San Marcos 9

1 N‑jaꞌan Jesús:

—Xandaa kuu xa jaꞌan‑r. Dava ñayiu nujuiin yaꞌa, ma kuú‑i nde jini‑i xa taxnuni Ianyuux. Jini koio‑i xa Ia kunxaꞌnu ka kuu‑ia te taxnuni‑ia ñuñayiu.

N‑ka xo ndeꞌa se dakuaꞌa Jesús xadiñu‑ia

(Mt. 17:1‑13; Lc. 9:28‑36)

2 Nuu iñu kɨu, ndeka Jesús Spedru xiꞌin Jacobo xiꞌin Sua juaꞌan. Ndruni ni‑s ndeka ñaꞌa‑ia juaꞌan, nde dɨkɨ yuku dujun. Ijan nɨni xndeꞌa‑s, te n‑nadama Ianyuux Jesús. Danaa, diñu xa diñu nuu‑ia, te diñu xa diñu ñɨɨ‑ia. 3 Ná kaa yuꞌa yodo dɨkɨ tnduu kaa daꞌma‑ia. Kuixi xa kuixi, te diñu xa diñu. Ña tuu ni ɨɨn xa kɨyɨ ná kɨyɨ daꞌma‑ia hora ijan. 4 Danaa, n‑nujuiin ndi Elías xiꞌin ndi Moisés ijan. Ndatnuꞌu‑s xiꞌin Jesús. 5 N‑jaꞌan Spedru nuu Jesús:

—Maestru, ¡naka vaꞌa xa tuu‑ro yaꞌa! Na kadavaꞌa koio‑da uni veꞌe todo. Ɨɨn veꞌe mee‑n, ɨɨn veꞌe Moisés, ɨɨn veꞌe Elías.

6 Chi ña n‑kutnuni ini Spedru nax n‑jaꞌan‑s, chi yo n‑ka yuꞌu‑s, ndruni‑s. 7 Ijan nuu vikó, te n‑chidaꞌu ñaꞌa vikó jan ntdaa‑s. Xiti vikó jan n‑ka teku‑s tnuꞌu:

—Se yaꞌa kuu Daꞌya mani‑r. Kunini koio‑n nax jaꞌan‑s.

8 Hora ijan ni n‑ka xo ndeꞌa‑s nituꞌu lado ijan, ko ña n‑ka xini ka‑s ni Elías ni Moisés. Menga Jesús nujuiin xiꞌin‑s ijan.

9 Nɨni ka nuu‑s yuku, te n‑taꞌu tniu‑ia xa maxku najani‑s ni ɨɨn nuu ñayiu nax n‑ka xini‑s. Nde na yaꞌa xa nandoto Se kuu ñani tnaꞌa ñayiu, dada najani koio‑s ntdaa xa n‑ka xini‑s. 10 Xijan kuu xa ña n‑ka jaꞌan‑s ni ɨɨn. Diko ni n‑xijan tnuꞌu tnaꞌa‑s nax juini kachi xa kuú‑ia te nandoto‑ia. 11 N‑ka xijan tnuꞌu‑s Jesús:

—¿Nakuenda ka jaꞌan se tuꞌa vaꞌa tnuꞌu n‑chidotnuni Moisés xa io xa kiꞌna ka Elías ndixi?

12 N‑xiaꞌan‑ia:

—Xandaa kuu xa kiꞌna ka ndixi Elías xa ndadavaꞌa‑s ntdaa. Te jaꞌan tnuꞌu Ianyuux xa kueꞌe vida yaꞌa Se kuu ñani tnaꞌa ñayiu, te jaꞌan ñayiu xa ña ndoñuꞌu ñaꞌa‑i. 13 Ko jaꞌan‑r nuu mee‑n xa xá n‑ndixi Elías. Te n‑ka kida ñayiu Elías ntdaa xa n‑ka juini mee‑i. Nani yodotnuni tnuꞌu Ianyuux, dani n‑ka kida‑i‑sɨ.

