2
Maro Kindeni ne vetâŋa ŋana iyaute kinda piti kâ ande vetâŋa ŋalae tina
1 Mine nde ara ŋana kinda ma tapono muli sondo ndo pa ŋgua mao muŋga taloŋo ŋinde. Tia ma kinda tambariri ŋana toka ŋgua ŋinde muli, itogo wâŋga isakoko ku nao tia lâ. 2 Muŋgani, Maro Kindeni io i ne ŋgua tukuŋa lâ kinzi aŋelo kawanzi nâ, ŋana ma siporo situla panzi kinda timbunda wukale. Ŋgua tukuŋa ŋinde nde ŋgua mao kanaŋo, aku lâ zo muŋgâŋa ŋinde Maro Kindeni ipare nia pa tamâta ea taŋa kaika kala ipu muli pa tukuŋa ŋinde. I ne pareŋa-nia ŋinde nde sondo ndo. 3-4 Andeta kaloŋo ŋga; Maro Ŋalae Yesu tamwata itula ŋgua pwataki tu i ma iyaute kinda piti lâ kondoma ilo. Aku i kawa ŋgua ŋinde nde kelekele ŋalae tina, ipole ŋgua tukuŋa ndo lâ. I tamwata itula ŋgua ŋinde panzi tamâta pinde, aku kinzi kala siporo situla pa kinda tu ŋgua ŋinde nde mao kanaŋo. Andeta ŋinde nâ tia; Maro Kindeni tamwata kala itula pwataki tu ŋgua ŋinde nde mao kanaŋo. Mao nâ, iveta mâsi kaika kie-kie, aku iwae Koroani Sapâŋa ne walo panzi tamâta itogo wisi-ara mine, ikura i tamwata ne pateâŋa. Aku i ne vetâŋa ŋinde itula pwataki tu pâri ara nde mao kanaŋo. Mine kala miki kalomi ŋgere sondo ŋga. Mao nâ, muŋga Maro Kindeni ipare nia panzi tamâta ea sipu mulinzi pa i ne ŋgua tukuŋa. Aŋga lâ zo ŋine, ambo kinda ma tapu mulinda pa i ne ŋgua ŋana ma iyaute kinda piti lâ kondoma ilo, ande kinda ma takura tu takâwa taŋgeŋge ŋana i ne pareŋa-nia kâ mâsi mana, a? Kinda ma takura tia ndo.
Yesu nde kinda nenda Yautâŋa Tamwata
5 Kala ŋine naŋa ma aŋgere ŋgua pinde ŋana tâno wasaseki ŋinde Maro Kindeni ma ipulia ipâŋga lâ zo muli kâ. Kinda tasama tu Maro Kindeni ŋandai ipatea tu kinzi aŋelo ma sikai poe pa tâno ŋinde ŋga. 6 Andeta muŋgani tamâta toŋge iporo ŋgua pa Maro Kindeni mine tu,
“Maka tamâta nde sâ kala noko uru ilo ŋanama. Maka nde kelekele kaa nâ; mine nde mana mana ŋga noko uru pwatonama, a? 7 Andeta noko muŋgani kuo maka kamo kelekele rârâni kulunzi, kala maka kamo noko simbo nâ kalo. Noko kuveta maka kakai koipu, aku kusuka ŋama kâki lâ. 8 Noko kuonzi kelekele rârâni simo maka tamâta kaloma marumbu lâ.”
Ŋgua ŋinde itula pwataki tu kinzi tamâta ma sikai poe pa kelekele ndoni. Maro Kindeni io kelekele rârâni simo tamâta kalonzi. Taitu lâ zo ŋine kinda tasama tu tamâta ŋandai sikai poe mine pa kelekele rârâni ŋga.
9 Taitu ara ŋana kinda ma kalonda ŋgere ŋana Yesu kâ, ina imo kinzi aŋelo kalonzi ikura zo mbuku taitu nâ. Maro Kindeni, i wisi-wisi warika, ande ipatea tu Yesu ma ikai kinda tamâta rârâni niânda, ku ma imâte. Mine kala Yesu ikai nâna ŋalae tina lee ŋineŋga imâte lâ. Ŋana ŋinde kâ Maro Kindeni isuka Yesu kâki, aku io ŋoa ŋalae lâ i tini marumbu lâ.
