Link to home pageLanguagesLink to all Bible versions on this site
11
Tamâta rua situla Maro Kindeni kawa ŋgua pwataki
1 Ŋineŋga taumbwa tuka toŋge silua naŋa ŋana aloe kelekele ne luandondo kâ. Aku ŋgua imâ pa naŋa kilo mine tu, “Noko kulâ, aku kuloe Maro Kindeni ne luma sapâŋa tava luma ŋinde ne patarawâŋa nia. Aku kusowe tamâta kambwaŋenzi tona, kinzi ŋinde uru simo lumani ndaina ilo siwâŋgi sipanea Maro Kindeni. 2 Taitu noko ma kuloe pasauŋa nia ikeno nzâmba ŋgaŋe ŋinde ndimo. Kupile imo, ŋana tu Maro Kindeni nia ŋinde ilanzi tamâta lâ tinikoa ŋgu. Aku kinzi ŋgu ŋinde ma kenzi nâ sipale Maro Kindeni ne lawea sapâŋa Jerusalem sinukia tona nia. Kinzi ma siveta mine lee, ikura nzimona tamâta rua kanaŋo rua (42) ilâ lâ ŋga.

3 Aku kinzi tamâta rua ma sikai naŋa ndamwâŋgu, aku ma asupwanzi silâ ŋana siporo situla ŋgua lee, ikura lâ nzimona tamâta rua kanaŋo rua ŋinde. Kinzi rua ma sipasawa pasawaŋa ŋana kalo-kalo kâ lâ tininzi.” 4 Tamâta rua ŋinde nde sitogo kâi “oliv” rua ŋga sinâla rua ŋinde uru simandi Maro Ŋalae nao, inani kala imo koipu ŋalae panzi tamâta ŋgu ndoni lâ tâno kulu. 5 Ambo tamâta toŋge ma iveta tu ikai kazâŋa panzi rua, ande yââ ma ipâŋga lâ rua kawanzi ilo, ku ma iyâti ilâ ikananzi kazâŋa tamâta ŋinde marumbu lâ. Ŋana tu Maro Kindeni ne pateâŋa ikeno mine: tamâta ea ipatogo ŋana nâna ilua kinzi rua kâ, ande i ma imâte mine nâ. 6 Kinzi tamâta rua ŋinde nenzi walo ikura ŋana sipono nia maa tu karâzi ma imbe tia kâ. Nenzi walo ma ikeno mine lee ikura zo rârâni kinzi rua simo situla ŋgua. Aku mine nâ, kinzi rua nenzi walo ikura ŋana siveta lââ ipalele ipâŋga see, aku ikura ŋana siveta kazâŋa kie-kie ipâŋga ŋana izavarunzi tamâta lâ tâno kulu. Kinzi rua nenzi walo ŋana siveta vetâŋa mine kâ nde keno panzi. Lâ zo ndia ilonzi tu siveta mine, ande ma siveta.

7 Kinzi rua ma situla Maro Kindeni kawa ŋgua lee marumbu lâ, ŋineŋga ŋgoa ŋgoi ŋalae ŋinde, ina uru imo mbââ ŋalae ilo, ande ma ipile mbââ ŋinde ku ikâki imâ ŋana ipara kunzi. Mbââ ŋinde indue ilâ, aku ne lambu tia. Ŋgoa ŋgoi ŋinde ma ipara kunzi rua, aku ma ipunzi pâta simâte. 8 Kinzi rua karaenzi ma ikeno Jerusalem lawea ne nzâla-kawa. Kinda uru taporo ŋgua tambirâŋa ŋana lawea ŋalae ŋinde kâ, aku tapatu i ŋa tu “Sodom” wa “Isip” wa. Muŋga kinzi ŋgua-tulâŋa tamâta rua ŋinde nenzi Maro Ŋalae kala itâra lâ kâi popole tini ku imâte lâ laweani ndaina. 9 Aku tamâta pinde lâ ŋgu rârâni simo tâno ndoni, nenzi ŋgua piti-piti wa tininzi kie-kie wa, kinzi ŋinde ma matanzi silea pa kinzi rua karaenzi ikura lâ kari ŋato ŋga pinde. Andeta kinzi ma tininzi pwâka tu sikeanzi kâ. 10 Tamâta rârâni simo tâno kulu ma sindeka nâ ŋana kinzi rua nenzi mateŋa kâ, aku ma sika waiŋa ku sipalulua nenzi wisi-ara ilâ pa tininzi pinde, ŋana tu muŋga kinzi ŋgua-tulâŋa tamâta rua ŋinde nâna silanzi tamâta simo tâno kulu.

