1 Alisisi poposatilimale so, wua꞉ na꞉ yu daliya. Wua꞉ dupa kolle mate a꞉lemha꞉ha꞉iya. Adipalati, wua꞉ dla wotiyalle kokota puapo. 2 Epapedeme wua꞉ alisisi hapulomaye huhutalemelepe. Epalati wua꞉ tluka alisisiye mututla꞉ta dlomelepe. 3 Wua꞉ elo mani aya dla kokolupo ha꞉ha꞉leta miyelo batalimelepe. Wua꞉ elo mani batalimaletapo wua꞉ bobtalimale kokoye nati-imama apelepe. Epedeme wua꞉ mani bobtalimale etapo koko gladle oloma dla wua꞉ye dlapa some hamdepo hamastlepe. Epapedeme wua꞉ yeitamale sopo. Wua꞉ adipalati mosukulu alila tlo omha꞉ha꞉mama alisisi kokolupo ha꞉ha꞉uwa? 4 Epedeme wua꞉ natiya, wua꞉ta wua꞉ oko sotapo wua꞉ alisisi emale dla oko halomha꞉ha꞉lati asiyama pohalopimdena. Epapedeme yia꞉ta wua꞉ dla allimama God dla gadle yilo a꞉lemha꞉ha꞉po. Epalati di pato Lodtapo yia꞉ta a꞉lemha꞉ha꞉ kokoye ma-dalepo.

5 Epele dulu dla wua꞉ta ta꞉lamo hema ha꞉ha꞉uwaye, alisisi poposatilipo ha꞉ha꞉mama wua꞉ta solotamale koko tlo halomha꞉ha꞉uwapo. Epedeme wua꞉ aliya halo ipo ta꞉lati yumme demdiye, wua꞉ aliya epapele some ha꞉ha꞉po. Adipalati, wua꞉ wua꞉ta solotamale koko mate wuskamu me-ilipo teta꞉lati koko gladlowe oloma dla aliya some poyuluwedeme ha꞉ha꞉po. 6 Epame wua꞉tapo ka꞉ka꞉dle so opaye koko gladle dla elemhetame yia꞉ koko gladepame potimaiya demduwapo. Amasiyama opa iwolotapo wua꞉ dla batalimale koko hale pohalomdena.

7 Epedeme mikadepe dle so namkadulo, wua꞉ Lodta puluwe dla dalemha꞉ha꞉mama omha꞉ha꞉iya. Eye epapena, oplamitapo alisisi empame tiyo hellepo depo omhalemdepo. Tiyotapo helemama ya꞉ alisisi emaleye teta꞉pame dlowe alisisita teimelepo depame omhalemdepo. 8 Epapedeme alisisi emalalo oplamitapo ya꞉ alisisita matlepo depame omhalemdiye, epammama wua꞉ ma woloma dalle mate omha꞉ha꞉mama kokalepo ha꞉ha꞉iya. Adipalati, Lodta puluweye mo-mateka꞉pi halapo.

9 Epapedeme mikadepe dle so namkadulo, wua꞉ amkadulo watle atlamha꞉ha꞉mama “wua꞉ta batalimale kokota amma,” demha꞉ha꞉miya. Adipalati, wua꞉ta epamha꞉ha꞉lepiye, Godta wua꞉ kokoye gladepo batalimale asiyama hamilipe. Epedeme wua꞉ natiya. Koko gladlalo oplamiye mo-kokoloma tala dla halapo.