10 Maro Kindeni nde kelekele rârâni warika, aku uru ikea ŋana kelekele rârâni kâ. I ilo tu ma ikainzi i natu rârâ silâ simo samba ilo, ŋana ma simo ara kâ. Aku ilo patea tu Yesu ma ikai samba ne nzâla piti panzi tamâta, ku ma ikai nâna ŋalae tina ŋana iyautenzi tamâta piti lâ kondoma ilo. Aku Yesu ne nâna ŋinde isuka i ŋana iveta Maro Kindeni ne pateâŋa ipâŋga kanaŋo. 11 Yesu uru ivetanzi tamâta sipâŋga ilonzi mbâra-mbâra lâ Maro Kindeni nao. Maro Kindeni nde Yesu tama, aku imo tamâta ŋinde tamanzi mine nâ. Mine kala Yesu ŋandai mai ŋana ipatu tamâta ŋinde ŋanzi tu “naŋa taiŋgu-tuâŋgu kinzi”.
12 Yesu ipai Maro Kindeni mine tu,
“Naŋa ma atula ŋgua pwataki panzi niŋgu-nambwe ŋana mâsi ŋalaŋala noko muŋga kuveta ŋinde. Lâ zo ŋana kinzi sipasau tu siwâŋgi pano, ande naŋa ma alâ amo kunzi apaneano mine nâ.”
13 Aku iporo kilo mine tu,
“Naŋa ma apauwo warakâŋgu lâ Maro Kindeni mbau ilo”.
Aku iporo ŋgua toŋge kilo mine tu,
“Kamora ŋga, naŋa amo ŋai kunzi tamâta ŋine Maro Kindeni muŋga ipateanzi pana. Kinzi simo i natu wukale.”
Yesu ipâŋga tamâta ŋana ma ivila kinda kâ
14 Yesu iporo ŋgua kie mine ŋananzi Maro Kindeni natu wukale, aku kinzi nde tamâta nâ. Ŋana duvi ŋinde kâ Yesu tamwata ipâŋga tamâta mao, itogo kinzi mine. Yesu ipâŋga tamâta mao; mine kala lâ i ne zo ŋana imâte kâ, ande iyaula Sadana ndo, inani mateŋa warika. 15 Kinzi tamâta uru siruru ŋana mateŋa kâ, aku ikura zo rârâni simo vianzi lâ tâno kulu, ande ruruŋa ŋinde ipanzi kaika, itogo nimbu mine. Andeta Yesu imâte ŋana ipalalana nimbu ŋinde piti lâ tininzi. 16 Kinda tasama tu ŋgua ŋine nde mao kanaŋo: Yesu imâ ŋana ivilanzi Abraham ne vâsa wukale. I ŋandai imâ ŋana ivilanzi aŋelo ŋga. 17 Mine kala Maro Kindeni ipatea tu Yesu ma ipâŋga itogo tamâta mao mine, ŋana i ma ikura tu iveta patarawâŋa tamâta ŋalae ne wurâta papa Maro Kindeni kâ. I kalo sukâŋa ndo panzi tamâta, aku iveta patarawâŋa tamâta ŋalae ne wurâta rârâni ikura Maro Kindeni ne pateâŋa mine. Mao nâ, Yesu ipâŋga tamâta ŋana i ma ikura tu ikai nzâla piti panzi tamâta, ŋana Maro Kindeni ma izavaru nenzi kiesaka piti lâ tininzi. 18 Muŋga, lâ zo ŋinde Yesu imo tâno kulu, ande samâŋa kie-kie imâ ipâŋga papa, aku i tamwata ikai nâna ŋana ipole samâŋa ŋinde kâ. Mine kala lâ zo ndia samâŋa kie-kie ma imâ ipâŋga panzi tamâta, ande i ikura ndo ŋana ivilanzi.
<- Hibru 1Hibru 3 ->