nã chanĩmara faifo tii Niospa ato katoni afe ipaxanõfo. Judeofo yafi judeofomari Cristoõxõ Epa Niospa ato katoni chanĩmara faifãfe. Nãskakẽ ãfe shinã sharaõxõ ato nima. Atofi keyokõi tãpikõiaki Cristoõxõ noko nima nõ afe nipaxanõ. 25 Jesús chanĩmara faafãfema yoikĩ iskafamisfo: “Jesucristo noko nãxoni,” ixõ yoifikakĩ anorima shinãmisfo, ãa chanĩkakĩ. “Akka yora mapo sharayato Cristo chanĩmara fatiro,” ixõ yoimisfo a Jesús chanĩmara faafãfema. Akka anorima yoifiafono Niospa ãfe Fake Jesús noko nĩchixoni noko nãxoyonõ. Nãskax Niospa ãfe shinã a chanĩmara faafãfema ãto shinã keskarama. Aatofi mẽstekõi shinãmis. Akka nã chanĩmara faafãfema yoimisfo iskafakakĩ: “Nõ tãpikõia,” ixõ yoifikakĩ yoisharamisfoma. Anorima shinãmisfo. “Nõ afama mĩshti fatiro,” ifiakakĩ fetsafo nimasharatirofoma. Askafikata aforikai ãa chaka soametirofoma. Akka Epa Nios fistichi afama mĩshti fatiroxakĩ noko chaka soaxotiro.

26 Efe yora mĩshtichi, Niospa rama mato katoano afe keskara mã iyopaonimãki. Shinãkapo. Mã fisti rasichi mã kirika kene tãpia mã ipaoni. Askatari mã xanĩfo ipaonima. Nãskax mã finakõia mã ipaonima. Akka nã Jesús chanĩmara faafãfema yoikĩ iskafamisfo: “Afãfekai afaa tãpiafoma,” ixõ mato yoimisfo. 27 Mato askafafiaifono Epa Niospa mato katoni afe yora mã inõ. Matoõnoa yoimisfo iskafakakĩ a Jesús Ifofaifãfema: “Afãfekai afaa tãpiafoma. Shinãsharakanima,” ixõ yoimisfo. Askatari shinãmisfo iskakakĩ: “Nõfi afama mĩshti fatiroki. Akka a Jesús chanĩmara faifo pachikõifo, kerexkai shinãtirofoma. Nõ atiro keskara atirofoma,” ixõ shinãmisfo. Mato askafafiakakĩ chipo mato tãpitirofo. Niospa mato afara shara tãpimanaino õikani rãfipaitirofo. 28 Nãskakẽ shinãkani iskakakĩ: “Jesús chanĩmara faifo afãfekai afaa tãpiafoma. Nãskakẽ nõ ato õipaima,” ixõ matoõnoa mato yoifiaifono Niospa mato katoni afe yora mã inõ. “Mãkai afaama,” mato fafiaifono Niospa mato katoni mã ato õimanõ akka afãfekairoko afaa tãpiafoma. 29 Akka tsõa pishtakai Niospa ferotaifi yoitiroma iskafakĩ: “Ẽ tsoa keskarama. Ẽ shara shinãi fetsafo keskarama,” ixõ yoitiroma. 30 Niosnoax Jesucristo afe yorafo mã inõ. Jesucristoõxõ noko mẽstekõi tãpimani ãfe õiti keskara noko imaxii. Noko nãxoni noko chaka soaxoxiki nõ afe nĩpaxanõ. 31 Nãskakẽ nõ Jesús chanĩmara faaxkai nõ kakapaimis itiroma. Niospa meka yoikĩ yõra kirika keneni iskafakĩ: “Akka tsoakai ãa yoimesharatiroma iskai: ‘Ẽ afama mĩshti tãpikõia,’ ikax ãa kakapaitiroma. Askatamaroko nõ yoisharatiro nã afara sharafo nõko Ifãfe aka,” ixõ kirika ano yõra keneni.

1 CORINTIOS 2 ->