Matai 28

Yesu imandi sânda imo via kilo

Malaka 16:1-14, Luka 24:1-49, Yoane 20:1-23

1 Juda nenzi pwareâŋa ne zo sapâŋa marumbu lâ ŋga. Aku wurita kilo, lâ sânda, mbwale pwataki lâ, ŋineŋga Maria, i Makdala taine, nde ikai nuwaka Maria, aku rua silâ ŋana simora Yesu ne kuru kâ. 2 Andeta walele nâ ogigi ririŋo ŋalae tina, ŋana tu Maro Ŋalae ne aŋelo toŋge iyoka pa samba indue imâ pa kuru ŋinde, ku itambumbua mira piti lâ kuru kawa. Itambumbua piti lâ, ŋineŋga isaŋona mira ŋinde kulu. 3 Aŋelo ŋinde tini nde sinala nia itogo loloa salaga mine, aŋga ne pasawaŋa nde pâne ndo. 4 Aku kinzi zugu tamâta kala sikatona kuru ŋinde nde simora aŋelo ŋinde, ku siruru pâta kanaŋo. Tininzi ruru, aku patanzi sindue sikeno tâno kulu, sitogonzi mateŋa tamâta mine.

5 Ŋineŋga aŋelo nde ipainzi taine rua tu, “Miki rua karuru ndimo. Naŋa asama tu miki kamâ tu kamora Yesu, ina muŋga itâra lâ kâi popole tini ku imâte lâ. 6 Taitu i nde imo ŋai tia; imandi sânda lâ kala imo via kilo, ikura ŋgua muŋga iporo ŋinde. Miki rua kamâ kamora nia kala muŋga sio karae ndue ikeno ŋine. 7 Ayo, miki walele nâ kalâ kapainzi ne pâri-tamâta mine tu, ‘Imandi lâ mateŋa nianzi imo via kilo, kala imuŋga pami ilâ Galilaya tâno. Miki kalâ ma kasânda i kulu lâ niani ndaina.’ Naŋa amâ ŋana atula ŋgua ŋine pami, kala atula pami lâ.”

8 Aŋelo iporo ŋgua ŋine panzi taine rua marumbu lâ, ŋineŋga walele nâ kinzi rua sipile kuru nia ku sipalilu silâ tu siporo ŋgua ŋinde panzi Yesu ne pâri-tamâta. Tininzi ruru, andeta ilonzi ndeka pâta lâ. 9 Soka nzâla sipalilu silâ yo, ŋineŋga walele nâ Yesu tamwata ipakâtu kunzi ku iporo tu, “Maro Kindeni ne nzâmbe imâ pami.” Ŋineŋga kinzi rua sipare tukunzi papa aku mbaunzi ilâ sikale Yesu kie kaika, aku sipanea i. 10 Ŋineŋga Yesu ipainzi tu, “Miki karuru ndimo. Kalâ kaporo panzi niŋgu-nambwe tu mambo silâ Galilaya tâno, ande ma simora naŋa lâ nia ŋinde.”

Kinzi zugu tamâta nenzi ŋgua laŋeŋa

11 Taine rua ŋinde nde silâ yo, ŋineŋga kinzi zugu tamâta pinde muŋga simandi Yesu ne kuru kawa laiti ŋinde, ande silâ Jerusalem lawea ilo ku sitapâri panzi patarawâŋa tamâta ŋalaŋala ŋana vetâŋa rârâni muŋga ipâŋga panzi ŋinde. 12 Ŋineŋga kinzi patarawâŋa tamâta ŋalaŋala sipasau kunzi Isrel ŋgu nenzi katonâŋa, aku sipa ŋgua tu ma mbumbu ŋalae tina silanzi zugu tamâta ŋinde. 13 Mbumbu silanzi lâ, ŋineŋga sipainzi tu, “Miki ma kaporo ŋgua mine: ‘Lâ mbo, maka kakeno utu lâ, ŋineŋga Yesu ne pâri-tamâta sipavea nâ simâ ku sikawea i karae silâ lâ.’ 14 Ambo Rom nemi koipu ŋalae iloŋo ŋgua ŋine, ande maka ma kaveta ŋgua sondo kuku i, ande kala miki ma kasânda malia toŋge kulu, ande tia.” 15 Mine kala kinzi zugu tamâta sikai mbumbu ŋinde aku silâ siveta ikura Juda tamâta ŋalaŋala nenzi ŋgua mine. Aku tapâriŋa laŋeŋa ŋine nde ilâ isala nia lâ, kala lâ zo ŋine kinzi Juda tamâta pinde uru sitapâri tapâriŋa ndainani nâ.

Yesu ionzi ne pâri-tamâta tu ma silâ situla pâri ara

Malaka 16:15-18, Luka 24:46-48, Yoane 17:18, 20:21

16 Aku muli, ŋineŋga Yesu ne pâri-tamâta saŋao kanaŋo taitu nde soka silâ pa Galilaya tâno. Soka lee sipâŋga tuu ŋinde Yesu muŋga ipainzi tu ma silâ papa ŋinde. 17 Aku matanzi ilâ simora Yesu, ŋineŋga sipare tukunzi papa ku sipanea i. Aŋga kinzi pinde nde ilonzi rua-rua. 18 Ŋineŋga Yesu imâ tininzi laiti, aku ipainzi tu, “Maro Kindeni walo ndoni ilua naŋa lâ, kala naŋa akai Maro pa kelekele rârâni lâ samba ilo wa tâno kulu wa. 19 Mine kala miki kalâ kakura nia nia, aku katu pâri ara panzi tamâta simo tâno ndoni, ŋana kinzi ma kalonzi tawana naŋa kâ. Kalilinzi lâ Tama ŋa, aŋga Natu ŋa, aŋga Koroani Sapâŋa ŋa. 20 Aku kapanananzi ŋana sipaveta kuku ŋgua rârâni naŋa muŋga atula pami ŋinde. Mao kanaŋo, naŋa ma amo kumi ikura zo rârâni lee, tâno ŋine ne zo marumbu lâ.”

<- Matai 27