N‑ndadavaꞌa Jesús ɨɨn seluchi

(Mt. 17:14‑21; Lc. 9:37‑43)

14 Juan nuꞌu Jesús xiꞌin ndruni se dakuaꞌa‑ia, nde nuu xtuu dava ka se dakuaꞌa‑ia. Ijan n‑ka xini‑s kueꞌe xa kueꞌe ñayiu naduku nduu nuu‑s. Se tuꞌa vaꞌa tnuꞌu n‑chidotnuni Moisés, n‑ka jantnaꞌa tnuꞌu‑s xiꞌin se dakuaꞌa Jesús. 15 Na n‑ka xini ñayiu jan Jesús, te n‑ka yuꞌu‑i. N‑ka kendava‑i juaꞌan‑i nuu‑ia, te n‑ka jaꞌan‑i xa vanga takuu‑ia. 16 N‑xijan tnuꞌu‑ia‑i:

—¿Nax ka jantnaꞌa tnuꞌu‑n xiꞌin‑s?

17 Te ɨɨn se nujuiin meꞌñu ñayiu jan n‑jaꞌan:

—Maestru, ndeka‑da daꞌya yɨɨ‑da vaxi nuu‑n. Ñuꞌu ñaꞌa tachi uꞌu, te ña jaꞌan‑s. 18 Davaꞌa nga nuu tnɨɨ ñaꞌa‑i, te dajane ñaꞌa‑i nuu ñuꞌu. Xido t‑iñu yuꞌu‑s, te xax ndodo tnaꞌa nuꞌu‑s, te ndeꞌe nduyutnu‑s. Xá n‑xijan‑da nuu se dakuaꞌa‑n xa kineꞌe‑s‑yɨ, ko ña n‑ka kuaꞌa‑s.

19 N‑jaꞌan Jesús:

—Ñayiu ña jandixa ka kuu‑n. ¿Nada ka kɨu io xa kutuu‑r xiꞌin‑n? ¿Nada ka kɨu io xa kundetu kuee‑r xaxeꞌe‑n?

N‑xiaꞌan‑ia nuu taa seluchi jan:

—Taxi‑s.

20 Te ndeka‑s seluchi nuu‑ia. Hora n‑xini tachi uꞌu Jesús, loko ndeꞌe n‑daxiyɨꞌɨ‑i‑sɨ. N‑ndua seluchi nuu ñuꞌu, te n‑tuniꞌna‑s, te n‑xido t‑iñu yuꞌu‑s. 21 N‑xijan tnuꞌu Jesús taa seluchi jan:

—¿Nada kuia n‑kuu kuꞌu‑s kueꞌe yaꞌa?

N‑jaꞌan taa seluchi:

—Nde na luchi‑s. 22 Kueꞌe vuelta n‑dajane ñaꞌa‑i nuu ñuꞌu koko a nuu ndute, xa kaꞌni ñaꞌa‑i. Ko nux kuaꞌa‑n, chindee ñaꞌa‑n xaxeꞌe‑s. Kundau ini ñaꞌa‑n, mee‑da xiꞌin mee‑s.

23 N‑xiaꞌan Jesús:

—Nux kuaꞌa‑n xa jandixa‑n. Nuu ñayiu jandixa Ianyuux, kuaꞌa‑ia xa kada‑ia ntdaa.

24 N‑kana taa seluchi jan:

—¡Jandixa‑da! Chindee ñaꞌa‑n xa na jandixa ka‑da.

25 N‑xini Jesús xa ka taka kueꞌe xa kueꞌe ka ñayiu ijan, te n‑kudeen‑ia nuu tachi uꞌu jan. N‑jaꞌan‑ia:

—Tachi uꞌu doꞌo, tachi uꞌu ña jaꞌan, taꞌu tniu ñaꞌa mee‑r. ¡Ta kee seluchi de! Te maxku ndɨu ka‑n‑sɨ.

26 N‑kana xee tachi uꞌu jan, te n‑kida‑i xa n‑xiyɨꞌɨ ka seluchi, te n‑kee‑i. Katuu seluchi ná katuu ndɨyɨ, te n‑ka jaꞌan kueꞌe ñayiu jan xa n‑xiꞌí‑s. 27 Ko n‑tnɨɨ Jesús ndaꞌa‑s, te n‑ndoneꞌe‑ia‑s. Ijan n‑ndojuiin‑s.