10 Epapedeme mikadepe dle so namkadulo, wua꞉ God tle yu hapame molo atlamalalo sota ha꞉ha꞉le natipame wua꞉ ma epo ha꞉ha꞉iya. Adipalati, yia꞉tapo Lod hi tle yu atlamsiyamama wotiyalle koko dulu dla woloma sadle mate ha꞉ha꞉mduwapo. 11 Epapedeme opa anawolotapo wotiyalle koko dulu dla kokalepo ha꞉ha꞉lepiye, Godta yia꞉ dla siyemhalapo. Epedeme wua꞉ Yob kokoye mo-wua꞉malamana. Ya꞉ wotiyalle koko dulu dla sadle mate woloma kokalepo haluwapo. Epalati Godta ya꞉ dla siyemama koko hauwaye wua꞉ ma-daluwapo. Adipalati, Lodye opa sikemte bokotiyapo malamhalapo. Ame adipalati, ya꞉ dla ya꞉mkale polowamale pato elapo.

12 Mikadepe dle so namkadulo, koko pato itlo woloma daliya. Wua꞉ mikadepe koko atlowedeme omapla di mate epo ta꞉lamo mate epo alisisi opi mate sesalepame aiyalma posolowa. Epedeme wua꞉ koko hale halowe solotamelepiye, ka꞉dena, wua꞉ wua꞉ta solotamale koko hatlo metlo atellepe. Epame wua꞉ koko hale halowe posolotamalalo wekelepiye, ka꞉dena, wua꞉ta posolotamalalo wekele koko hatlo metlo atellepe. Adipalati, wua꞉ta pe-epapalalo ma mepele aiyalma selepiye, Godta wua꞉ koko gladlepe.

13 Epapedeme wua꞉ta ha꞉ha꞉le dulu dla oplami antapo ya꞉ dla upiyele koko ellepiye, ka꞉dena, ya꞉tapo inoma sumale yu God dla otele himilipe. Epame oplami antapo siyele mate hallepiye, ka꞉dena, ya꞉tapo siyele sala mate God hi di dla ta꞉demhallepe.

14 Epame wua꞉ dulu dla oplami antapo esiyele mate ellepiye, ya꞉ ka꞉dena, sos dokopala so sisilamoloweye, yia꞉ta puame ya꞉ dla Lod hi mate dakopala ullu ka꞉dleta sipame ya꞉ye inoma sumale mate ta꞉dlepo depame. 15 Epalati yia꞉ta mikadepe depame inoma sumale himilipiye, esiyele oplami eta ka꞉dlepe. Adipalati, Lodta yia꞉ta inoma sumale yuye dalepame ma-ka꞉depo. Epapele dulu dla oplami ya꞉ dla batalimale koko hale ellepiye, Lodta oloma medla hiyolepo wellipe.

16 Epapedeme wuskamu wua꞉ dulu dla wua꞉ bobtalimale kokoye bobotimatipame inoma sumale mate asiyama ta꞉de asiyama ta꞉de demha꞉ha꞉iya, Godta wua꞉ dulu dla esusulumale so hutiyeye ka꞉ka꞉dlepo depame. Adipalati, God mila꞉pi tle ka꞉depo hallalo oplamita inoma sumaleye sikemte itiyamana. 17 Epedeme wua꞉ natiya, di mama Ilayaye oplami dia꞉ sepele haluwapo. Ya꞉tapo tiyo pehellalo hallepo depame inoma sumale kokalle himilati tiyota pehellalo sokomoko dapahatlope gudepo ma mama 6 pololuwapo. 18 Ya꞉ epame ma tiyo hellepo depame inoma sumale kokalle himilati tiyo patota ma heluwapo. Epalati dlowe alisisita matle matauwapo.

19-20 Epapedeme mikadepe dle so namkadulo, wua꞉ dulu dla oplami haleta mikadepe api tle alikili dla polatullupiye, ka꞉dena, oplami haleta ya꞉ye hamame puluweye. Adipalati, wua꞉ malamaiya, oplami antapo ya꞉mkaleye batalimale koko tle ma ka꞉dle api dla sempulupiye, ya꞉ oplami eye kokó elepo ellalo polowe dla tullati ya꞉ pasakalo gademama apelepe. Epalati oloma medla Godta ya꞉ batalimaleye hiyotipo wellipe.

<- Yeims 4