Zo Muli 19

Kinzi tamâta sindeka ŋana Babilon lawea zavaruŋa kâ

1 Ŋinde ilâ lâ, ŋineŋga naŋa aloŋo nduŋeŋa ŋalae tina ipâŋga lâ samba ilo, itogo tamâta ŋgu ŋalae kawanzi pakâe-pakâe mine. Aku sisarâwa mine tu,

“ ‘Tapanea Maro Kindeni ŋa! I nde kinda nenda Yautâŋa Tamwata! I ŋa ŋalae ndo, aku ne walo kaika nde ŋalae tina! 2 Maro Kindeni ne vetâŋa ŋana ipare nia panzi tamâta kâ, ande mao ku sondo ndo. I ipa ŋgua ŋana ipare nia pa nzâla taine ŋalae, inani kala muŋga iyaulanzi tamâta ndoni lâ tâno kulu ŋana i ne vetâŋa potomule kie-kie kâ. Taine ŋinde ne soki ŋalae ŋana ipunzi Maro Kindeni ne wurâta tamâta pâta simâte. Mine kala Maro Kindeni ipare nia papa i marumbu lâ.”

3 Ŋineŋga kinzi sisarâwa kilo mine tu,

“ ‘Tapanea Maro Kindeni ŋa! Yââ kana lawea ŋalae ŋinde kala ne mundo kâki, ma ikâki mine ku imo nâ!”

4 Aku kinzi aŋelo mbâna-mbâna 24, sitavanzi kelekele ŋapa vianzi kâ ŋinde, ande kinzi rârâni sipare tukunzi ku sipanea Maro Kindeni, ina isaŋona koipu ŋalae ne saŋonâŋa nia. Kinzi sisarâwa mine tu, “Mao nâ! Tapanea Maro Kindeni ŋa!”

5 Ŋineŋga sarawâŋa toŋge nde iyoka pa Maro Kindeni ne saŋonâŋa nia imâ mine tu, “Miki Maro Kindeni ne wurâta tamâta rârâni, miki tamâta ŋalaŋala wa tamâta kaa kaa wa, miki ŋinde uru kamege ŋana i kâ, ande miki rârâni ma kapanea nenda Maro Kindeni!”

Lama ne waiŋa pakâeŋa kâ ne kâŋa-nuŋa ŋalae ipâŋga

6 Ŋineŋga naŋa aloŋo nduŋeŋa toŋge, itogo tamâta ŋgu ŋalae tina sisuŋa kawanzi mine. Nduŋeŋa ŋinde itogo lââ ŋalae isoŋga ndue ne nduŋeŋani, aku itogo mbamba ipu kaika mine. Kinzi sisarâwa kaika siporo mine tu,

“Tapanea Maro Kindeni ŋa! Kinda nenda Maro Ŋalae Kindeni, i Walo Tamwata, ande imo Maro Ŋalae! 7 Kala ŋine kinda ilonda ara ku tandeka ŋalae tina, aku tapanea i ŋa. Ŋana tu Lama ne zo ŋana ikâe kâ nde imâ ipâŋga lâ, aku i kaiwa iluku lâ kala imo io tini ŋana. 8 Maro Kindeni pasawaŋa kanaŋeti toŋge ilua pakâeŋa taine ŋinde ŋana isawa lâ tini kâ. Pasawaŋa ŋinde nde pâne ndo, aku muso toŋge keno tini tia ndo.”

(Pasawaŋa kanaŋeti ŋinde nde itogo vetâŋa ara Maro Kindeni ne tamâta uru siveta.)

9 Ŋineŋga aŋelo ŋinde ipai naŋa tu, “Noko kuŋgere ŋgua mine lâ pepa tini: ‘Tamâta ŋinde Maro Kindeni muŋga isarawanzi tu ma sika kâŋa-nuŋa ŋalae ŋana Lama ne waiŋa pakâeŋa kâ, kinzi tamâta ŋinde ma sindeka.’ ” Aku ipai naŋa kilo mine tu, “Ŋgua ŋine nde Maro Kindeni kawa ŋgua mao.”

10 Aŋelo iporo mine lâ, ŋineŋga naŋa atundu ndue i kie tini laiti ŋana apanea i kâ. Andeta ipai naŋa mine tu, “Noko kuveta mine ndimo! Naŋa kala nde noko nuwala wurâta tamâta, tavanzi noko ninambwe ŋinde kalonzi tawana Yesu kawa ŋgua. Noko ma kupanea Maro Kindeni simbo nâ! Ŋgua rârâni Yesu muŋga iporo itula ŋinde, ande ŋana igagati tamâta ilonzi kalonzi ŋana situla i parina.”