28 Ijan dada n‑kɨu Jesús veꞌe, te n‑ka xijan tnuꞌu se dakuaꞌa‑ia:

—¿Nakuenda ña n‑ka kuaꞌa‑da xa kineꞌe‑da tachi uꞌu seluchi jan?

29 N‑xiaꞌan‑ia:

—Uꞌu kuu xa kineꞌe koio‑n tachi uꞌu yaꞌa. Io xa kajan taꞌu‑n, te ma kaxi‑n xa kuneꞌe ii‑n, dada ndaku‑n.

Vuelta kuu uu n‑jaꞌan Jesús xa io xa kuú‑ia

(Mt. 17:22‑23; Lc. 9:43‑45)

30 Ijan n‑kee‑ia xiꞌin se dakuaꞌa‑ia, te n‑yaꞌa‑ia xiꞌin‑s distrito Galilea. Te ña n‑juini‑ia xa jini ñaꞌa ñayiu ijan. 31 Chi n‑dakuaꞌa‑ia se dakuaꞌa‑ia. N‑xiaꞌan‑ia:

—Ɨɨn seyɨɨ, diko‑s Se kuu ñani tnaꞌa ñayiu nuu se kaꞌni‑s. Kaꞌni koio‑s‑sɨ, te nuu uni kɨu nandoto‑s.

32 Ko se dakuaꞌa‑ia, ña n‑ka kutnuni ini‑s tnuꞌu‑ia. Te n‑ka yuꞌu‑s xa kajan tnuꞌu‑s‑ia.

Se dakuaꞌa Jesús, n‑ka jantnaꞌa tnuꞌu‑s ndeda ɨɨn‑s kunxaꞌnu ka

(Mt. 18:1‑5; Lc. 9:46‑48)

33 N‑xee‑ia xiꞌin‑s ñuu nani Capernaum. Na n‑xo tuu‑ia veꞌe, n‑xijan tnuꞌu‑ia‑s:

—¿Nax n‑ka jantnaꞌa tnuꞌu‑n ichi?

34 Ko ña n‑ka jaꞌan‑s ni ɨɨn. Chi ichi n‑ka jantnaꞌa tnuꞌu‑s ndeda mee‑s kunxaꞌnu ka. 35 N‑nukoo Jesús ijan, te n‑kana‑ia n‑uxi uu se dakuaꞌa‑ia, te n‑xiaꞌan‑ia‑s:

—Ɨɨn ñayiu, nux juini‑i xa kunxaꞌnu ka‑i, io xa ku kuu‑i ná kuu ñayiu ndijun daꞌu ni nga nuu ntdaa ñayiu. Io xa junukuechi‑i nuu ntdaa ñayiu.

36 N‑tnɨɨ Jesús ndaꞌa ɨɨn seluchi nujuiin ijan. N‑xantuu‑ia‑s meꞌñu ntdaa‑s, te n‑nundee‑ia‑s. N‑jaꞌan‑ia:

37 —Ɨɨn ñayiu, nux kueka vaꞌa‑i idini seluchi, kuu ná kuu seluchi yaꞌa, xaxeꞌe mee‑r, dani kueka ñaꞌa vaꞌa‑i mee‑r tuku. Te nux kueka vaꞌa‑i mee‑r, dani kueka vaꞌa‑i Ia n‑tundaꞌa ñaꞌa mee‑r vaxi.

N‑jaꞌan Jesús: “Ɨɨn seyɨɨ, nux ña xini uꞌu ñaꞌa‑s, dani chindee ñaꞌa‑s”

(Lc. 9:49‑50; Mt. 10:42)

38 N‑xiaꞌan Sua:

—Maestru, n‑ka xini‑da ɨɨn se kineꞌe tachi uꞌu ñuꞌu anu ñayiu. N‑jaꞌan‑s xa kineꞌe‑s‑yɨ xiꞌin xa taxnuni mee‑n, ko ña kunduu‑s xiꞌin‑ro. N‑ka taꞌu tniu‑da‑s xa maxku duꞌa kada ka‑s, chi ña kunduu‑s xiꞌin‑ro.