11 Kari ŋato ŋga pinde ŋinde marumbu lâ, ŋineŋga Maro Kindeni imbana koroani ilâ kinzi rua ilonzi, aku kinzi rua simo vianzi kilo, kala simandi sânda. Kinzi tamâta nde simoranzi rua, aku siruru pâta kanaŋo. 12 Ŋineŋga ŋgua-tulâŋa tamâta rua ŋinde nde siloŋo kawa ŋalae toŋge ne sarawâŋa iyoka pa samba ilo imâ panzi mine tu, “Miki rua kakâki kamâ ŋai!” Ŋineŋga take-take toŋge imâ ituranzi rua lâ, aku kinzi rua sikâki silâ samba ilo lâ nenzi kazâŋa tamâta naonzi.

13 Aku lâ zo ndainani nâ, ande ogigi iririŋo ŋalae. Ŋinde itogo siwaenzi lawea ŋinde ne luma rârâni sipâŋga ŋgu saŋao saŋao, aku luma “ŋgu” toŋge nde saputi ndue. Mine kala tamâta 7,000 nde sipamateteu lâ. Aŋga kinzi tamâta simo vianzi yo ŋinde nde siruru pâta lâ, aku sipanea Maro Kindeni, ina kala imo samba ilo.

14 Malia ŋalae tina rua ŋinde ŋga marumbu lâ. Andeta miki kaloŋo ŋga; zo mbwana-mbwana nâ ŋana malia ŋalae tina toŋge kilo kala ma imâ ipâŋga kâ.

Aŋelo toŋge kilo kala imbana ne tando
15 Ŋineŋga aŋelo toŋge kilo kala imbana ne tando. Aku naŋa aloŋo ŋgu ŋalae simo samba ilo sisarâwa kawanzi ŋalae mine tu,
“Kala ŋine nenda Maro Ŋalae tava ne Pateâŋa Tamâta Kirisi rua nde sikai koipu ŋalaŋala panzi tamâta simo tâno ndoni marumbu lâ! Aku i ma imo koipu ŋalae mine ku imo nâ!”
16 Ŋineŋga kinzi aŋelo mbâna-mbâna 24, kinzi ŋinde uru sisaŋona nenzi saŋonâŋa nia lâ Maro Kindeni nao, ande sipare tukunzi ku naonzi tundu sipanea Maro Kindeni. 17 Kinzi siporo tu,
“Maro Ŋalae Kindeni, noko Walo Tamwata, noko kumo mine, aku muŋgani kumo mine nâ. Maka kawama ndaŋge pano, ŋana tu noko pwai ne walo ŋalae lâ tini marumbu lâ, aku kumandi ŋana pwai maro panzi tamâta kâ. 18 Kinzi tamâta
‘lâ tinikoa ŋgu nde wisinzi nâna ŋalae pa noko. Kala ŋine noko ne zo ŋana wisi-nâna kâ nde imâ ipâŋga lâ. Mine kala zo ŋana noko ma kupare nia panzi tamâta muŋga simâte ŋinde, ande imâ ipâŋga lâ. Aku zo ipâŋga lâ ŋana noko ma kulu ara kulanzi noko ne wurâta tamâta kinzi ŋgua-tulâŋa tamâta, sitavanzi tamâta rârâni uru sipaneano ku simege ŋanano, kinzi tamâta ŋalaŋala wa tamâta kaa kaa wa. Aku zo ŋana noko ma kuyaulanzi tamâta ŋinde muŋga siyaula tâno, ande imâ ipâŋga lâ.”

19 Kinzi aŋelo mbâna-mbâna siporo ŋgua ŋine lâ, ŋineŋga aŋelo toŋge ikai Maro Kindeni ne luma sapâŋa ne nzâla piti, lumani ndaina ikeno samba ilo. Aku lâ luma sapâŋa ilo, ande naŋa amora Juda nenzi sopi sapâŋa, kelekele ŋana Maro Kindeni ne ŋgua pâŋa muŋgâŋa ikeno ilo ŋinde. Aku mâsi ŋalaŋala pinde ipâŋga; loloa salaga ilâ wa imâ wa, aŋga mbamba ipu, aŋga nia nduŋeŋa ŋalae ipâŋga, aŋga ogigi ririŋo ŋalae, aŋga karâzi ipagema tava “ais” aku imbe ndue.

<- Zo Muli 10Zo Muli 12 ->