Yoane imora tamâta toŋge isaŋona hosi pâne toŋge kumbu

11 Ŋineŋga naŋa amora samba ipwa, aku amora hosi pâne toŋge imandi naoŋgu. Aŋga tamâta toŋge nde isaŋona hosi ŋinde kumbu, i ŋa mine tu, “Naŋa uru aveta ikura naneŋgu ŋgua pâŋa mine”, aŋga i ŋa toŋge ikeno mine tu, “Naŋa uru aveta vetâŋa mao nâ”. I uru iveta vetâŋa sondo nâ, lâ zo ŋana ipa ŋgua ŋana ipare nia panzi tamâta kâ, aŋga lâ zo ŋana iveta paraŋa kâ tona. 12 I mata nde itogo yââ mela-mela mine, aku ikundu koipu ŋalaŋala nenzi loki-loki arara rârâ ŋinde lâ kulu. Aku ŋgua ŋgereŋa toŋge ikeno lâ i tini. Ŋgua ŋinde nde ŋoa toŋge, aku i tamwata simbo nâ isama ŋoa ŋinde kilala. Kinzi tamâta sikura tu sisama ŋoa ŋinde kilala, ande tia. 13 I isawa pasawaŋa luandondo ara toŋge lâ tini, aku tamâta seenzi ikeno pasawaŋa ŋinde tini. Kinzi sipatu i ŋa mine tu, “Maro Kindeni Kawa Ŋgua”. 14 Aku naŋa amoranzi samba ne zugu tamâta soka i muli simâ. Kinzi zugu tamâta ŋinde taitu-taitu nde sisaŋona nenzi hosi pâne kumbunzi. Kinzi sisawa pasawaŋa pâne ara ndo lâ tininzi, kala salaga-salaga ndo. 15 Pila kazâŋa kâ toŋge, mata âla mwasina, ande ikeno tamâta iyoka imuŋga panzi ŋinde kawa ilo. Pila ŋinde nde ŋana ipunzi tamâta ŋgu lâ tâno kulu kâ. “I ma ikai poe kaika ndo panzi tâno tamâta rârâni.” Maro Kindeni Walo Tamwata ne wisi-nâna ŋalae tina nde ikeno panzi ne kazâŋa tamâta ŋinde. Mine kala i ma ipalenzi pâta, itogo tamâta sipale waini kanaŋo lâ kondo ŋalae ilo mine. 16 Aku ŋgua ŋgereŋa pinde nde ikeno lâ tamâta ŋinde ne pasawaŋa luandondo ŋinde tini, aku ikeno i kie tini mine nâ. Ŋgua ŋinde nde ŋoa toŋge, aku ikeno mine tu, “Naŋa amo Koipu Ŋalae panzi koipu ŋalaŋala rârâni, aku amo Maro Ŋalae panzi maro rârâni”.

17 Ŋineŋga naŋa amora aŋelo toŋge imandi kari tini laiti. I isarâwa kaika panzi sii rârâni uru silou lâ nia maa, aku ipainzi mine tu, “Miki rârâni kamâ taitu ŋana kaka Maro Kindeni ne kâŋa-nuŋa ŋalae kâ! 18 Miki ma kaka tamâta rârâ mbatunzi, kinzi koipu ŋalaŋala wa, kinzi zugu tamâta nenzi koipu wa, kinzi tamâta kaika wa, kinzi zugu tamâta uru sisaŋona hosi kumbunzi wa. Aku miki ma kaka zugu tamâta ŋinde nenzi hosi mbatunzi tona. Miki ma kaka tamâta rârâni mbatunzi, kinzi tamâta uru siveta wurâta koa tia nâ wa kinzi tamâta uru sikai mbumbu lâ nenzi wurâta tini wa, kinzi sugorai tamwatanzi wa kinzi mbaliŋa warakanzi wa.”

19 Ŋineŋga naŋa amora ŋgoa ŋgoi ŋinde. I imo kunzi tâno ne koipu ŋalaŋala sitavanzi nenzi zugu tamâta. Kinzi simâ taitu sipasau lâ ŋana sipara kuku tamâta ŋinde isaŋona hosi kumbu tavanzi i ne zugu tamâta. 20 Aku marumbu. Tamâta ŋinde ilâ ikale ŋgoa ŋgoi kaika lâ, aku ikale ŋgua-tulâŋa tamâta laŋeŋa ŋinde kaika tona, inani kala muŋga ikai ŋgoa ŋgoi ndamwa ku iveta mâsi kaika ŋalaŋala pinde. Ŋana ŋgua-tulâŋa tamâta laŋeŋa ŋinde ne vetâŋa ŋinde kâ, ande i muŋga ilaŋenzi tamâta pinde, kala sikai ŋgoa ŋgoi ne mâsi kilala lâ tininzi ku sipare tukunzi pa i ne pareŋa-mâsi tona. Andeta tamâta ŋinde ikainzi ŋgoa ŋgoi kuku i ne ŋgua-tulâŋa tamâta laŋeŋa ŋinde kâki, aku itambiranzi sindue silâ yââ ŋalae ne mbââ ilo, nia ŋinde mira ndimoro ipipi lâ ikeno ilo ku imo kana nâ.

21 Ŋineŋga tamâta isaŋona hosi kumbu ŋinde nde ikai pila ŋinde muŋga ikeno i kawa ilo, aku ipunzi ŋgoa ŋgoi ne zugu tamâta ndoni sipamateteu marumbu lâ. Aku kinzi sii rârâni sika tamâta ŋinde rârâni mbatunzi lee kapwanzi pupuro ndo.

<- Zo Muli 18 Zo Muli 20 ->