39 Ko n‑jaꞌan Jesús:

—Maxku jaꞌan ka‑n xa maxku kada‑s. Chi ɨɨn seyɨɨ, nux kada‑s milagru xiꞌin xa taxnuni mee‑r, te dada ma kuaꞌa‑s xa yachi kuiꞌa jaꞌan ñaꞌa‑s mee‑r. 40 Chi ɨɨn seyɨɨ, nux ña xini uꞌu ñaꞌa‑s, dani chindee ñaꞌa‑s. 41 Davaꞌa nga ñayiu taxi ɨɨn yaxi ndute mee‑n, xaxeꞌe mee‑r, te chiyaꞌu‑r‑yɨ. Xandaa kuu xa jaꞌan‑r. Nux taxi‑i idini yaxi ndute na koꞌo mee‑n xaxeꞌe xa kunduu‑n xiꞌin Cristu, nuncas ma kuita xa niꞌi‑i taꞌu‑i.

“Maxku kada koio ka‑n xa uꞌu”

(Mt. 18:6‑9; Lc. 17:1‑2)

42 ʼƗɨn seluchi jandixa ñaꞌa mee‑r, nux kada ɨɨn ñayIu xa kada‑s kuechi, te vaꞌa ka xa n‑ka dakeé seyɨɨ ñayiu jan nuu ndute kaꞌnu n‑kuu. Vaꞌa ka xaxeꞌe ñayiu jan nux ɨɨn yodo molinu, ɨɨn yodo yo vee, ñuꞌu dujun‑i, te dakeé koio‑s‑yɨ nuu ndute kaꞌnu, te kuú‑i n‑kuu. 43 Nux na kada ndaꞌa‑n xa kada‑n kuechi, kaꞌnde‑n. Vaꞌa ka xaxeꞌe‑n xa idini ndaꞌa‑n koo, te kɨu‑n nuu kutuu vaꞌa‑n kuia ma jɨn ndɨꞌɨ, dada xa io nduu ndaꞌa‑n, te jɨꞌɨn‑n andea nuu ñuꞌu koko nuncas ma ndaꞌva. 44 Andea ma kuú tndaku ka xaxi kuñu ñayiu, te nuncas ma ndaꞌva ñuꞌu. 45 Nux na kada xeꞌe‑n xa kada‑n kuechi, kaꞌnde‑n. Vaꞌa ka xaxeꞌe‑n, xa idini xeꞌe‑n koo, te kɨu‑n nuu kutuu vaꞌa‑n kuia ma jɨn ndɨꞌɨ, dada xa io nduu xeꞌe‑n te dakeé ñaꞌa‑ia andea nuu ñuꞌu koko nuncas ma ndaꞌva. 46 Andea ma kuú tndaku ka xaxi kuñu ñayiu, te nuncas ma ndaꞌva ñuꞌu. 47 Nux na kada nduchi nuu‑n xa kada‑n kuechi, tava‑n. Vaꞌa ka xaxeꞌe‑n, xa idini nduchi nuu‑n koo, te kɨu‑n nuu taxnuni Ianyuux, dada xa io nduu nduchi nuu‑n te dakeé ñaꞌa‑ia andea. 48 Andea ma kuú tndaku ka xaxi kuñu ñayiu, te nuncas ma ndaꞌva ñuꞌu.

49 ʼChiꞌi‑ro ñɨɨ́ ntdaa xa doko‑ro nuu Ianyuux. Ná kuu ñɨɨ́ jan kuu xa kueꞌe vida yaꞌa‑n ñuñayiu yaꞌa. Dɨuni ná kuu ñuꞌu koko, kuu xa kueꞌe vida yaꞌa koio‑n ñuñayiu yaꞌa. 50 Ná kuu ñɨɨ́ kuu mee‑n. Vaꞌa xiniñuꞌu ñɨɨ́. Ko nux ñatuka ede, ¿nax kada‑n xa nduu ede ɨnka vuelta? Xijan kuu xa, io xa ku kuu koio mee‑n ná kuu ñɨɨ́ vaꞌa, ñɨɨ́ ede, nɨni xtuu‑n ñuñayiu yaꞌa. Io xa kutuu mani‑n ɨɨn‑n xiꞌin ɨnka‑n.

<- San Marcos 8 San Marcos 10 ->